Isaías 66

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Bab-Jehová weyob soged: “Nibnega an-ologana gued, napneg an-nag-onakwed gued. ¿Ibi-neg be anga sunna sobsamarsunnale? An-obunnoged-neg, ¿bia be anga sobmalosunna?

²Ani Bab-Jehová soged: Ar belagwable we-ibmarmar ani an obinnisad, deyobi nagunonikid. ”Ani an dule-wilemalad, dule-suli-suli-itodimalad, degi, an-gayaburbaba binsaed-nika-nanadimalad, an yeer-daked.

³Ar dulemar anga moli-bebe-nikad-machered ogumakar ukedi, dule-gindakmaladyob gumalad. Ar dulemar anga sibad-wawaad-senigana-oburgwedamaladi, bab-dummadyob-imaklemaladga achu-nono-bisgar-ukmaladyob gumalad. Ar dulemar anga ibmar-gwag ukdamaladi, bab-dummadyob-imaklemaladga sin-ablis-ukdamaladyob gumalad. Ar dulemar an-nug odummogega anga ina-wawadikid obupurmakdamaladi, bab-dummadyob-imaklemalad-e-nug-odummomaladyob gumalad. We-dulemar na dukin e-itolegedba igar susmalad, e-ibmar-isgana-imakedgi na yeer itodimalad.

⁴An ega sabsur-odurdakleged ukmogoed, bela-belad-ibmar-dobmalad an egi barmidoed. Ar an gochagua, gwen dule an-abin-imaksasulid. Ar an sunmaksagua, gwen dule an-itossulid. Aka bur an-asabin ibmar-isgana imaksamalad, an-ibmar-abesulid imaksamarbalid.”

⁵Bemar Bab-Jehová-gayaburba-dobee-nanadimalad, Bab-Jehová-gayaburba be itomala: “Be-gwenadgan-sae-be-dakdimaladi, degi, an-nug-ular-be-obandimaladi, dodoakwaa weyob sogmalad: ‘Bab-Jehová, e-gargangued oyoge, adi, anmar bemar-weligwar-itoged dakegar.’ Ar isdar-be-dakmaladdi bingegumaloed.”

⁶Neggwebur-akale, gayaburba binnasuli goled, Bab-Dummadse-goled-neggi gayaburba goled: “We-gaya, Bab-Jehová-gayaburba gued, e-isdarmaladga sabsur-ibmar sognaid.”

⁷Bab-Jehová soged: “Jerusalén, boni-itodaged-iduale, bato mimmi nikusad. Jerusalén, yoo-bonigan-itodaged-iduale, goe-susugwa baksad.

⁸¿Doa weyob ibmar-soglege itodii? ¿Doa weyob ibmar-oyolege dakdii? ¿Ar dulemar-yargi-bukued ilagwen-bukuar bukusi? ¿Ar neggwebur-gwagwen ukiagwale gwalulesi? Degi-inigwele, Sión-yardi abga-bonigan-itoaliyalaba mimmigan nikusad.”

⁹Bab-Jehová soged: “Ar ani an sikwi-aidegega imaked, degite, ¿an geg sikwi-odegega imakde? Ar ani an dula-nikuega-imaked, degite, ¿an sikwimar-aideged-igar gaode?

¹⁰”Bemar, Jerusalén-neggwebur-sabmaladi, Jerusalénʼba be weligwar-itomala, e-ular, be yeer-itomala. Bemar, Jerusalénʼba bukib-binsadimaladi, be weligwaledgi ichomakmala.

¹¹Ar Jerusalén-neggwebur nanyobi e-mamgi be-onumaloed, immerbaa be gumaloed. E-nunis-ena-ena-nanaid immelegedse bemar gobmaloed, egi be nue-yeer itomaloed.”

¹²Ar Bab-Jehová weyob soged: “An Jerusalén-neggweburgi dii-nollosur-aryomaidyobi gwage-bogidikid nasikoed. Dulemar-yar-baigangi-bukmalad-e-ibmar-nuegan diwar-engumaidyobi, Jerusalénʼga-ukega an imakoed. Jerusalén, goemaryobi mamgi be-onumaloed, e-sakwagi angaagwar be-semai guoed, e-nukugi be-mesmaloed.

¹³Nan igi na e-mimmi-gwage armake, deyobi an bemar-gwage armakoed. Bemar Jerusalén-neggweburgi gwage armaklemaloed.”

¹⁴Bemar weyob ibmar-dakalile, gwagegi bemar weligwar itodmaloed, gagan-aramakdedyobi bemar gannar gannaledmaloed. Bab-Jehová e-maimar-abargi e-gangued oyogoed, e-isdarmalad-abargi e-urwed oyogoed.

¹⁵Bab-Jehová bato soo-abargi danikid. E-bila-onoged-ur-napagined burwa-ooredyob dakleged. Bab-Dummad, e-sae-itoged urwedgi oyononikoed, e-sabsur-odurdaked soo-aramakwichiyob guoed.

¹⁶Bab-Jehová, bela dulemarga soogi, degi, es-suidgi igar-nabogoed. Bukidar Bab-Jehováʼse burgwemaloed.

¹⁷Bab-Jehová soged: “Dulemar-san-islidik-imakmaladi, degi, san-swilidik-imakmaladi, dule-negabargi-nadapidba nadapmalad, adi, bab-dummadyob-imaklemalad-dudumar-galuse-dogega. Bela-wemar na mesa burgwemaloed. Dulemar-sin-gunmalad, nusa-gunmalad, degi, ibmar-baigan-isemalad-gunmalad, bela-mesa bergumaloed.

¹⁸”Ani, an e-ibmar-imaked-ulale, degi, e-binsaed-ulale, bela dulemar-yar-baid-baidgi-bukmalad, degi, gaya-akar-akar-sunmakmaladi oatosokalid. We-dulemar danimaloed. An-gangued-yeerdakleged dakmaloed.

¹⁹”An ega wilub-oyogoed, abala dule dula-bemaloedi, we-yarmarse an barmidoed: Tarsisʼse, Futʼse, Ludʼse (we-dulemarde sigu-mied-dulemalad), Tubalʼse, Javánʼse, dikasur demar-gakaba-neggwebur-bukmalad an-nug-itodisurmaladse, degi, an-gangued-yeerdakleged-dakdisurmaladse an barmidoed. ”Wemala, dulemar-yar-baid-baidgi-bukmaladga, an-gangued-yeerdaklegedgi sunmakmaloed.

²⁰Dulemar be-gwenadgan-yar-baid-baidgi-gudidimalad, an-yala-islidikid-Jerusalénʼse, anga ibmar-uklegedyobi seledagega imakmaloed: Abala, molimargi be-gwenadgan-sedamaloed. Bamaladdi, moli-ur-napagined-bila-onomaladgi, e-gabmaladgi, moli-uaya-senigwadmargi, degi, moli-yargan-muremaladgi sedamaloed. ”Ar igi-Israel-dulemar anse-goled-negse bormo-swilidikidgi anga ibmar-gwag-ukleged sedanidamala, deyobi, be-gwenadgan-sedamaloed. Ani Bab-Jehová deyob soged.

²¹”We-be-gwenadgan-seledamaloedi, abala dule-irwa-anse-golemaladga, degi, Levita-dulemarga an suoed.

²²Ar igi an-asabinni nibneg-gwapid, degi, napneg-gwapid degisadegu-nai-guoe, deyobi, be-waganmar degisadegu-bukwa an imakoed. Degi, bemar-nug degisadegumogoed. Ani Bab-Jehová deyob soged.”

²³Bab-Jehová soged: “Nii-binid-gwisgued-ilibali, degi, obunnoged-ibagan-ilibali, bela dulemar an-nug-odummodii gumaloed.

²⁴Ainidmaloed, geb dule-angi-gwisgusmalad-e-muigan omilede dakmaloed. ”Ar nus-e-san-gunnedi gwen burgosulid, deginbali, soo-e-san-ogumaknaidi gwen ginnosurbalid. Bela dulemarga ibmar-imadga guoed.”