1Doṉo la, na baṉara si kote baṉara ni sari na tie pa tinoṉoto meke sari na palabatu si kote tuturaṉa pa ṉinoṉo.
2Hopeke tie si kote guana keke vasina pude paere pa givusu meke na tometomeana pa raneboṉi, guana kolo tototolo pa popoa qega meke na maqomaqo tanisa patu lavata pa popoa loke kolona.
3Meke sari matadi ri na tinoni pu dodogorae si kaqu dodogoro, meke sari taliṉa dia rini pu avavosae si kaqu avavoso.
4Sa binalabala sapu haluhalue si kote tumae meke gilagilana, meke sa mea sapu zama ṉira si kote zama va leana pule meke bakala.
5Sarini pu duviduvili si lopu kaqu ta pozae palabatu, meke sari tie sekesekei si lopu kaqu ta pamaṉae pule.
6Ura sa tie duviduvili si zama va pekipekie tugo, meke nana binalabala si tupiti mo pa ginugua kaleanadi. Na hahanana kaleadi seu pa kinehana sa Tamasa si tavetaveti sa, meke na binalabala seadi si tozi sa pa guguana e Zihova; saripu ovia si lopu poni sa saripu memeha si hekini kolo sa.
7Sari hahanana tadi tie pekipeki si kaleanadi, meke taveti rini sari tinavete sekesekeidi; pude ṉovali sari tie malaṉa pa koha, be vea leanadi gua sari dia tinepa.
8Ba sa tie toṉotona si taveti sari na binalabala toṉotodi meke pa binalabala toṉotodi si turu si asa.
9Gamu barikaleqe pu koa valeana mia, tekulu, mamu va avoso mae koa Rau; gamu na tudia vineki pu koa loketoṉa matagutu nia, mi avosia sapu kote zama nia Rau!
10Pa vasi totoso hite mo, hola nia mo keke vuaheni, gamu pu kokoa va leana si kote neneqara; sari vua huda qurepi si lopu kote vua, meke sa totoso pakepakete si lopu kote ta evaṉa.
11Mi matagutu sisigiti na neneqara, gamu na barikaleqe pu koa valeana mia; mi matagutu, gamu na tudia vineki pu lopu matagutu! Gore pani sari mia poko leleadi, mamu va sagei pa kopete mia sari poko baika.
12Mi pohari raqaraqa mia pa tinalotaṉa, balabala i sari inuma vaeni sapu vua katakata,
13meke sari na pepeso tadi Qua tinoni, pepeso sapu ele toqolo sagea na hudahuda rakihi, uve lukalukana ni sari doduru vetuvetu sapu hoke vevehe qetuqetu, meke koasa vasileana lavata hie sapu hoke siṉia na qinetuqetu.
14Sari vasidi sapu ta gobadi si kote ta veko palae, sa vasileana lavata sapu vevevehena si kote ivulu; sari goba vari likohae meke na vetu hakehakei ululudi si kote ta evaṉae na pepeso kaleanadi ninae rane, vasina kote horu qetu sari doṉ'ki meke toa ia duduli tadi na sipi,
15osolae ta zoropae mae panaulu koa gita sa Maqomaqo te Tamasa, meke sa qega si ta evaṉae na inuma masuruna, meke sa inuma masuruna si ta evaṉae na hiqohiqo.
16Sa ṉinoṉo si kote veko kinoa pa qega meke sa tinoṉoto si kote koa la koasa inuma masuruna.
17Sa vuana sa tinoṉoto si na binule; sa laena sa tinoṉoto si na kinoa noso meke na kinalavarae koe Tamasa ninae rane.
18Sari Qua tinoni si kote koa pa vasidi sapu koa ia binule, pa vetu sapu lopu boka ta raza kamo la, pa vasina sapu kote magogoso meke lopu ta sosoara.
19Be la sa ruku kabukabue aesi meke hoqa gore betoi sari hudahuda pa soloso, meke sa vasileana lavata si ta huara inete taloa,
20ba mi koa tamanae si gamu, totoso letei gamu sari mia kiko pa kalidi rina tototolo, meke sari bulumakao na doṉ'ki si va henahena i gamu koasa pezara duduli lavata.
