Isaías 41

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Bab-Dummad weyob soged: “Neggwebur-demar-gakaba-bukmalad, bogi an-abin ambikumalo. Dulemar-yar-baid-baidgi-bukmalad, gandik be imakmar. Walikaa be dagmar, be sunmakmar. Anmar igar-nabogega ambikumar.

²”¿Doa dad-nakwedsik, dule-gusgu-emargi-obinmaid wese-dagega imaksa? ¿Doa we-dulega dulemar-yar-baid-baidgi-bukmalad urmaksa? ¿Doa reymar-seega imaksa? ¿Doa ukub-milegeyobi es-suidgi dulemar-obelogega imaksa? ¿Doa e-warsi-abin-ibmar-durgan-mileddaedyob dulemar-imaksa?

³Gwen nanadisulid-igarba, binnasuli dule-balegindanikid.

⁴¿Doa weyob imaksa? ¿Doa nabir we-ibmar bursuli-guega imaksa? ¿Doa gebesailaunni dulamar-ainakwedanikidse gocha? Ani an Bab-Jehová guedi, bela we-ibmarmar imaksad. Ani an gebesailaginedid, ani an berguedse gudii gubaloed.

⁵”Neggwebur-demar-gakaba-bukmaladi, dani-daksamalad, dobe-itodmalad. Napneg-naid-ugakaase abin giglimakded. Bato egi danimalad, bato walikgusmalad.

⁶Muchub-muchub e-aimar-bendakdemalad, muchub-muchub burba-ogannodmalad.

⁷Dule-ibmar-sobedi, dule-orgi-arbaed ogannoged. Dule-mardogi-ibmar-sobedi, dule-esgorogi-arbaed-ogannoged, ega weyob soged: ‘Arbaed-nued be imaksa.’ Geb sorba, ibmar-sobaled-bab-dummadyob-imakleged nue-esgorogi bioked, adi, melle ege-ege gwisguegar.”

⁸Bab-Jehová sogdebalid: “Israel, bedi an-maiga gued. Be, Jacob-wagan, an bemar-susadid, An-ai-Abraham-wagan be gumalad.

⁹Ar napneg-naid-ugakaase an be-susad, nega-sukungan-dikasulidba an bese gochad. An bega sogsad: ‘Be an-maiga gued.’ Ani an be-susad, an be-obachasulid.

¹⁰Melle be gwayo. An beba gudiguad. Melle be suli-suli-itogo. Ani an be-Bab-Dummadid. An be-ogannogoed, an be-bendakoed, an-sakwa-gandikid-nuedsikidgi an be-ganikioed.

¹¹”Dule-isdar-be-dakmaladi, bingegudmaloed, nug-mesagwar gudmaloed. Dule-begi-gwisgudimaladi, bela bergudoed, gudisurmaladyobi naoed.

¹²Be be-isdarmalad-amidiguo-inigwele, gwen be amiosulid. Bebo-bila-onomaladi, bela bergudoed, gudisurmaladyobi naoed.

¹³Ar ani an be-Bab-Dummad-Jehová gued. An be-argan-nuedsikid-ganikidid. Ani an bega soged: ‘Melle be gwayo, ani an be-bendakoed.’ ”

¹⁴Bab-Jehová soged: “Bemar-Israel-dulemar ichee-gue-inigwele, melle be gwayemalo. Bemar-Jacob-wagan-gandik-gusur-inigwele, melle be gwayemalo. Ar an-sunnagwad an be-bendakoed. Ani an Israel-dulemar-e-Bab-Dummad-Isligwaled gued. Ar an be-Bendakedid.

¹⁵”Ibmar-gwag-egwaed-binidyobi an be-imakmaloed, e-nugar-abinbela-datarmakar-nikayobi an be-imakmaloed. Yarmar be obelogoed, swana be imakoed. Yar-mullugana gaganbi naguega be imakoed.

¹⁶Oros-gwag-burwaba-mileddaedyobi be imakoed. Burwa-noedba aisakidmaloed. Ar bedi, angi weligwar itogoed. Bedi, angi Israel-dulemar-e-Bab-Dummad-Isligwaledgi nug-gannarba itomaloed.”

¹⁷Bab-Dummad sogdebalid: “Dule-wilemalad, degi, dule-ibmar-abesa-gudimalad, gobega dii amididamalad, degi-inigwele, amidasurmalad. Uku-uku-itogedba gwabin-dinna itogusdamalad. Degi-inigwele, ani Bab-Jehová-guedgi an amar-itogoed. Ani an Israel-dulemar-e-Bab-Dummad-guedgi, an amar walagwen metosulid.

¹⁸Yalamar-biribali, diwarmar-iirmakega an imakoed, nebaganba ibemargi-dii-aryogega an imakoed, nega-dulesulidganba dii-ambikuega an imakoed. Neg-dinnaganba ibemar-aryomai an imakoed.

¹⁹Nega-dulesulidganbali, urwarmar, acacia-sapimar, an digoed. Baryawarmar, degine, olivo-sapimar an digoed. Napa-isganagi, ciprés-sapimar an digoed, pino-warmar, degi, abeto-sapimar an digoed.

²⁰Adi, dulemar dakega, degi, wisgumalaga, egi binsamalaga, degi, magar-itomalagar, Bab-Jehová we-ibmarmar-imaksaye, Israel-dulemar-e-Bab-Dummad-Isligwaledi, we-ibmarmar obinnisye.”

²¹Bab-Jehová Jacob-dulemar-e-Rey, ibmar-sobaled-bab-dummadyobi-imaklemaladga sogded: “Be-igar be sogmardo. E-wilubmar be oyomardo.

²²Wese be dagmar, ibmar-guoed be sogmar. Gebesailagi ibmarmar-gusnanaedi, anmarga be soge, anmar egi binsaegar, degi, ibmar-gusadi, anmar magar-itomalagar. Igi-neg-guoe anmarga be sogmar.

²³Yoedse-negguoed be anmarga sogmar, adi, anmar wisgumalagar, bemar bab-dummagan gumarye. Bemar ibmar imakmala, nueddibe, ichakwadibe, adi, anmar dakega, degi, anmar ese gwayegar.

²⁴Ar bemar binsarmaladid, ar be-ibmar-imakmaladi, binsa ibmar-imaklemaladid. Ar dule-begi-bensurmaladga ibmar-nuedga be gusurmalad.”

²⁵Bab-Dummad sogdebalid: “Dad-nakwed-argan-sapiledsik, dule-gwensak-dagega an imaksad. An-ese-gochad, an-itosad. We-dule, dad-nakwedsik an-nug odummogoed. We-dule, dule-dummagan-negsemamaid-birgi dule-napsa-sobed-napsagi-dii-dii-annanaiyob imakoed.

²⁶¿Ar doa we-ibmar-guoed gebesailaunni anmar-owisosa? ¿Ar doa abgayala we-ibmar-guoed anmar-owisosa? Adi, anmar sogega, eye, nabir sogye. Ar dule gwen we-ibmar-guoed sogsasulid, dule gwen owisossurbalid. Dule-we-ibmar-guoed-soged, gwen dule itossurbalid.

²⁷Ar ani an abgasaila Sión-dulemarga bato an sogsad: ‘Be dakmarye, bato wegi bukmarye.’ Ani an Jerusalén-neggweburse dule-gayaburba-berbeged-nued barmisad.

²⁸An-dikarbali an atakded, dule gwen an daksulid. Emar-imbagi dule-ega-binsaed-daked gwen an daksulid. An ibmar-ese-egichidgu, gwen an-abinsassurmalad.

²⁹Ar bela we-bab-dummagan-baigana binsa-ibmar-imaklemaladyobi gued. E-ibmar-imakmaladi, gwen nabirsulid. E-ibmar-sobarmalad-bab-dummadyob-imaklemaladi, unnila uka-olloo daklemaladid. Binsa-ibmar-daklemalad gued.”