1Bab-Jehová soged: “Dule-an-egisdisurmaladse an magarosad, an doa-dule gue. Dule-an-amidisurmalad an-amiega an imaksad. Dule-baigan-an-nug-odummodisurmaladga, an sogsad, wegi an gwichiye.
2Dule-uayasulidamaladse, igar-isganaba-nadapmaladse, e-binsaedba-nanadimaladse, bane-bane, an-argan an oyomai gusanad.
3We-dulemar, bali-bali an-ourwega an-imakmalad. Dutugalumargine, bab-dummadyob-ibmar-imaklemaladga ibmar ukmalad. Ibmar-ogumakar-ukleged-ailamargi, ina-wawadikmalad ogumakmalad.
4We-dulemar, neg-uangi sigmalad, mutikidbali, dukuar oibosii damalad. Sin-san gundamalad, e-esmedmargi ibmar-nis-isgana dudamalad.
5We-dulemar sogmalad: ‘¡Be anmargi bannabagudii samalo! ¡Melle be anmarse walikaa gumalo!’ An bemarba bela-bela dule-islidikid gued. ”We-dulemar, waayobi gwen-nabir-ito an-asu-imaksulid, bane-bane soo-duurmaksiiyob gued.
6An-asabin bela e-ibmar-imaked narmakar naid, an sunmaksuli guosulid. An sabsur-odurdakoed, na nunmak itomaloed.”
7Bab-Jehová soged: “Bemar-isgued-ulale, degi, be-babgan isgusad-ulale, an sabsur-be-odurdakoed. Ar we-dulemar yar-birgi ina-wawadikmalad-ogumakdii gusmalad, yar-mullugangi angi-gwisgudii gusmalad. Epenne e-ibmar imaksamaladba, na dukin sabsur-odurdaklemalaga an imakoed.”
8Bab-Jehová weyob soged: “Dule-wargwen uva-san-dukgwen-nued-amisale, sogdaed: ‘An oichogosurye, ar ade, amba nis nikaye.’ Deyopira, an an-maimar-sabed-ulale, belamakale, an-maimar an obelogosulid.
9Jacob waganmar-nikuega an imakoed, Judáʼgi, dulemar-an-yarmar-gamaloedi, an onidagoed. Anse-sulegarmaladi we-napaneg gamaloed, a-napagine, an-maimar megmaloed.
10An-dulamar-an-amidimaladga, Sarón-neba sibad-wawaad-galuga guoed, Acor-neba-naidi, moli-bebe-nikamalad-galuga guoed.
11”Ar bemar angi-banguddamaladdi, bemar an-yala-islidikid-ieddamaladdi, es-suidgi-oburgwilegega an be-imakmaloed. Bemar bab-dummad-ibmar-bukidar-ukedgala, degine, bab-dummad-deyob-guoye-sogmaidgala, guagwar mas, degi, vino ukdamaladdi,
12es-suidgi-oburgwilegega an be-imakbaloed. Bela bemar dukar-egwallegega sindigar sigmaloed. Ar an bemarse gochamalanad, bemardi gwen an-abin-imaksasurmalad. An bemarga sunmaksanad, bemardi, gwen an-itossurmalad. Aka bur an-asabin ibmar-isgana imaksamalad, degi, an-ibmar-abesulidi bemar imaksabalid.”
13A-ulale, Bab-Jehová-Bur-Gangued-Nikad weyob soged: “An-maimar mas-gunmaloed, bemardi, ukudmaad gudigumaloed. An-maimar gobed-nika gudimaloed, bemardi, gobedsuli gudigumaloed. An-maimardi, weligwar-itodii gumaloed, bemardi, bingedar-itodii gumaloed.
14An-maimar weligwaledgi namakmaloed, bemardi, suli-suli-itogedgi binnasuli gormaloed, nue wiles-itogedba akiginmaloed.
15Anse-sulegarmaladi, emar-ukabsamalaga bemar-nug ebumaloed. Ani Bab-Dummad-Jehová-Bur-Birigined bemar-oburgoed, ar an-maimargardi, nug-baid an ukoed.
16Dule, neggweburgi ise-nued-binsaleged egichialile, an-innikigwad-gued-nuggi egisoed. Dule, neggweburgi ise-sogar-ibmar-imakalile, an-innikigwad-gued-nuggi imakoed. Suli-suli-itolesadi, bela ielesad, an-asabin an bela elisad.”
17Bab-Jehová weyob soged: “Nue an-itomalo. An nibneg-binid, napneg-binid, an obinyesokalid. Ibmar-nasmalad bar obarilegosulid, bar egi binsalegosurbalid.
18An-ibmar-obinyesokalidba bur be weligwar-itomala, degisadegu be yeer-itomala. An Jerusalén-neggweburga yeer-itoged nasiksokalid, an e-dulemarga weligwar-itoged uksokalid.
19An Jerusalén-neggweburba, weligwar itogoed, an-dulamarbo an yeer itogoed. Jerusalénʼgi bar boed itolegosulid, deginbali, suli-suli-itogedba-gormaked bar itolegosurbalid.
20”Jerusalénʼgi mimmigan gwalulesale, bipigwadgi bar burgosurmalad, deginbali, dadormar bar sapingwaa burgosulid, selebaa megmaloed. Ar dule birga-dulatar-nika (100) burgwele, amba nuchukwaa burgwisye soglegoed. Ar dule birga-dulatarse (100) warmaksasulirdi, dule-isganaye egi soglegoed.
21An-dulamar, negmar sobmaloed, egi megmaloed. Uva-dubmar digmaloed, e-san gunmaloed.
22Dule-baid-megega neg bar sobosurmalad. Deginbali, dule-bamalad uva-san-gunnega, uva-dubmar bar digosurmarbalid. Ar an-dulamar-e-ibagan, sapimar-ibaganyob guoed. Anse-sulegarmaladi, na e-ibmar-imakmaladgi yeer itomaloed.
23Binsarsunna arbanai guosurmalad, deginbali, mimmigan-wiogega, mimmigan nikuosurmalad. An-dulamar na e-sunnagwad, degi, e-waganmoga, Bab-Jehová egi ise-nued-binsasad-dulemarga guoed.
24Anse-goled-iduale, ani an abinsaoed. Amba sunmaknanaidgine, bato an itogoed.
25Achu-sapur, sibad-wawaad-senigwadbo mas-gundii gumaloed. Achumigur-nono-wawaad, moli-bebe-nikad-alugwasualedyob gagan-madii guoed, degi, naibe unnila ukub-burubi madii guoed. Bela an-yar-islidikidgine, dule, dule-baid-onailiksadii guosulid, degi, ibmar-obelodii guosurbalid. Ani an Bab-Jehová-guedi deyob soged.”
