Isaías 13

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Bab-Dummad Amoz-machi-Isaíasʼga Babilonia-dulemar-berguoedgi sunmaksad:

²Yala-swire-naidgi bander be mer-mer imakmar, sorda-bila-onomaladse be binnasuli gormar. Argan ese be oyomar, adi, dule-nuga-nikamalad-yawagakba ubomalagar.

³Anga-nug-salegarmaladga bato an igar-uksad. Anga-dule-bulegan-gumaladi, an-nakwedgi-na-yeer-itodimaladi, an guakwaa urbisad, adi, anga sabsur-dulemar-odurdakegar.

⁴¡Be itomar! Yalaganba neg-oimake itoleged, dulemar-ichesur-oimakedyob itoleged. ¡Be itomar! Neggwebur-dummagan-atosmalad-oimaked, be itomar, mala-gollomakedyob e-oimaked itoleged. Bab-Jehová-Bela-Gangued-Nikad, bila-onogega, sorda-bila-onomalad-guagwar urbenaid.

⁵Neggwebur-dikasulidba danimalad, yarmar-bergunaid-akale danimalad. Bab-Jehová, e-urwedba-ibmar-ebulemalad sedanikid, adi, bela napneg obelogegar.

⁶¡Be bomarsun! Bab-Jehová-urwemaid-iba omosad, Bab-Dummad-Bela-Gangued-Nikad bemar sabsur-odurdakoed-e-iba danikid.

⁷A-ulale, bela argan nollomakdoed, bela dulemar niga-argwatemaloed.

⁸Bela-belad dobe-itodmaloed, suli-suli-itomaloed, nunmaked-dummadi egi nagudmaloed. Igi-sior-muu-neggi-ugakgunair nunmaked-itodae, deyobi, egi nunmaked nagunonikoed. Dukin-dukin geger na dakdemaloed, e-wagarmar-daklegoedi, bela-bela dobed-nika daklemaloed.

⁹¡Be dakmar! Bab-Jehová-urwed-e-iba danikid: Iba-buled dani, yeer-gangued-iba, bela-belad-urwed-iba dani, napneg ollobi daarmakar nasikoed, agine, bela dule-isgubukmalad obelogoed. Bab-Jehová soged:

¹⁰“Niisgwamar mogir-biriba-nanaidi bar gaosulid, niisgwamar-danar-danar nanaidi, bar ibegwar gaosulid. Dad-ibeler-noalile, sichii naguoed, bar nii ibegwar gaosulid.

¹¹Napneggi-dulemar-bukwad e-isgudiid-nukad an sabsur-odurdakoed, dule-isganamar e-ibmar-isgana-imakdiidba an sabsur-imakoed. Dule-na-san-dummarba-imakmaladi, na san-dummarba-imakega bar guosurmalad. Dule-bulegan-na-san-dummarba-imakmaladi, na san-dummarba-san-saega bar guosurmalad bela nug-bipi-gumalaga an imakoed.

¹²Dulemar, olo-sunsoged-icheguedba bur ichee-bukuega an imakoed. Dulemar, Ofir-or-nued-icheguedba ichee-bukuega an imakoed.

¹³A-ulale, ani Bab-Jehová-Bela-Gangued-Nikad, an-urwemaid-ibagangi an-urwedba nibneg giglimakega an imakoed. Napneg e-naidgi ainirega an imakoed.

¹⁴Dulemar igi-goe-sapur balegillemaidae, deyob, balegillegoed, e-neggweburse duurmakdemaloed. Igi-sibad-wawaad e-idugedsuli duurmakmadaedyobi gumaloed, wala-walagwen e-yarse wakitemaloed.

¹⁵Doa-dule galenonikile, ewarar oburgwilegoed, dule yogasaar-galesale, es-suidgi oburgwilegoed.

¹⁶Dulemar-wagaba e-mimmigan omukudmaloed, e-negmar-ibe ibmarmar atursadmaloed, e-omegan e-ibe gagadmaloed.

¹⁷Babilonia-dulemargi Media-dulemar gwichiguega an imakoed. We-dulemar mani bai dakdasurmalad, orgi gwen weligwar itodasurmalad.

¹⁸E-sigugi ese sapingana, yagana, oburgwilegoed, goe-gwarugana gwen wile dakosurmalad, burwigana gwen bai dakosurmalad.

¹⁹Babilonia-neggwebur, be yeerdakleged, gandikidba be yeer-dakleged, Caldea-dulemarga be san-dummarbaa gusiid. Emidi, Sodoma-neggweburyob be guoed, Gomorra-neggweburyob be guoed. Ani an Bab-Dummad gued. Igi an we-neggweburmar obelosa, deyob an be-imakmaloed.

²⁰Bipisaale, bar dulemar egi ambikuosulid, dulemar-sorba-danimaloedi bar egi ambikuosurmalad. Árabe-dulemar we-yargi bar megosulid. Sibad-wawaad-edarbedi, bar egi e-sibad-wawaadmar oambikuosulid.

²¹Unnila nega-dulesulidganba ibmar-durgan-ursilimaladbi bukuoed. E-negmargine, irmonbi ena ambikuoed, nuu-dummad-malisuiganbi a-yargi ambikuoed, sibad-omegan-sapurbarmaladbi gudidioed.

²²E-neg-gandikmaladgi achu-sapurmarbi gordioed, e-reynegmargi achu-sapur-uaya-gannareged-bunnu-wawaadmarbi gordioed. Babilonia-neggwebur, Bab-Dummadse be sabsur-odurdakleged-igar omodanigusad, bar bega ibamar obannolegosulid.”