1Sɔ̃ɔ teeru ɡoo u koo yɑri u bɑndu di kpɑ wi kɑ win bwɑ̃ɑbu bu tem mɛ kpɑrɑ ɡem sɔɔ.
2Ben bɑɑwure u ko n sɑ̃ɑwɑ nɡe kuku yeru woo bɔkɔn sɔ̃, ǹ kun mɛ nɡe dɑɑru mi kɑkoru sɑri, ǹ kun mɛ nɡe kpee bɑkɑrun sɑɑru mi dɑ̃ru ɡɑru sɑri.
3Be n weenɛ bu yɑm wɑ, ben nɔni koo wukiɑrɑ. Be n weenɛ bu ɡɑri swɑɑ dɑki, bɑ koo nɔ sɑ̃ɑ sɑ̃ɑ.
4Be bɑ ku rɑ bwisiku bɑ koo kɑsu bu ɡiɑ. Be bɑ mɑɑ bebirimɔ bɑ koo ɡɑri ɡere dee dee tɔmbu bu kɑ nɔ.
5Bɑ ǹ mɑɑ ɡɑri bɔkɔ sokumɔ tɔn boko. Mɛyɑ bɑ ǹ mɑɑ tɔn kɔ̃so sokumɔ tɔn ɡeo.
6Domi ɡɑri bɔkɔ u rɑ ɡɑri swiniwɑ. Kɔ̃sɑ sɔɔrɑ win bwisikunu nu rɑ n woo. Win kookoosu kɑ win ɡɑri kpuro ku rɑ Gusunɔ bɛɛrɛ wɛ̃. Mɛyɑ u ku rɑ wi u ɡɔ̃ɔru bɑrɔ dĩɑnu kɛ̃. U ku rɑ mɑɑ wi nim nɔru ɡɑ mɔ̀ nim kɛ̃.
7Tɔn kɔ̃son kookoosu kpuro su ku rɑ n wɑ̃. U rɑ kpunɑɑ dɑbinu kowɑ u kɑ bwɛ̃ɛbwɛ̃ɛ kɑm koosiɑ kɑ weesu, bɑɑ bwɛ̃ɛbwɛ̃ɛ wi, ù n ɡem mɔ.
8Adɑmɑ tɔn ɡeo, kpunɑɑ ɡeɑ u rɑ ko. U rɑ n mɑɑ yɔ̃wɑ ɡem sɔɔ dim dim.
9Bɛɛ tɔn kurɔbu, bɛɛ be i kun bwisikunu ɡɑnu mɔ bɛɛn wɑ̃ɑru sɔɔ, i seewo i nɛn ɡɑri nɔ. Bɛɛ wɔndiɑ ɡɑru koo sɑribɑ, i mɑn swɑɑ dɑkio.
10Gɑsɔku ɑmɑdɑɑre, i ko i wururɑ, domi i ǹ mɑɑ resɛm wɑsi i sɔri.
11I de i nɑndɑ bɛɛ be i ǹ bwisikunu mɔ bɛɛn wɑ̃ɑru sɔɔ. Bɛɛ ɡɑru koo sɑribɑ i diirio. I bɛɛn yɑ̃nu potirio i yɔ̃rɑ bɑsi, kpɑ i kĩɑsu dewe nuku sɑnkirɑnun sɔ̃.
12I bɛɛn bwɑ̃su nɛnuɔ, i kɑ nuku sɑnkirɑnu sɔ̃ɔsi, yèn sɔ̃ bɛɛn ɡbee ɡeenu kɑ bɛɛn resɛm ɡbɑɑ ɡeenu nu koo kɑm ko.
13Wee Yinni Gusunɔn tɔmbun tem kɑ yɛnu ɡèn mi nuku dobu rɑɑ wɑ̃ɑ, n koo ko bɑnsu, kpɑ sɑ̃ki yi kpi mi.
14Bɑ koo ben sinɑ kpɑɑru biru kisi kpɑ Yerusɑlɛmu ye yɑ rɑɑ tɔmbu yibɑ bu ye deri. Yen ɡuuru kɑ yen kɔ̃sobun wɑ̃ɑ yenu nu koo ko bɑnsu. Yɛɛ kpiki yi ko n dɑ bɔsu mi, kpɑ bu mɑɑ yɑɑ sɑbenu kpɑrɑ mi.
15Adɑmɑ Gusunɔn Hunde u koo sɑrɑmɑ wɔllun di u n wɑ̃ɑ bɛsɛ sɔɔ. Sɑɑ yerɑ mi dĩɑnu ku rɑ rɑɑ kpi, n koo dĩɑnu ko, kpɑ yɑm mi dɑ̃nu kun dɑɑ dɑbi, n ko dɑ̃ɑ sɔ̃ɔ.
16Sɑɑ ye sɔɔrɑ ɡem mu ko n wɑ̃ɑ tem mɛ kpuro sɔɔ.
17Mɛyɑ mu koo kɑ bɔri yɛndu nɑ, kɑ wɛ̃rɑbu bɛrum sɑriru sɔɔ sere kɑ bɑɑdommɑɔ,
18kpɑ bɛsɛ Yinni Gusunɔn tɔmbu sɑ n wɑ̃ɑ mi, bɔri yɛndu sɔɔ dii nɑɑnɛɡinɔ.
19Sɑ ko n wɑ̃ɑwɑ doo nɔɔru sɔɔ sɑ n dĩɑnu duurumɔ mi nim mu wɑ̃ɑ, kpɑ sɑ n bɛsɛn kɛtɛkunu kɑ bɛsɛn nɛɛ yɔ̃su yi n dimɔ bɑɑmɑ. Adɑmɑ ɡuru kpenu nu koo yibɛrɛbɑn tɑbu kowobu kɑm koosiɑwɑ be, be bɑ dɑbi nɡe dɑ̃ɑ sɔ̃ɔ, kpɑ ben wuu ɡe, ɡu wɔrumɑ.
