1Nap’an ni ka ri pilbithir David me tay Solomon nib pagel ni fak nge mang pilung nu Israel.
2Me pining David urngin e pi’in yad ma yog e thin u Israel nga ta’bang nge urngin e prist nge pi Levite.
3Me the’eg gubin e pumo’on rok yu Levi ni pi’in ke gaman e guyey e duw yangren ngalang. Ma urngirad u gubin e guyey nge meruk bbiyu’.
4Me tay e en pilung rliw’ nge aningeg bbiyu’ i yad ni ngar gagiyeg niged fare maruwel ko Tempel, ma nel’ bbiyu’ e ngi i ayuweg babyoren gubin ban’en ma yad be puf oloboch,
5ma aningeg bbiyu’ e ba milfan e matnag ngorad, ma aningeg bbiyu’ e ngu’ur pininged e sorok ngak SOMOL ni yad be chubeg e pi talin e musik ni thagnag fare pilung ni fan ko biney e gam’ing.
6Me ki’eg David e piyu Levi nge dalip ulung ni aram fa dalip ke girdi’: Gershon, Kohath, nge Merari.
7Gershon e l’agruw e pagel ni fak: Ladan nge Shimei.
8Ladan e dalip e pagel ni fak: Jehiel, Zetham, nge Joel,
9ni yad e lolgen fa yuke girdi’ ni yib rok Ladan. (Shimei e dalip e pagel ni fak: Shelomoth, Haziel, nge Haran.)
10Shimei e aningeg e pagel ni fak: Jahath, Zina, Jeush, nge Beriah, nni yarmiy fithingrad ni tabab ko en ni nganni’. Jeush nge Beriah e de yo’or e pi’in owcherow ere ni the’egrad ni ta’ab ke girdi’.
12Kohath e aningeg e pagel ni fak: Amram, Izhar, Hebron, nge Uzziel.
13Bin nganni’ e pagel ni fak e Amram ni ir e chitamngin Aron nge Moses. (Aron nge pi’in owchen e ni falrad ngabang ni nge milfan fa pin’en nib thothup ngorad ni manemus, ngu’ur urfiyed e pi incense ko ngiyal’ ni yibe liyor ngak SOMOL, ma yad be pigpig ngak, ma yad be fel’eg wa’athan e girdi’ nga fithingan.
14Machane pi’in pagel ni fak Moses, ni fare pumo’on ni bay Got rok, e ni unegrad nga fithik’ e piyu Levi.)
15Moses e l’agruw e pagel ni fak, Gershom nge Eliezer.
16En ma yog e thin u fithik’ e pi’in pagel ni fak Gershom e Shebuel.
17Eliezer e ri ta’reb e pagel ni fak ni aram Rehabiah, machane Rehabiah e bo’or e pi’in owchen.
18Ma bin l’agruw e pagel ni fak Kohath ni aram Izhar, e immoy ba pagel ni fak ni Shelomith, ni ir lolgen e re ke girdi’ nem.
19Bin dalip e pagel ni fak Kohath, e Hebron ni aningeg e pagel ni fak: Jeriah, Amariah, Jehaziel, nge Jekameam.
20Bin aningeg e pagel ni fak Kohath, e Uzziel ni l’agruw e pagel ni fak, Mikah nge Isshiah.
21Merari e l’agruw e pagel ni fak, i Mahli nge Mushi. Me Mahli e ku l’agruw e pagel ni fak, i Eleazar nge Kish,
22machane Eleazar e yim’ nde fakay reb e pagel, kemus ni go’ ppin pifak. Pi ppin nem ni pifak e go’ ra figirngiyed e pi pumo’on ni pifak Kish ni aram walagen e chitmangirad.
23Ma bin l’agruw e pagel ni fak Merari, e Mushi ni dalip e pagel ni fak: Mahli, Eder, nge Jeremoth.
24Irera’ e pi’in owchen piyu Levi, ni yuke girdi nge pi tabnaw, yad gubin ni kan yoloy fithingrad. Ra bagyad e picha’ney nike gaman e rliw’ e duw yangren ngalang, ma bay e birok e maruwel ko fare Tempel rok SOMOL.
25Me ga’ar David, “I SOMOL ni Got rok yu Israel e ke pi’ e gapas ngak e tirok e girdi’, me ir e bayi par u Jerusalem ndariy n’umngin nap’an.
26Ere dakuriy rogon ni ngki fek e piyu Levi fare Tent u p’eowchen SOMOL nge gubin e pin’en ni yima fanay ko fare liyor.”
27Rogon e tin tomur e thin rok David e gubin e piyu Levi nike gaman e rliw’ e duw yangarrad e go’ kan yoloy fithingrad nga babyor
28min pi’ e tin ni ba’aray e maruwel ngorad: ni ngar ayuweged e fapi prist ni pi’in owchen Aron ko liyor u Tempel, ma ngu’ur ayuweged lan fapi yoror nge pi senggil riy, ma ngu’ur ted gubin e tin nde ta’ay ngi i par nib tabgul,
29ma ngki milfan ngorad fare flowa ni yima pi’ ni maligach ngak Got, nge flour ni yima fanay ko maligach, nge fapi flowa ni yima lith nib gilgith ni bod e brel ndariy e is riy, nge pi maligach ni yima wumnag, nge fapi flour ni yima athkuy e gapgep ni olive ngay; ni yad e ngar thabthabel niged miyad foleg e pi maligach nu Tempel nem;
30ma ngu’ur pininged e magaer nge sorok ngak SOMOL ni gubin e kadbul nge blayal’
31nge ngiyal’ ni yi be pi’ e maligach ni mo’oruf ngak SOMOL ko rofen ni Sabbath, nge madnom ko M’ug e Pul, nge ku boch e madnom. Motochiyel e ni ngongliy ni nge gagyalnag gubin e piyu Levi ni kan duwgiliy ko re maruwel ney u bingyal’ ngu bingyal’. Fare maruwel ni aram e ngu’un liyor ngak SOMOL ni gubin ngiyal’ e ni pi’ ngak e pi Levite.
32Yad e ni pagfan ngorad fare Tent rok SOMOL nge fare Tempel ni ngu’ur ayuweged, ma ku yad be ayuweg e girdi’ rorad ni pi prist ni pi’in owchen Aron, ko liyor u Tempel.
