1Doḡa tatakalina ya yasisi, bi belana sa buso doḡa ḡasaḡasalinemo.
2Doḡa tatakalina matabuna belana sa duga yaḡosi, bi ma nuwavisudi sa yasisi. Kitana yai nuwavaivana mai Lebanon oyedi. Bi yai maulana mai Kamel bi Salon wapudi. Ḡome Bada namalina ya kamaḡati, bi Maimaituwa ena ḡailisi dididigina sa kita.
3Nimedi belubeludi bi kaḡedi gusugusudi, kwa laibagidi.
4Nainaili kaipotedi kwa giuwedina gado, “Ko ḡailisi bi koma naila! Emi Maimaituwa ya nato, bi yai yawasanimi, bi mulimimo ya moito bi emi ḡaviya ya kovoḡi gulatedi.”
5Bi matapotepotedi kaka matedi sa yana, beyapotepotedi kota beyedi sa nuwakamaḡa.
6Kaḡedi nuwanokudi kaka sa tapipila bi sa biga, bi wai papapidi sai nuwavisu bi sa binau. Gauba kaka kalakalalelemo, doḡa tatakalinaḡa ya velau.
7Gimoli wai poyedi saila gauba, doḡa ḡasaḡasalinaḡa tovosa sa laupusuwali. Daḡasi gwegwedi wala doḡa ḡasaḡasalinemo a miyamiya bi niganana ḡawaḡawa sa duga.
8Doḡa tatakalinaḡa kaka eta dididiga ya nawa. Etana isana ba Eta Waiyawa. Gebo tauvoiyedi mote etana sima kaiwata. Maimaituwa ena ḡowana taukauwena, mba etanaḡa sa nawa, bi lava bu'ubu'uwidi, mote kaka etana sima kaiwata.
9Etanemo laiyon bi ḡamoḡamo wainuwa nainailidi, mote kaka maiḡa sima nawa. Bi Maimaituwa ena lava i wai yawasanidina taudiḡa etanaḡa sa nawa.
10Bi Bada lava i wai yawasanidina taudidi sa munaḡa tava. Tedi ma saledi Saiyonmo sa sola saḡa bi yasisi kenakena nonoḡina sai kunuboboe. Nuwaboya bi ḡaba ya kovi, nuwavisu bi yasisi yai wanavutalitalidi.
