Isaías 57

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Dule-innikidaedi burgwemamaigusad, dule gwen bai daksurmalad, dule-bega-arbamalad-nuegan, burgwemamaigusad. Ar dule aku itodamalad, ibiga dule-nuegan isgued-ular burgwiddamala.

²Ar dule-igar-nuedba-nanaedi, nuedgi burgwemalad, neg-uangi obunnomegisdamalad.

³Bab-Jehová sogded: “Bemar, ome-ina-isgana-imaked-mimmigan, negsichigi-galagwensuli-gambanuchuganba-nanamalad-e-wagan, be anse walikgudamar.

⁴¿Doagi be dodoye sogmala? ¿Doaga be binnasur gaya-maa-maa-imake? ¿Doaga be gwabin buud-buud-imake? ¿Ar bemar isgued-mimmigansursi? ¿Ar bemar gakansamalad-wagansursi?

⁵Bemar wag-ulu-sapi-urba, degi, bela sapi-dummagan-urba, galagwensuli guddamalad. Bab-dummadsurmalad-e-nug-odummogega diangangi, degi, akwa-yaa-ollogangi burwigana be oburgwiddamalad.

⁶Dian-akwa-swirimalad, begadga gumaloed. We-akwa-swirigangi be bergudmaloed. We-ibmar-asabinni, vino be eosmalad, degi, ega be ibmar-gwag-uklemalad uksamalad. Degite, ande we-ibmarmar-abinni, ¿bogi sigode? ¡Adi surbali!

⁷Yar-matusulid-birigine, be-meged be omesisad, yar-matusulidse be nakwisad, agi bab-dummadsulidga ibmar-ogumakar-ukega be nakwisad.

⁸Be-yawagak-daksiki, degi, e-suarmargine, bab-dummadyob-imaklemalad be nasiksad. Be angi bangusad, dule-baid-asabinni uka-swili be gwisgusad. Be-meged-dummad-omesisadgine, be megisad. Doamarbo be megbigusa, amarbo be igar nabosad. Amarbo be megisgua, e-abgan be daksad.

⁹Bab-dummad-Molocʼse be nanasad. Ega be olivo-gwallu berbedii gusad, be-ina-wawagan ega be omelosad. Be be-nuggi-sunmakmalad dikasuli barmisad. Amala, dule-burgwarmalad-burbase binsaed-amiega, be barmisad.

¹⁰Bali-bali-nanaedba be yegus-inigwele, degite, gwen be sogsasulid: ‘An wesegoye.’ Aka bur be gangusad. A-ulale, gwen be galakussulid.

¹¹”¿Doa be-ogwayisa? ¿Doa dobguega be-imaksa? Emide, be an-yardakdiid. Gwen be angi bar binsassurmalad. Gwen bai be an-daksasurmalad. ¿Ar be an-dobsurmarsunde? ¿Ar an undar bogi-gudigusadba be deyob damarsunde?

¹²Emisgi, an be-ibmar-imakedi an barsogoed, gwen bega ibmar-nuedga guosulid.

¹³Ar dule-be-bendakega be binnasuli gollalile, we-ibmar-sobarmalad-bab-dummadyob-imaklemalad gwen be-bendakosulid. Bela we-ibmarmala burwaba seledoed, unnila buu-imakedgi yoggudoed. Ar dule angi-bensuli guele, napaneg egadga guoed, an-yala-islidikid na egadga suoed.”

¹⁴Bab-Jehová sogded: “Weyob sogdamaloed: ‘Igar-nudakmar, igar-nudakmar, igar-mesmar, an-dulamar-idu igar-isgana nudakmar.’

¹⁵Ar ade, ani an Bab-Dummad-degisadegu-maidid, an-nuga Isligwaledid, weyob an soged: Ani an niba-maid, neg-isligwaledgi an maid, degi, dulemar-bukib-binsadimaladgi, degi, gwage-eikwaa-imakmaladgi an burbar maibalid. Adi, dulemar-gwage-eikwaa-imakmaladga niga-ogannogegar, degi, dule-bukib-binsadimalad baisur-ito imakegar.

¹⁶An degisadegu an-dulamargi gwisgudii guosulid, degisadegu an amarse urwedii guosurbalid. Ar degisulile, bela an dulemar-obinnisadi an-abin bergudo-itole.

¹⁷Emar-isgued-ular, an ese ulusad. An-urwedgine, an sabsur-imaksad. An egi bangusgusad, degi-inigwele, aka igar-isganaba bur nanadmalad.

¹⁸E-damaladi, an daksad, degi-inigwele, an ega nudakoed. Idudii an guoed, baisur-itoge an imakoed. Degine, dule-ega-bukib-binsadimalad,

¹⁹weligwaledgi weyob namakmalaga an imakoed: ‘Dikasuli-bukmaladga gwage-bogidik gusun, degi, walikaa-bukmaladga gwage-bogidik gusun.’ An-dulamar an isgussulidyob-dakoed. Ani, an Bab-Jehová-guedgi, deyob soged.

²⁰Ar dule-ibmar-isgana-imakmaladi, demar-arwemaiyob gued, geg bogi meged. Igi demar-arwemair, ibmar-isgana mie, degi, ollimar-miardae, deyob dule-isganamar gued.

²¹An Bab-Dummadi soged: ‘Dule-isganamargala gwage-bogidikid sulid.’ ”