Jesaia 35

1

2

5

6

7

8

9

11

12

28

30

31

32

33

35

40

41

42

43

44

45

46

49

50

52

53

54

55

57

60

61

63

64

65

66

¹Gamêŋ gasaŋ to gamêŋ ŋakeleŋ oc têntac ŋajam ma gamêŋ sawa oc êtu samuc ma ŋaola ênac lêtêŋ amboac mênamiŋ.

²Ŋaola êsa ênam aucgeŋ ma gamêŋ tau oc êtu samuc ma ênam wê totêtac ŋajamgeŋ. Ma sêkêŋ Lebanon ŋaŋawasi ma Karmel to Saron ŋagêlôŋ êndêŋ gamêŋ tau. Êsêac oc sêlic Apômtaunê ŋawasi ma Anôtônê ŋawasi kiŋŋa.

³Aŋgôm lemem, taŋ kêtu palê naŋ, ŋajaŋa êsa to aŋgôm emduc, taŋ kêtu goloŋ naŋ, ŋajam êsa.

⁴Asôm êndêŋ lau tonêŋ ŋalêlôm ŋatutuc gebe “Akô ŋajaŋa ma atêc taôm atom. Alic acgom, nêm Anôtô oc êmêŋ êtu êkac kamocgôc to êkêŋ ŋagêjôŋa ma ênam amac kêsi.”

⁵Go mateŋpêc mateŋ êlac ma taŋeŋsuŋbic taŋeŋsuŋ êpoa lasê.

⁶Go magiŋ kêsu sêmboaŋ sa têtôm mojawa ma aweŋmê sênam wê lambiŋŋa, gebe bumata oc êu lasê êsa gamêŋ gasaŋ to bu kapôêŋ êsa gamêŋ sawa.

⁷Kekop ŋandaŋ oc êtu bugêjactoŋ ma bumata oc êpulu aŋga nom gelo-gelo, ma gêgwaŋ to ôpic ma siŋ êpi aŋga kêam gamêŋ sawaŋa maleŋ.

⁸Ma intênasêga teŋ oc ênêc tonec, ma sêsam intêna tau gebe “Intêna dabuŋ.” Lau môpŋa sêsêlêŋ sêsa tonaŋ atom, ma lau meloc sêmoa intêna tau atom.

⁹Lewe teŋ oc êmoa tônê atom ma bôclai teŋ oc êsêlêŋ êmoa intêna tau atom, oc tatap êsêac sa sêmoa tônê atom, lau taŋ Apômtau gêjam êsêac kêsi naŋgeŋ, oc sêsêlêŋ intêna tau.

¹⁰Ma êsêac, taŋ Apômtau kêgaboac su naŋ, oc sêmu sêmêŋ mêŋsêô lasê Sion towêgeŋ. Têntac ŋajam teŋgeŋŋa oc ênsac êsêac ŋaô têntac ŋajam to têntac ŋagaô oc ênam êsêac auc ma gêŋwapac to taŋiboa oc êwi êsêac siŋ.