Isaías 6

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Rey-Uzías-burgwisad-birgagine, ani Isaías, Bab-Dummad ologana-biriginedgi-sii an daksad. E-mola-duku ese-goled-neggi bela batenai an daksad.

²E-birgine, dule-nibnegginmalad-Serafínʼye-nugmalad gukunanai an daksad. A-dulemar sakan-nergwa (6) nikamaladbiid: Sakan-warbogwadgi e-wagar odukunanaid, sakan-warbogwad-baidgine, e-malimar odukunanaibalid, degine, sakan-warbogwad-baidgindi, gukunanaid.

³Muchub-muchubbi, binnasuli sognanaid: “Bab-Jehová-Bela-Gangued-Nikadi, Bab-Jehová-Isligwaledid, Isligwaledid, Isligwaledid. Bela napneggi e-gangued-yeerdaklegedi neg-gasa naid.”

⁴Serafínʼmar-binnasur-gornanaidbali, Bab-Dummadse-goled-neg-yawagak-bargamalad e-sailamarse-bakale, giglimakded, geb Bab-Dummadse-goled-neg bela waa daasa sigisad.

⁵Geb an binnasuli goted: “¡An duledar-wiles! ¡An bergussun! Ar ande ibmar-isganabi-sogdiid-duled, dulemar-ibmar-isganabi-sogdimalad-abargi an gudiid. Emide, an Rey-daksad, Bab-Jehová-Bela-Gangued-Nikad an daksad.”

⁶Degidgine, Serafín-gwensak ansik gukualid. Bab-Dummadga-ibmar-ogumakar-ukleged-ailagi soo-gasiidgi soo-weed-esgorogi sogun-ara-arad-wesadi sedanikid.

⁷Geb a-sogungine, an-gakuli ebunonikid, agi anga sogded: “Be dake, we-sogun-ara-arad be-gakuli-ebusadi, bega isgued elinonisunnad. Bab-Dummadgi be isgudiidi, emide isgussulidyobi be daklenadsunnad.”

⁸Geb degidgine, Bab-Jehová-e-sunmaked an itosad. Weyob soge an itosad: —¿An doa-dule barmidoe? ¿Doa anmar-anar naoe? Geb abin an sogded: —Ani be an-barmide, ani an naoe.

⁹Geb Bab-Jehová anga sogded: —Be nae, we-dulemarga be sogna: ” ‘Be ibmar nue-itomalo-inigwele, akusunna be itomaloed. Be ibmar nue-dakmalo-inigwele, akusunna be dakmaloed.’

¹⁰We-dulemar-e-gwage dutusuli be imako, akusunna ibmar-itogega be imako, akusunna ibmar-dakega be imako. Degisulile, e-ibyagwale ibmar-dakdoed, e-uayagwale ibmar-itodoed, degi, e-gwagegi magar-ibmar-itodoed, e-isguedga bukib binsadmaloed. Degidbali, nudake an dakledagoed.”

¹¹Geb an ese egichided: —Bab-Jehová, ¿sanagwadse an be-nuggi sunmakdii gusunnoe? Bab-Jehová anga sogded: —Bela neggweburmar-obelolegedse be an-nuggi sunmakdii guoed. Bela negmar-ollo-ollo-ambikuedse be angi sunmakdii guoed. Dulemar a-neggweburmargi-bar-gudii-guosulidse be an-nuggi sunmakdii guoed. Nainumarbela-swiri-naguedse be angi sunmakdii guoed.

¹²An bela-dulemar-e-yalagi dikasuli ononnogoedse be angi sunmakdii guoed. Bela e-yala-olloo-naguedse be an-nuggi sunmakdii guoed.

¹³Ar dulemar e-dulataledgi (100) amba e-ambe (10) besale, bela amba amar berguoed. Ar sapi-emisgwa-siklesad-e-sailabi gannaa-siidaedyobi wis bemaloed. Geb we-dulemar-bemaloedi neggwebur-islidikidga guoed.