Ɩsɑyii 1:2-12

²Ɩsɔtɔnʋɣʋ, nɩɩ. Tɛtʋ, ke ŋkpɑŋŋ. Tɑcɑɑ yɔɣɔtǝɣɩ sɩ: Hɑlɩ mɑ́ tɔɔ piyɑ nɑ mɑ́ pɩɩsɩ-sɩ, ɩlɛnɑ sɩ́ kʋlǝɣɩ mɑ tɔɔ?

³Nɑʋ nyǝmɑ́ ɩ tʋ, nɑ kpɑŋɑɣɑ nɑ́ɑ́ nyɩ wei ɩ cɑlǝɣɩ-kɛ tɔ. Amɑ Ɩsɛɣɛlɩ nyǝ́mɑ nɑ́ tɑ́ nyɩ pʋlʋ. Mɑ yǝlɑɑ mpɛ pɑɑ nɩɩkɩ.

⁴Yǝlɑɑ pǝntǝlɑɑ, nɑ ɑsɑɣɑɑ mɛ, mǝ tɔm wɛ wɑɩyo kɛ́. Piitim nyɑŋ nyǝm nɑ kɑwɑlɑɣɑ piyɑ mɛ, mǝ tɔm wɛ wɑɩyo kɛ́. Mpi tɔ, ɩ́ lɔwɑ Tɑcɑɑ nɑ ɩ́ nyǝnɩ Ɩsɛɣɛlɩ Ɩsɔ Nɑŋŋ tʋ kɛ yem, ɩ́ hɑ-ɩ siɣile.

⁵Mǝ leɣe ɩ́ cɑɑ sɩ mɑ́ tɑsɑ mɑpʋ? Pepe tɔɔ kɛ́ ɩ́ wɛɛ nɑ ɩ́ kɑmɑ nyʋɣʋ nɑ mɑ tɔɔ kʋlʋɣʋ? Anɩ mǝ nyɔɔŋ nɑ́ fetilɑɑ nɑ ɩ́ tɔkɩ wɑhɑlɑ kɛ mǝ tɑɑ.

⁶Pǝ́cɔ́ pǝ kpɑɣɑʋ mǝ nyɔɔŋ nɑ pǝ́ sɩɩnɑ mǝ nɔntɑɑlǝŋ tɔ, tiili fɛɩ hiiu. Pǝ fetilɑ-mɛɣɛ nɑ hiŋnɑɑ, nɑ tǝmɑtɛ lonɑ nɑɑkɩ. Nɔɣɔlʋ tɑ nyɑɑlɩ-mɛ yɑɑ ɩ́ tʋ́-mɛɣɛ nim, yɑɑ ɩ́ hɔkɔ mǝ hiŋ.

⁷Pǝ kpiisɑ mǝ tɛtʋ nɑ kɔkɔ nyɑɣɑ mǝ ɑcɑlɛɛ. Kpɑɩ nyǝ́mɑ wɑkǝlǝɣɩ mǝ tɛtʋ nɑ ɩ́ nyǝnǝɣɩ. Pǝ wɑkǝlɑɑ kɛ́ ɩsɩɩ wɑɑtʋ wei nyɩɩtʋ tɑɑ nyǝ́mɑ kɑ kɔmɑ tɔ.

⁸Yosɑlɛm kɛ pǝ kɑɑsɑɑ ɩsɩɩ cokǝle kɛ kɑɑmɑ tɑɑ. Yɑɑ cɑŋʋɣʋ kɛ tɩɩŋ wei pɑ yɑɑ sɩ lɛsɛŋ tɔ ɩ tɑɑlɛ tɑɑ, nɑ yoolɑɑ tɑmɑ-ɩ kotɑɣɑ.

⁹Ye Tɑcɑɑ Pǝ tǝnɑ pǝ tʋ ɩ́ tɑɑ kɑɑsɩ-mɛɣɛ yǝlɑɑ kɛ pǝcɔ, ɩ́ kɑ nǝɣǝsǝnɑ kɛ́ ɩsɩɩ Sɔtɔm nyǝ́mɑ. Ɩ́ kɑ wɛ ɩsɩɩ Kɔmɔɔ nyǝ́mɑ.

¹⁰Sɔtɔm ɑwulɑɑ mɛ, ɩ́ nɩɩ Tɑcɑɑ kʋyɔɣɔtʋtʋ. Kɔmɔɔ yǝlɑɑ mɛ́ ɩ́ ke ŋkpɑŋŋ nɑ Tɑcɑɑ kʋsǝsɩɩtʋ.

¹¹Tɑcɑɑ pɔɔsǝɣɩ sɩ: Pepeɣe mɑ lɑkǝnɑ mǝ kɔtɑsɩ tuutuumɑ, mɑ hɑɣɑ mǝ ɩwɑɑŋ nɑ mǝ nɑwee kɔtɑsɩ nsi kɔkɔ lusɑɑ tɔ sɩ nim. Mɑ nyǝɣǝsɑ mǝ lɑtǝcɛnɑɑ nɑ mǝ heeŋ nɑ mǝ pǝŋtʋlʋŋ cɑlǝm.

¹²Wɑɑtʋ wei ɩ́ kɔŋ mɑ kiŋ tɔ ɑwe heelɑ-mɛ sɩ ɩ́ fɛlɩ mɑ tɑɣɑ tɔɔ?