Isaías 47

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Bab-Jehová sogbalid: “Babilonia-yala yagwa-yoo-sui-nikuedyobi be guedi, be aidege, napagi be sige. Caldea-dulemar-e-sisgwayobi be guedi, napagi be sige, ar be-ologana bergusad. Bar bese ome-nued-dakleye gorlegosulid, degi, ome-bakagwaledye gorlegosulid.

²Obnaged-akwa be sue, ibmar-gwag egi be nage. Muswe be unge, sabure-bayaa be sae, dua swiri be imake, diwargi be obake.

³Be-uka-swiligwadi bela daklegoed, bela be-abganse-bakale, daklegoed. Be dummad-bingeguoed. An buged be-imakoed. Bela dulemar isgusadbi an dakoed, an ega e-isgued gwen eliosulid.”

⁴Anmar-Bendakedi, Israel-dulemar-e-Bab-Dummad-Isligwaledid. Bab-Jehová-Bela-Gangued-Nikadye nugad.

⁵Bab-Dummad weyob soged: “Caldea-dulemar-sisgwa bogi be sige. Neg-gubyagwaled-yaba be doge. Ar dule bar be-biosulid: ‘Rey-bundor yar-baid-baid-nanaid semaidye.’

⁶An-dulamala an-oulus gusad. A-ulale, a-dulemar an obachagusad. Be-argan-yaurgi an uksagusad. Degi-inigwele, gwen be wiledaksasulid. Dule-sergangala arbaed-dummad be uksagusad.

⁷Weyob be sogsa gusad: ‘¡Gusgu bela yar-semaigu an guoye!’ Degi-inigwele, gwen be binsassulid, an berguodeeye, gwen weyob-guodeeye be binsassulid.

⁸”Emigindi, Rey-bundor-ibmarbina-surbinsa-itoged, be nue-itogo: Emide, na be nued-gudii itoged, na be dukin-weyob sogdiid: ‘Anbi an weyob guye, dule-baid anyobid surye. Bipisaale, an gwen machered-sate guosurye, an gwen mimmigansuli guosurbarye.’

⁹Ar ibagwennaa ukiarmakale, ibmar-sogbobela bega guoed: Mimmigansuli be gunonikoed, degi, machered-sate be gunonikoed. Ar be bukidar ina-isgana-imako-inigwele, degi, bela ibmar-burbamar be oyogo-inigwele, we-ibmar be-bendakosulid.

¹⁰Ar be be-ibmar-isgana-imakedgi be bengussulid. Ar be sogsagusad: ‘We-ibmar-isgana-imakedgi dule an-dakdisuli.’ Be-binsaed-nikadaedi, be-ibmar-wisidaedi, dukin be-yardaksad. Ulubgine na be weyob sogsad: ‘Anbi an weyob guye, dule-baid anyobid surye.’

¹¹Begine, boni-dummad nonikoed, mer begi-yolegega be imakoenad, degi-inigwele, we-boni begi yolegedsegad. Begine, boni-dummad-nagunonikoed, gwen be gaosulid. Boni-dummad begi danikoye gwen be binsadisulidgi, ukiarmakale begi gwisgunonikoed.

¹²”Ibmar-burbamar-wisid-oyogedgi be alamakdii gudo. Ina-isgana-imakedgi be alamakdii gudo. Ar nuchukwagwad-akale, egi be arbadiid. Abakar wis be-ibmar be-bendakalile, abakar wis be nabir bonigan-ogwayealile.

¹³Bukidar-bega-binsaed-uklesadba, be budar-itogusad. Emisgi, dule-niisgwaba-bega-ibmar-dakar-sogmalad dagmarsun: We-dulemar mogirmargi-ibmar-nanaidba-nergumaladid, niisgwa-dakedba-ibmar-sogmaladid, degi, nii-irba iduakwaa-ibmar-guoed-sogmaladid. We-dulemar boni-dummagan begi-danikoedgi be-bendakmarsun.

¹⁴Be-dake, we-dulemar gagan-durganyob-gumalad, bela soo obelogoed. Na-dukin soo-gwabunyedgi san-onogosurmalad. Ar we-soo, neg-uee-imakedyobsulid, geg be walik siged. Geg be we-soo-asabin siged.

¹⁵Weyob dulemar-bebo-alamakdigusad gumaloed. Ar be nuchukwagwad-akale, bebo-ina-isganagi-arbasmalad weyob gumaloed. Na wala-walagwen e-itolegedba nademaloed, ar dule-wargwensaale be-bendakosulid.”