Esayi 32

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹A mato, mangana nde mangayaan nabama nɛn tinxinni, kuntigine yi kuntigiyaan liga kiti kɛndɛn xɔn.

²E muxune birin luma nɛn alo yigiyaden foyen bun alo luxunden kala ti foyen bun, alo igena kiraan tonbonni, alo gɛmɛ gbeen nininna bɔxɔ yixareni.

³Yɛɛ kanne yɛɛne mi fa luma raxixi, tuli kanne yi e tuli mati.

⁴Muxun naxanye xaxili mi dɔxi, ne xaxinla nun kolonna sɔtɔma nɛn, dɛ masuxune yi falan ti a tinxinni e dɛ mafuraxin na.

⁵Nayi, a mi fa falama xaxilitarene ma a xaxilimane, fe ɲaxi rabane mi fa yatɛma muxu gbeene ra.

⁶Amasɔtɔ xaxilitaren xaxilitareya falan nan tima. E hakɛ feene yitɔnma e bɔɲɛni, e lu Ala kolontareya wanle kɛ, e lu fala ɲaxine tiyɛ Alatala ma. E kamɛtɔne luma kamɛn na, min xɔnla naxan ma, e na kuma igeni.

⁷Fe ɲaxi rabane wanle ɲaxu. E fe ɲaxine yitɔnma alogo e xa yiigelitɔne halagi wulene xɔn, hali yoon tɔrɔ muxune xa e kitini.

⁸Koni muxu faɲine fe faɲine nan yitɔnma e yi lu e ɲɛnige faɲiyani.

⁹Ɛ tan ɲaxanla naxanye luxi xaxili sani, ɛ keli, ɛ tuli mati n na! Ɛ tan sungutunna naxanye xaxili ragidixi feu, ɛ tuli mati n ma falan na!

¹⁰Benun ɲɛɛ keden e nun nde, ɛ tan naxanye xaxili ragidixi, ɛ yimaxama nɛn, bayo se bogi bolon daxine ɲanma nɛn, sansi xaba daxine yi dasa se xaba waxatini.

¹¹Nayi, ɛ gaxu, ɛ tan ɲaxanla naxanye xaxili sani, ɛ kɔntɔfili, ɛ tan sungutunna naxanye xaxili ragidixi. Ɛ dugine ba ɛ ma, ɛ yi kasa bɛnbɛli dugine xidi ɛ tagi sununi.

¹²Ɛ kanken makudun, ɛ wuga xɛɛ tofaɲine nun manpa bili sabatixine fe ra,

¹³e nun n ma yamana bɔxɔna, firin ɲali kanne nun tansinne bata sabati dɛnaxan yi. Ɛ wuga banxi faɲine fe ra sɛwan yi dɛnaxanye yi e nun sumunna yi taan naxan yi yɛyɛ.

¹⁴Amasɔtɔ manga banxin nabeɲinma nɛn, taa yimaxaxini ito yigelima nɛn, a yire makantanxine nun sangansone yi findi banxi xɔnne ra han habadan, e nun burunna sofanle magidena, e nun xuruseene dɛ madondena,

¹⁵han Alaa Nii Sariɲanxin yi godo nxu ma keli kore, tonbonna yi findi wudi bili nakɔɔn na, wudi bili nakɔɔn yi findi fɔtɔnna ra.

¹⁶Nayi, kiti kɛndɛn luma nɛn tonbonni, tinxinna yi lu wudi bili nakɔni.

¹⁷Tinxinyaan yi bɔɲɛ xunbenla raso. Tinxinyaan tɔnɔn yi findi sabarin nun makantanna ra habadan.

¹⁸N ma yamaan dɔxɔma nɛn bɔɲɛ xunbeli yireni, dɔxɔde makantanxine yi, matabu faɲin dɛnaxanye yi.

¹⁹Hali balabalan kɛsɛne fɔtɔnna kalama nɛn, taan mumɛɛn yi fɔn,

²⁰sɛwan luma nɛn ɛ tan xa. Ɛ tan ɛ sansine sima nɛn xudene birin dɛ, ɛ yi ɛ ɲingene nun sofanle lu e sagoni.