Aisea 35

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Iwe, ewe fanüapö me ewe fanüpwas repwe pwapwa, ewe fanüapö epwe mwänek o afisätä pön irä usun chök ekewe rous.

²Epwe fokun ämärätä irä, epwe mwänek fän pwapwa me köl. Iwe, epwe lingeni lingen Lepanon, epwe pwal pwülüöch usun pwülüöchün ekewe tanipi lon Karmel me Saron. Iwe, aramasan meinisin repwe küna lingen ewe Samol mi Lapalap, repwe pwal mefi tekian ach we Kot.

³Oupwe apöchöküla pau kana mi apwangapwang o anüküchara pwäsuk kana mi chechech.

⁴Oupwe apasa ngeni chokewe mi niuokus lon letiper, “Oupwe pworacho, nge ousap niuokus. Ämi Kot epwe feito pwe epwe apwüngü chon oputakemi. Epwe feito pwe epwe amanauakemi.”

⁵Mürin, mesen chon mesechun repwe nela, nge selingen chon selingepüng repwe sukula,

⁶chon pechemä repwe mwetemwet usun eman chia, nge ekewe chon awemwöch repwe köl fän mweireir. Pun lenien koluk repwe mökküla lon fanüpwas, nge chanpupu repwe pupu lon fanüapö.

⁷Iwe, pi mi pwichikar ren akkar epwe wiliti eu nomun koluk, nge lon ewe fanü mi pwasapwas epwe wor chönüttu. Iwe, ekewe lenien wolif repwe wiliti eu leni mi pwülüöch, ia fetil me irä ra mär ie.

⁸Iwe, ikenan epwe wor efoch alalap epwe iteni Al mi Pin. Ekewe chon tipis resap fetal won, nge ekewe chon silemang resap tongeni tok seni.

⁹Iwe, esap wor laion won ewe al, esap pwal wor manmwacho repwe tolong lon. Nge chokewe chök mi küna manau repwe fetal won.

¹⁰Iwe, chokewe ewe Samol mi Lapalap a angaseer repwe liwinsefäl o feiliti Jerusalem fän mweireir me köl. Pwapwa esemüch epwe nonom rer. Pwapwa me mwänek epwe toriir, nge lolilen me ngüngü epwe sü seniir.