1Bu kuhni yimerrangeni, wanjh King Hezekiah bekkarrinj bu doweni kunkimuk dja darnkih kayakmen. Wanjh Prophet Isaiah nawu beywurd nuye Amoz wam bidjahwong, wanjh bimarneyimeng, “Nawu Yawey ngunbengdayhke, dja yimeng, ‘Yiyingkihmarnburrimen dja ngudda bonj, darnkih yirrowen. Minj yimakmen kore yirrowen kunkimuk.’ ”
2Bu King wokbekkang Yawey nuye kunwok, wanjh kebborledkerrinj kore wall, dja dingihdi yiwarrudj bu bidjawayhmeng nawu Yawey.
3Nungka yimeng, “Ngudda nawu Yawey, wardi kandjalburrbu kore ngayekenh bu munguyh ngadjalrengehrey munguyh kore ngudda yidjareni, dja ngaye woybukwong munguyh, dja ngadjalkurduyimi kunmak manbu ngudda ke!” Wanjh nungka wernhnalkbom.
4Wanjh nawu Yawey biwokwong Isaiah. Nungka yimeng,
5“Yiray yimarneyimen nawu Hezekiah, ‘Kuhni yimeng Yawey, “Ngaye Yawey God nuye King David nawu mawah ke, wanjh bekkabekkang bu ngudda yihdi yiwarrudj, dja mak ngaye nang ngudda yinalkbuni. Kunmekbekenh kunu ngaye won ngudda fifteen mandjewk bu yidjaldarrkid.
6Dja kunbuyika ngayime. Ngaye wanjh ngehke ngudda dja mak ngabenngehke rowk birriwarlahkenh bininj nawu kabirriyo kondah kore kunredkimuk. Bu King nawu Assyriabeh kamre, wanjh ngaye nahnan ngudberre dja ngehke ngudberre rowk.
7Ngaye nawu Yawey bukkabukkan kunbuyika duninjh ba bu ngudda yiburrbun ngaye woybukkih ngakurduyime kore ngaye ngawokkurrmerrinj. Kuhni ngayime.
8Yiburrbun steps manbu King Ahaz marnbom, wanjh bu kundung karrungre yinan kundjurle ngarre, wanjh ngamarnbun karredjkendurnden ten steps. Kuhni wanjh kunbuyika duninjh, dja bu yinan, wanjh yiburrbun kore ngaye marneyimeng.”’ ” Kaluk kuhni woybukkendanj kore Yawey biyingkihbengdayhkeng.
9Kaluk King Hezekiah nawu wohrnani kore Judah, makminj kore doweni. Wanjh kunmekbekenh nungka bimbom mankarre nuye.
10Nungka bimbom, “Ngaye ngayimeng woybukkih bu darnkih ngarrowimeninj. Dja ngadjawarren bu njalekenh ngarrowen bolkkime? Njalekenh bu minj ngadjaldarrkid kunkuyeng?
11Dja mak ngayimeng minj ngayawoyhnan Yawey kondah kore bininj kabirridarrkid, dja minj ngayawoyhbennan binihbininj nawu kabirrihni kondah kurorre. Ngayimeng bonj, ngabenbawon rowk.
12Ngayimeng kundarrkid ngardduk wanjh kayakmen yiman kayime dabburlin manbu bininj kawarrhke. Mak ngabekkarrinj bu kundarrkid ngardduk kadjobme werrkwerrk, dja minj ngaye ngaburnbuyi rowk kore ngayimeninj. Ngayimeng bonj, God yiman kandarrkiddadjke.
13Ngaye ngadjaldi kunkakkuyeng dja ngakangewarreni. Ngayimeng nawu God yiman kanmurrngbakkeyi yiman nawu lion nganbuyi. Ngadjalyimeng bonj, God yiman kanyakwoyi.
14Ngangudjwarrewarreminj dja ngakayhmi yiman mayhmayh kunkele dorrengh. Ngangeyngeyyimi, dja ngamimwarreminj bu ngadjalbolknani kaddum kore heaven Ngadjaldi yiwarrudj dja ngayimeng ‘Ngudda nawu Yiwohrnan Rowk, yimray kanbidyikarrmen!”
15“Bolkkime baleh ngayime? Kuhni rowk bu nganmarnekurduyimerranj wanjh Yawey nungan marnbom. Dja nungan nganbengdayhkeng. Kunmekbekenh kunu ngaye minj ngaburlumerren. Ngaye ngadjaldi dja ngamayalibekkarren kore nganmarnekurduyimerranj bu ngaye munguyh djalyeledj ngare.
16Ngudda nawu Yiwohrnan Rowk, ngudda kuhni rowk kanmarnekurduyime ngad nawu djal bininj ba bu ngarridjarrkid. Kamak bu ngudda kanwon ngardduk kundarrkid dja kunngudj.
17Yoh. Ngaye ngaburrbun ngudda kanmarnedjare, dja kunmekbekenh kunu ngudda kanwong kunrayek. Ngudda wanjh kanngehkeng kore kundowikenh, dja mak kanmarnebengmidjdanj kore kunwarre rowk ngakurduyimeng.
18Bininj nawu kabirridowerren dja kabirridi kore kumidj wanjh minj bedda ngundiburlume. Kundowikenh minj ngunburlume. Bininj nawu birridoweng wanjh minj kabirriyawoyhburrbun ngudda nawu yidjalwoybuk munguyhmunguyh.
19Bininj nawu kabirridjaldarrkid, bedda wanjh ngundiburlume, dja ngaye bolkkime burluburlume. Nawu kornkornkumo dja ngalbabadjan ngundimulewan bu bedda kabindibukkabukkan nawu wurdwurd bedberre.
20Nawu Yawey kanngehke, dja ngad wanjh karrire karringimen kore Yawey nuye Temple, dja karriwayini instrument dorrengh manbu kakarrme kunyarl kunwern. Karridi kumekbe kaluk bu karriyakmen karridowe.” Kuhni rowk nawu Hezekiah bimbom bu mankong marnbom.
21Bu kerrngehkenh Hezekiah dedjingmey doweni, wanjh nungka bidjawam nawu Isaiah, “Yiddok woybukkih ngaye ngamakmen dja ngayawoyhbidbun kore Yawey nuye Temple? Njale kanbengdayhke kore Godbeh, ba bu ngaye woybukwon?” Wanjh Isaiah benbengdayhkeng bininj nuye king, yimeng, “Ngurrikinjemen manbarnem manbu figs dja yimarnbun mirridjin. Wanjh ngurridelke kore bulng kakarrme, wanjh kamakmen.”
