Hanidabaa Odiya Koiro Maxaafaa 23

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

¹Daawiti ceeggido wode, ba na7aa Solomona Israa7eela bolli kawoyiis.

²Daawiti Israa7eela kaalettiyaageeta ubbata, qeesetanne Leewata issippe shiishshiis.

³Hasttamu laittanne hegaappe bollaara de7iya Leewati qoodettidosona; qoodettidi eti muleera hasttamanne hosppun sha7u attumaasa gididosona.

⁴Hageetu giddoppe GODAA Beeta Maqidasiyaayyo aawatiya laatamanne oiddu sha7ata kawoi wottiis. Qassi halaqatanne pirdda daannata usuppun sha7ata wottiis.

⁵Penggiyaa naagiyaageeta oiddu sha7ata wottiis. GODAA galatanau Daawiti medhdhido yetta miishshan GODAA galatiyaageeta oiddu sha7ata wottiis.

⁶Daawiti Leewi yelido attuma naata Gershshoona, Qahaatanne Maraara eta yaran yaran heezzu citan shaakkiis.

⁷Gershshooni yelido attuma naati La7idaananne SHim77a.

⁸La7idaana attuma naati heezza; etikka Yihi7eela, Zetaamanne Yuu7eela.

⁹SHim77a attuma naati heezzati SHalomoota, Hazii7eelanne Haaraana; hageeti La7idaana yaratuyyo halaqata.

¹⁰SHim77a attuma naati oiddati, bantta yeletaa yeletaa maaran Yahaata, Ziina, Yi7uushanne Barii7a. Yi7uushassinne Barii7assi naati darenna; hegaa gishshau, eti issi yaradan qoodettidosona.

¹²Qahaata naati oiddati Amiraama, Yixihaara, Kebroonanne Uzzi7eela.

¹³Amiraama attuma naati Aaroonanne Muusa. Aarooninne a zerettai ubbaappe aaro geeshsha gidanaadan dummatidosona. Eti GODAA sinttan ixaanaa cuwayanau, GODAAYYO oottanaunne GODAA sunttan asaa anjjanau merinau dummatidosona.

¹⁴Xoossa asa gidiya Muuse naati Leewa zaretuura gatto qoodettidosona.

¹⁵Muuse naati Gershshoomanne El77eezara.

¹⁶Gershshooma naatu giddoppe halaqai SHabu7eela.

¹⁷El77eezara na7ai Rahaabiyaa. El77eezarayyo hara na7i baawa; shin Rahaabiyaa naati keehi cora.

¹⁸Yixihaara naatu halaqai SHalomiita.

¹⁹Kebroona na7ai bairai Yiriiya; naa77anttoi Amaariyaa; heezzanttoi Yahaazi7eela; oiddanttoi Yiqami7aama.

²⁰Uzzi7eela na7ai bairai Mikiyaasa; naa77anttoi Yishiyaa.

²¹Maraara naati Maahilanne Musha. Maahila naati El77aazaranne Qiisha.

²²El77aazari macca naatuppe attin, attuma naata yelennan haiqqiis. Hegaa gishshau, eta ishantti Qiisha naati eta machchidosona.

²³Musha naati heezzati Maahila, Edeeranne Yiremoota.

²⁴Leewa yeletan bantta zariyaaninne keettan bantta sunttan mazggafettidaageeti hageeta; laatamu laittanne hegaappe bollaara de7iya Leewa zareti ubbai GODAA Beeta Maqidasiyan oottidosona.

²⁵Daawiti, “GODAI Israa7eela Xoossai ba asaa shemppissiis. GODAI Yerusalaamen merinau de7ana.

²⁶Hegaa gishshau, Dunkkaaniyaanne a giddon go7ettiyo miishshata hagaappe sinttanau Leewati tookkanau bessenna” yaagiis.

²⁷Daawiti wurssettan azazido azazuwaadankka laatamu laittanne hegaappe bollaara de7iya Leewati qoodettidosona.

²⁸Eti GODAA Beeta Maqidasiyan oottiya Aaroona zerettata maaddoosona. GODAA Beeta Maqidasiyan kareeranne soora oottoosona; geeshsha miishsha ubbaa tunennaadan naagoosona.

²⁹Qassi eti Xoossaa sinttan wottiyo oittaayyo, kattaa yarshshuwaayyo, shiishshiyo xiilliyaayyo, irshshoi gelibeenna oittaayyoonne zaitiyan munaqettiya xiilliyaayyo aawatoosona; eti makkiyoobaayyoonne likkiyoobau ubbau aawatoosona.

³⁰Qassi eti ubba gallassi maalladonne omarssi, GODAASSI xuuggiyo yarshshoi yarshshettiyo Sambbata gallassi, aginai xeeriyo wodenne higgiyan xaafettida hara baala gallassati gakkiyo wode, GODAA galatanaunne bonchchanau sunttettidosona.

³²Dunkkaaniyaanne GODAA Beeta Maqidasiyaa naaganaadaaninne Aaroona zerettata maaddanaadan aawatettai Leewatuyyo imettiis.