1Jacob-wagan, we-igar-an-bega-sogoedi, nue be itomalo. Judá-wagan Israel-dulemarye-biledimalad, nue an-itomalo. Bemar Bab-Jehová-nuggi be ise-sogar-ibmar-sogdimaladi, Israel-e-Bab-Dummadse be gordimaladi, napiragwadgi be imakdisurmalad. Igar-innikigwadgi be imakdisurmalad.
2Bemar neggwebur-islidikidginmaladye na be sogdimalad, degine, Israel-e-Bab-Dummadgi-bensurmalad, Bab-Dummad-Bela-Gangued-Nikadye-nugadgi be bensurmalad, nue be itomalo.
3Bab-Dummad weyob soged: “Ibmar-gusmaladi, bato an dikasurgus egi an sunmaksad. Yoo-ibmar-guoed-iduale, bato an egi iduakwaa sunmaksad. An-sunnagwad dulemarga an oyosad. Ukiarmakale, an imaksad. Bela deyob gunonikid.
4Ar ade, bato an wisid, bede nue gwage-dutusulid, be-dukar-war esgoro-gannaregedyobid, be-bebe-gar esgoro-gordikidyobid.
5A-ulale, an bega dikasurgus we-ibmar sogsad. Iduakwaa we-ibmar-guoed an bega oyosad, adi, melle be sogegar: ‘An-ibmar-bab-dummadyob-sobaled, we-ibmar imaksaye. An-ibmar-wilub-sobaled, degi, an-suar-sobaled we-ibmar-guoed sogsaye.’
6Bela we-ibmarmar-gusad be itosad, bela be daksad. Degite, ¿bemar we-ibmarmar-gusad sogosursi? ”Emisgi, an ibmar-binigan bemarga an sogoed. Be-idu ibmar-dukuar-mamaidi, akudaklemaladi, an bemarga sogoed.
7We-ibmarmar emiskwaa imaklesmaladid, dikasurgus imaklesurmaladid. Emi-ibagine, amba egi-sunmakleged be itodisulid, adi, melle be sogegar: ‘Eye, dika bato an wisbinye.’
8Bipisaale, gwen we-ibmar be itodisulid, gwen be wissurbalid. We-ibmar gwen be iduar itodisulid, gwen bega iduar be-uaya, magasar-itogega argassulid. Ar an nue be-wisid, be emar-yardakmaladid, be gwalulesad-akale, uayasulidaedye be-bimalad.
9”An, an-nug-sabed-ulale, an-urwed an bargaed. An-nug-odummoleged-ulale, an na san-bargaed, adi, melle be-obelogegar.
10¡Be dakena! An swilidik be-imaksad. Degi-inigwele, mani-swilidik-imaklegedyob an be-imaksasulid, sabsur-wile-itolegedgi an be-wilubdaksad.
11An we-ibmar-imaksadi, an-ulale an imaksad, an na dukin-sabed-ulale, an deyob imaksad. ¿Sunna an-nug obanagwar-imakmalaga an imakosi? Suli. An-nug-odummolegedi, dule-baidgadga an ukosulid.”
12Bab-Jehová weyob sogbalid: “Jacob-wagan, be an-itoge, Israel-wagan, ani an bese gochad. Ani an Bab-Dummadid. Ani an gebesailaginedid, anse bergunaibalid.
13An-argangine, napneg an nasiksad, an-argan-nuedsiki, mogir-billi an egasad. Ani an e-nugba ese gochagu, bela nagunonikid.
14”Bela bemar ambikumar, be an-itomar: ¿Doa we-ibmar-guoed iduakwaa sogsa? Ani Bab-Jehová, an dule-gwensak-susad Babilonia-yalagi an-ibmar-imakbied imakoed, Caldea-dulemargi gwichiguoed.
15Ani an we-ibmarmar sogsad. Unnila ani an we-dulese gochad. Dagega, an imakoed, e-ibmar-imakoedgi emargi obinoed.
16”Anse be walikgudamar, an ibmar-sogoedi, nue itomalo: Gebesailaunni an gwen dukuar sunmaksasulid, ibmarmar gualile, bato an gunaidaed.” Emide, Bab-Jehová-Bela-Gangued-Nikad, E-Burba-gandikidba an-barmialid.
17Weyobi Bab-Jehová be-Bendakedi, degi, Israel-dulemar-e-Bab-Dummad-Isligwaled, soged: “Ani an Bab-Jehová gued, bemar-Bab-Dummadid. Ibmar-nueganba be-odurdakedid, ibu-igarba be nanaoe, a-igarba be-iduedid.
18An-igarmar-mamaidba be uaya-nika gudigusana, diwar-aryomadaedyobi ulubgi bogidikid be nikuoenad, demar-mullumakmadaedyobi be baisur-itodii guoenad.
19Be-wagan ukub-naidyob-mergu guoenad, be-mimmigan ukub-merguedyob-mergu guoenad. E-nuga gwen-alliosulinad, an-asabinni, gwen weyob guosulinad.”
20¡Babilonia-yalagi be ainimar! ¡Caldea-dulemargi be wakinmar! Bemar Babilonia-yalagi-noedgi binnasuli weligwaledba be we-igargi sunmakmalo. We-ibmar dulemar-wisguega be imakmalo, bela yala-naid-ugakaase gayaburba be mimimalo. Weyob be sogmalo: “Bab-Jehová, e-mai-Jacob-wagan bendaksaye.”
21Nega-dulesulidganba-seargua, gwen ukud mechasurmalad. Bab-Jehová emargala, akwasailagi dii-aryogega imaksad. Akwa-marisgusadgi dii-binnasur ega aryogega imaksad.
22Bab-Jehová soged: “Dule-isganagardi gwage-bogidikid sateye.”
