1Hein meǥurang en si David, midhimu zin he hadì is anak din he si Solomon.
2Miburunburun din is langun he menge pengulu te Israel, ragkes is menge memumuhat wey is menge Levihanen.
3Mibilang is menge Levihanen he ebpenuiǥen te 30 pehendiyà te metikang, ne is kezakel zan ne 38,000.
4Migkaǥi si David te, “Is 24,000 kandan ne iyan edseriǥan te menge ebeelan dutun te valey te Nengazen, ne is 6,000 ne iyan menge upisyal wey menge menhuhusey.
5Is 4,000 ne iyan ebantey te menge ǥemawan te valey te Nengazen, ne is 4,000 pa ne iyan sikandan tigdalig te Nengazen pinaaǥi te menge gelemiten te kedtukar he mibpeveelan ku para te heini he vuluhaten.”
6Mibahin ni David te tetelu he grupu haazà is menge Levihanen sumalà is menge kepuun te menge anak ni Levi he si Gershon, Kohat, wey si Merari.
7Is menge anak ni Gershon ne iyan si Ladan wey si Simei.
8Si Ladan ne zuen tetelu he anak din he menge maama he iyan si Jehiel he iyan lavew he pengulu te pemilya zan, is sunud ne si Zetam wey si Joel.
9Iyan heini sikandan menge pengulu te menge pemilya ni Ladan. Si Shimei ne tetelu zaan is anak din he menge maama he iyan si Shelomot, Haziel, wey si Haran.
10Duen huziyan he heepat he anak ni Shimei he menge maama: si Jahat is lavew he pengulu te pemilya zan, is ikezuwa si Zina, sunud si Jeush wey si Beria. Deisey zà is menge anak ni Jeush wey ni Beria, umbe is ked-isipa kandan, ne senge pemilya zan dà.
12Si Kohat ne zuen heepat he anak din he menge maama he iyan si Amram, Izhar, Hebron, wey si Uziel.
13Is menge anak ni Amram he menge maama, ne iyan si Aaron wey si Moises. Insivey si Aaron wey is menge kevuwazan din he para te kebpehinungud te menge segradu he menge vutang, te kebpemuhat te menge pemuhat diyà te Nengazen, te kebpenilbi kandin, wey kebpenuvadtuvad te menge etew pinaaǥi te ngazan te Nengazen. Iyan heini ketengdanan dan taman en te taman.
14Is menge maama he anak ni Moises te suluǥuen te Megbevayà neragkes dutun te menge Levihanen.
15Is menge anak din he maama he si Gershon wey si Eliezer.
16Is sevaha zutun te menge anak ni Gershon, ne si Shebuel he lavew he pengulu te pemilya zan.
17Si Eliezer, sevaha zà is anak din he maama he si Rehabia he iyan lavew he pengulu te pemilya zan. Utew mezakel is menge kevuwazan ni Rehabia.
18Is sevaha te menge anak ni Izhar, ne iyan si Shelomit he iyan lavew he pengulu te pemilya zan.
19Is menge anak ni Hebron he menge maama, ne iyan si Jeria (is lavew he pengulu te pemilya zan), si Amaria is ikezuwa, si Jahaziel is iketulu, ne si Jekameam is ikeepat.
20Is menge anak ni Uziel he menge maama, ne iyan si Micas, is lavew he pengulu te pemilya zan, ne ikezuwa si Ishia.
21Is menge anak ni Meron he menge maama, ne iyan si Mali wey si Mushi. Is menge anak ni Mali he menge maama ne si Eleazar wey si Kish.
22Minatey si Eleazar he wazè en mekeanak te maama, menge vahi zà. Iyan heini sikandan mid-esawa te menge id-aǥew zan he menge anak ni Kish.
23Si Mushi ne tetelu is anak din he menge maama he iyan si Mali, si Eder, wey si Jeremot.
24Iyan heini menge kevuwazan ni Levi sumalà te menge pengulu ziyà te pemilya zan. Nelista is menge ngazan te kada sevaha kandan. Iyan dà neragkes dutun is ed-idad te 20 pehendiyà te metikang he ebpekepenilbi zuen te valey te Nengazen.
25Migkaǥi si David te, “Mibeǥayan kiw te Nengazen he Megbevayà te Israel, te kelinew ne ziyà sikandin ed-ubpà te Jerusalem taman te wazà pidtemanan.
26Umbe, kenè en kinahanglan he ed-uwiten pa te menge Levihanen sikan is Tulda he Ed-ezapan wey is menge ǥelemiten dutun.”
27Sumalà te ketepusan he suǥù ni David, is langun he menge Levihanen he ebpenuiǥen te 20 he tuig pehendiyà te metikang ne inlista para te kebpenilbi.
28Is ketengdanan te menge Levihanen ne iyan is ked-uǥup te menge memumuhat he menge kevuwazan ni Aaron para edterebahu zutun te valey te Nengazen. Iyan sikandan ed-etiman te lama zuen te valey te Nengazen wey te menge ruǥu ziyà te menge kilid, wey sikandan daan is ed-uǥup te menge tulumanen te kebpenlumpiyu wey te zuma pa he menge vuluhaten dutun te valey te Megbevayà.
29Iyan daan sikandan midseriǥan duen te segradu he supas he idsavuk diyà te lemisahan, te herina he para te menge pemuhat he para gasa, te supas he wazè din tapey, wey te zuma pa he edhilutuen wey ibpedsesahug. Iyan daan sikandan midseriǥan te kedtimbang wey kedtakes te langun he menge pemuhat.
30Ketengdanan dan daan is kedhitindeg dutun te valey te Nengazen te kebpeselamat wey kedalig te Nengazen kada meselem wey kada mezukilem.
31Sikandan daan is ed-uǥup te ebpemuhat te pemuhat he edtutungen para te Nengazen te menge Andew te Kedhimeley, te Pista te Kebpuun te Hayag, wey te zuma pa he menge pista. Duen menge sulunuzen ke pira te menge Levihanen is edterebahu kayi he menge vuluhaten wey ke ebmenmenuwen dan te ebaal.
32Umbe, midhimu te menge Levihanen is ketengdanan dan te ked-etiman duen te Tulda he Edtelevukaayan wey zuen te Segradu he Lugar, wey te ked-uǥup te menge kezuzumahi zan he menge memumuhat he kevuwazan ni Aaron te kebpenilbi zutun te valey te Nengazen.
