1Isaías soged: “Bab-Jehová, dulemar-yar-baid-baidgi-bukwamalad Ciro-urbalikwaa-nanaega imaksad. Ciroʼde, Bab-Jehová-nuggi-reyga-nugsalesadid. Degi, Bab-Jehová, Ciro reymar-e-gangued-obelogega imaksadid, Ciro-abinni, yawagakmar-argaega-imaksadid, yawagakmar-mer-bar-atuega-imaksabalidid.”
2Bab-Jehová weyob Ciroʼga soged: “Ani an be-idunadapi guoed, ani an yalamar-omatogoed. Ani an bega esgoro-gordikid-yawagakmar mamaroed, ani an bega yawagak-eduged-esgorobiid bibisgoed.
3Ibmar-nuegan-gargerbamalad-dukuar-bukwad an bega ukoed. Ibmar-nuegan-dukuar-bukwad an bega ukoed. Adi, be wisguegar, ani an Bab-Jehová gued. Ani an Israel-dulamar-e-Bab-Dummadid. An be-nugba bese goledid.
4An, an-mai-Jacob-sabedbali, degi, an Israel-dulamar-susadbali, an bese be-nugba goled. Be aku an-dak-inigwele, an bega nug-gandikid uked.
5Anbi an Bab-Jehová gued, dule-baid sulid. An-imbagi, Bab-Dummad-baid sulid. Be aku an-dak-inigwele, an be-ogannogoed,
6adi, dulemar dad-nakwedsik-bukmalad, degi, dad-argwanedsik-bukmalad wisgumalagar, an-imbagi Bab-Dummad-baid sulid. Anbi an Bab-Jehová gued, dule-baid sulid.
7Ani an neg-meegwad nasiksad, ani an negsichid nasikbalid. Ani an dulemar-nued-gudiguega imakbalid, ani an boni-dummagan ukbalid, ani an Bab-Jehová-guedi, bela we-ibmarmar imakmaid.”
8Bab-Jehová soged: “¡Nibali, dii-boomiedyobi igar-innikigwad an barmidsun! ¡Mogir-imbaba dii-wiedyobi igar-napiragwad an barmidsun! ¡Napneggi igar-innikigwad maiguguega an imaksun! ¡Abonoleged an barmidsun! An Bab-Jehová-guedgi an we-ibmarmar obinnisad.”
9Bab-Dummad sogbalid: “Dule na e-obinnisadbo urwele, ¡duledar-wiles-dakle! Ar dule napsa-nog-goayobi, napsa-nog-goamar-abargi-milediidyob gued. Ar napsa dule-e-sobedga weyob sogosi: ‘¿Ibu be imaknai? Be-ibmar-imaknaid nue be imaknaisulid.’
10”Dule e-babga sogele: ‘Ibiga be an-baksa.’ Dule-deyob-sogedi, ¡duledar-wiles-dakle! Dule e-nanga sogele: ‘Ibiga be napnegse an-odesa.’ Dule-deyob-sogedi, ¡duledar-wiles-dakle!”
11Bab-Jehová Israel-dulemar-e-Bab-Dummad-Isligwaled, Israel-dulemar-urbisad, weyob soged: “¿Ar igi-an-mimmigan-yoedse-guoed be anse egichosi? ¿An-ibmar-obinnisadgi bemar anga igar-ukosi? Suli.
12Ar ani an napneg nasiksad. Ani an dulemar urbisad. An-argangine, mogir-billi an nasiksad. E-niisgwamarga ani an igar uksad.
13Ani an gandikidba Rey-Ciro-ogwichisad, an ega igarmar nudakoed. Ciro anga an-neggwebur gannar urboed, an-dulamar-gales-bukwad anga onogoed. Ciro, an-dulamar-onogoedi, manigi-baklegar onogosulid. Ani an Bab-Jehová-Bela-Gangued-Nikad deyob soged.”
14Weyob Bab-Jehová soged: “Egipto-e-ibmar-nuegan, degi, Etiopía-e-ibmar-nuegan, begadga gumaloed. Sabeo-dule-burwisurmaladi, be-sorba esgoro-dubgi ebipilemai gumaloed. Bemar-asabinni yokorgi-sindigar bukumaloed, ise-wilesakwaa bemarga sogdamaloed: ‘Unnila Bab-Dummad wargwenna-mai, Bab-Dummad-baid suli. We-Bab-Dummadi, bemarba naid.’ ”
15Bab-Dummad, be, Israel-dulemar-Abonogedid, be Bab-Dummad-akudaklegedid.
16Bela dulemar ibmar-bab-dummadyob-imaklemalad-sobmaladi, bingedar-itoge gumaloed, degi, san-bipii gumaloed. Bela bular na san-bipi gumaloed.
17Israel-dulemar Bab-Jehováʼgi-nue-bendaklesmalad, bendakles sadegumaloed. Bali-bipisaale, bingedar-itogosurmalad, bali-san-bipi imaklegosurmalad.
18Ar ade, weyob Bab-Jehová soged: “Ani an Bab-Jehová gued, Bab-Dummad-baid sulid. Ani an mogir-billi-obinnisadid. Ani an napneg-nasiksadid. Ani an napneg-ilemakar nasiksadid, binsa-ollobi-nasikega an imaksasulid, dulemar egi ambikuega an imaksad.
19Gwen an bemarga we-napneg-naidgi negsichidgi-dukuar an sunmaksasulid. Degi, gwen an Jacob-waganga weyob sogsasulid: ‘Neg-olloledgi be an-amimalo.’ Ani an Bab-Jehová-guedgi igar-napiragwadbi an soged, degi, an igar-innikigwadbi soged.”
20Bab-Jehová sogbalid: “Dule-yar-baid-baidginmalad bemar-wakindimalad be atomar, be anse dagmar. Akusunna-ibmar-itomaladi, ibmar-sobarmalad-bab-dummadyob-imakleged sedimalad. Degine, bab-dummagan-gwen-e-abonogosulidse gordimalad.
21Be sunmakmar, ibmar-imaksad be sogmar, na be muchub-muchub egisnanai be samalo. ¿Doa bato dikasurgus iduakwaa we sogsa? ¿Doa epenne bato we-ibmar sogsa? ¿Ar ade, ani an Bab-Jehová we-ibmar sogsasursi? Baid Bab-Dummad sulid. Ani an Bab-Dummad-Innikidaedid. Ani an Dule-Abonogedid. Baid Bab-Dummad sated.
22”Bela napneg-ugakagi-bukmalad be abonolemalagala, anse be gannar dagmar. Ar ade, ani an Bab-Dummadid, Bab-Dummad-baid sated.
23An-nuggi an ise-sogar-imaksad, an napiragwadba ibmar-sogsad, ibmar gusuli-guosulid guedsegad. Bela-dulemar an-asabin yokorgi-sindigar sigmaloed, bela-dulemar anga ise-sogar imakmaloed.
24”Wemar angi sogmaloed: ‘Unnila Bab-Jehováʼgi igar-innikigwad danikid, degi, gargangued eginbi danibalid.’ ” Dulemar isdar Bab-Dummad-daksamaladi, Bab-Dummad-asabin nonimaloed, bingedar itomaloed.
25Bela Israel-e-wagan bendaklegoed, degi, bela Bab-Jehová-nuggi gannarba gumaloed.
