Isaías 60

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Bab-Jehová soged: “¡Jerusalén-dulemar, be gwichigu! ¡Bela ibegwale be gumar! ¡Be-neg-ibegwaledi bese warmaknonikid! Ani Bab-Jehová-gued. An-gangued-yeerdaklegedi begi ibegwar naid.

²Be dake, neg-gubyagwaledi napneg-gasanaid. Degi, negsichidi, dulemargi naid. Degi-inigwele, an-ibegwaledi begi mee-gaoed. ¡Begine, an-gangued-yeerdaklegedi oyolegoed!

³Dule-yar-baid-baidgi-bukmaladi, be-neg-meegwadba gudii gumaloed, degi, reymar be-neg-ibegwaledba nanadii gumaloed.

⁴”Nue be atake, be-dikarba be nue neg-dake: Bela danar-ambikusmalad, bese danimalad. Be-mimmigana dikasuli bese danimaloed. Be-bunamala argangi-annikaa nidanimaloed.

⁵Weyob be dakoed, degi, weligwaledba be yeer itodoed, ise-weligwaledba be-gwage dik-dik naguoed. Degi, be-gwage ise-yeer itonaoed. Ar begala neggwebur-demar-gakagi-bukmalad-e-ibmar-nuegan senonimaloed. Degi, dulemar-yar-baid-baidgi-bukmalad-e-ibmar-nuegan bese warmaknonikoed.

⁶Be-walik moli-yargan-muremalad engudoed. Madián-dulemar-e-moli-yargan-muremalad, Efa-dulemar-moli-yargan-muremalad engudoed. Bela Sabá-neggweburginmaladi bese nonimaloed, bega ina-wawagana, degi, ormar senonimaloed. Degine, an-nug-odummogagwale danimaloed.

⁷Bega, Cedar-neggwebur-e-sibad-wawaadmar ambikunonikoed. Degi, Nebaiot-neggwebur-e-sibad-wawaad-machergan bega ibnuedga guoed. Adi, an-ailagi anga ibmar-nued-uklegedga guegar. Degi, ani an, an-nug-odummoleged-neg yeerdaklege an imakoed.

⁸”Mogiryob-nasdamalad, ¿wede doamala? Nuu-sibuyob e-uuse nadapdamalad, ¿wede doamala?

⁹Neggwebur-demar-gakaba-bukmaladi angi benguosurmalad. Tarsis-ur-dummagan, ur-dummagan-idudanikid. We-urmar, dikasuli be-mimmigan-sedanikid, degi, e-ormar, e-manimar sedanikid, adi, an-nug-odummolegegar. Ar ani an Israel-dulemar-e-Bab-Dummad-Isligwaledid, ar ani an gandikidga be-imaksad.

¹⁰”Dule-ainebarmalad bega gannar galu-matusurmalad soboed, degi, e-reymar bega arbamaloed. An-urwedgi an sabsur-be-odurdaksa-inigwele, an-sabguedgi an ise-wile be-dakoed.

¹¹Be-yawagak argasigu guoed, mutikidbali, degi, ibginedbali gwen atiosulid. Bega dulemar-yar-baid-baidgi-bukmalad-e-ibmar-nuegan seledanikoed, e-reymar bese ilekwaa seledanikoed.

¹²Dulemar-yar-baid-baidgi-bukmaladi, degi, yalamar-nanaidi, beba ibmar-imaksulile, bela obelolegoed.

¹³”Líbano-yala-e-ibmar-nuegan-nikadi, bese warmakoed, ciprés-sapi-warmar, baryawarmar, degi, abeto-sapi-warmar bese warmakoed. Adi, an-neg-islidikid yeerdakle imakega, an-mali-onakwed-gana-neg-siid-e-nug ogannogegar.

¹⁴Dulemar-mesagwar-be-imakmalad-e-mimmigan, bese dulluu-ambikunonimaloed. Bela dulemar isdar-be-dakmaladi, be-asabin sindigar-signonimaloed, degi, weyob be-bimaloed, ‘Bab-Jehová-neggweburye, Sión-yala, Israel-dulamar-e-Bab-Dummad-Isligwaledgadye.’

¹⁵”Be walagwen-melledgus-inigwele, degi, be isdardakles-inigwele, dule gwen be-igarba nanassur-inigwele, degisadegu nug-dummarba-guega an be-imakoed, degi, dulemar weligwar be-imakega an imakoed.

¹⁶Dule-yar-baid-baidgi-bukmalad-e-mas be gunnoed, reymar-e-ibmar-nuegan bega uklegoed. Degisoggu, na be wisguoed, ani an Bab-Jehová be-Abonogedid. Ani an Jacob-wagan-e-Bab-Dummad-gandikid be-bendakedid.

¹⁷”Esgoro-gordikid-muchubbi an bega olo sedagoed, esgoro-muchubbi an bega mani sedagoed. Urgo-muchubbi an bega esgoro-gordikid sedagoed, degi, akwamar-muchubbi an bega esgoro sedagoed. Neg-bogidikid-naguega an imakoed. Degi, igar-innikigwadi negseega an imakoed.

¹⁸Bipisaale bar be-yargi sabsur-imaklegedi, be itogosulid. Bar be-yalagi neg-bibichedgi, degi, neg-obelogedgi sunmaklegosulid. Ar ade, weyob be-galu-matusurmaladgi soglegoed: ‘Abonolegedye.’ Degi, be-yawagakmardi weyob bimarbaloed: ‘Bab-Dummad-nuggi-namaklegedye.’

¹⁹Bar dad-ibeler bega neg-ibgi, neg-meegwadga guosulid, degi, nii bar bega mee gaosurbalid. Ar Bab-Jehová bega gwallu-meegwad-degisadeguadga guoed. Be-Bab-Dummad be-gangued-yeerdaklegedga guoed.

²⁰Dad-ibeler bar bega argwanosulid, degi, nii-gaedi gwen mommolegosurbalid. Ar ani Bab-Jehová be-gwallu-meegwadga degisadegu guoed. Geb agi be-wile-itodiidi bergunonikoed.

²¹”Degisoggu, bela innikigwadga be-dulemar guoed, degi, bela be-dulemar napneg gaoed. Sapi-ainiedyob ainidamaloed. Ani an deyob imakoed. An-sunnagwad an imakoed, an-nug odummolegoed.

²²Dula-ichegwadi bur miliba (1,000) mergudoed, bur-neggwebur-bipigwadi, neggwebur-gandikidga guoed. Ani an Bab-Jehová gued. We-ibmarmar-guoed-e-ibagan warmaknonikile, gwae-gwae-guega an imakoed.”