1A-ibagangine, Ezequías bela-bela nailikgumai burgwednaga gusad. Geb Bab-Dummad-gayaburba-barsoged-Isaías Amoz-e-machi, Ezequías-dakega ese nade gusad. Degi, ega sogdapid: “Bab-Jehová weyob soged: ‘Be bar-gwisguosurye, be burgoye. Degisoggu, be-neg-yaginmaladga igargan napi-nue be ukoye.’ ”
2Geb degine, Ezequías, galusik aibilisa imaksad. Weyob, Bab-Jehováʼse isedar-gollar imaksad:
3“Bab-Jehováʼye, be an-ebinsao. Andi be-sogedba bega arbasad. Napiragwadba an beba nanasad. Be-ibmar-abegedba andi bega ibmar imaksad.” Degi Ezequías bela-belad isedar-boale meremai gusad.
4Geb degine, Isaíasʼse Bab-Jehová-gayaburba nonikid, ega weyob sognonikid:
5“Ezequíasʼse be nae, ega be sogo: ‘Bab-Jehová, be-dad-dummad-David-e-Bab-Dummad weyob sogye: Anse be gochadi, bela an be-itosye, be-ibyanis-aryosadi an daksabarye. Degiirdi, birgambe-gakatar (15) napi-gudii-guega an be-imakoye.
6Asiria-e-reygi an be-ollorsaoed, we-Asiria-neggwebur-e-reygi an be-bendakoed. Ani an, we-neggwebur-irwa gwisguoed.’ ”
7Geb Isaías, Ezequíasʼga sogded: “Bab-Jehová-bega-ibmar-sogsad mag be dakegala, we-ibmar-wilub Bab-Jehová bega oyogoed:
8Acaz-wachi an gannar sorsik wachi-irgwen-wilub osikirmakoed.” Geb agine, dad-ibeler-naidi gannar wachi-irgwen-wilub sorsik sikirmaksad.
9Judá-e-rey-Ezequías, nailikgumaigusad-sorbali, gwisgusgua, weyob garda narmaksad:
10“An weyob sogmai gusad: ‘¿An nabir-gudiid-ibagangi nue-an-burgwesunnode? ¿Burgwed-galuse an megnaedgadsunde? ¿Bar an wegi daklegosuli gusunnode?’
11An sogsabalid: ‘We-napneggi bar an Bab-Jehová-dakosulid. We-napneggi-dulemar-bukwad bar an dakosurbalid.’
12An-annik an-neg susmalad, urwedigi an-annik susmalad. Sibad-wawaad-edarbed-e-dordoneg-obipirmaklegeyobi an-neg imaksamalad. Dule-mormaked, mor-maknaiyobi be an-san imaksad. Emide, Bab-Dummad, mor-maknaid-bergusadgi-e-dikarmar-sike-sike-imaklegeyobi an-imaksad. An-ibagan baisursunna be obelononikid.
13Ogormaksii an neg-oiboalid. Achumigur-nono-wawaad-garmar-bibisgeyobi an-imaknonikid. Irgwennaar be an-obelononikid.
14Wirsob-boedyobi an bosad, nuu-dabgalayob-dakleged-boedyobi an bosad, nuu-sibu-uurmakedyobi an bosad. An-ibya niba-atakedbali, yegusad. Bab-Jehová an suli-suli-itogusad, be an-bendakdage.
15”Ar ¿igi bar an sogosunna? Ar e-sunnagwad anga sogsad. Ar deyob imaksado. Ulubgi an-isdar-itogedi, bar gabbisuli an-imaksad.
16Bab-Jehová, be-sogedbali dulemar dula gudidimalad. An deyobi be-sogedba an dula-gudii gumogoed. Bee be, anga san nudaksad, bee be, anga burba uksad.
17An suli-suli-itosad, emidi, an bogidik itoged. Be an-sabedbali yaa-dummad-dule-obelogedgi be an-bendaksad, begi isgussuliyob be an-daksad.
18Neg-uan-mamaidi, gwen be-nug ogannogosulid. Dule-burgwarmaladi, gwen be-nug odummosulid. Dule-yaa-dummadse-batemamaidi, be-innikigwadba-daedgi gwen sunmakosurmalad.
19Unnila dula-gudimaladi, be-nug-ogannoged, igi an emi-ibagi be-ogannoge, deyob be-ogannomarmogad. Bela babgan na e-mimmiganga be-innikidaedgi sunmakmaloed.
20”Bab-Jehová an-abonogoed. Degisoggu, anmar bane-bane Bab-Jehováʼse-goled-neggi, igar-dub-nikamaladba namakmaloed.”
21Geb degi, Isaías sogded: —Higo-san ollimakmalo, geb rey-abagangi yaa-siidgi be mage-mage imakmalo. Agine nabir nugudoed.
22Geb degi, Ezequías, Isaíasʼga sokalid: —An nabir Bab-Jehováʼse-goled-negse naknaega, ¿ibi-wilubgi nabir magar an daksale?
