YƐKOTINƆ̀ 8:8-22

⁸N nɑ́ɑ́ ntinɑ́ɑǹsɑ̀ɑ̀tì nti, n yí soú m mɛ nyí cií.

⁹Wèè ciì weè yóó tì bɑntɛ́. Wèè yɛ̃́ dɛ̀mɑrɛ̀ kòo bɑntɛ́ tì tumɛ̀ timɔ́mmɔnti.

¹⁰Ndɔ́nɛ̀ n tié nkɛ̀ dɛ̀ɛ pɛ̃ɛ̃tɛ́ idíítí. Ndɔ́nɛ̀ mɛciì kɛ̀ dɛ̀ɛ pɛ̃ɛ̃tɛ́ mɛsɔɔ nsɑ̀ɑ̀mɛ̀.

¹¹Mɛciì mpɛ̃ɛ̃tɛ́mu mɛdɛ̀ì, kusɑ̃rìkù mɑkù í mɛ̀ tùɔ̀kɛ.

¹²Mí mmɛciì n nɛitinɛ̀ mɛyɛ̀mmɛ̀ mmɛ, kɛ̀ n yóó dɔɔ̀ dɛ̀ n totí n yɛ̀mmɛ̀.

¹³A bo ndémɛ̀ Kuyie dɛɛ̀ tu ɑ yetɛ mɛyɛi. N yí nɑɑtinɛ̀ sifeí yɛmbɛ̀, sipɔɔ yɛmbɛ̀ bɛ̀ɛ̀ borimɛ í wenni nɛ̀ bɛ̀ɛ̀ sountɛ.

¹⁴Míì ɔ̃ɔ̃ tié nhonìtì kòo ciitɛ́. Míì tu mɛciì nkɛ duɔ̀ mmuwɛ̃rímú.

¹⁵Míì te kɛ̀ bɛkpɑ̀ɑ̀tìdiɛbɛ̀ bɑkɛ́, kɛ̀ bɛbeéndiɛbɛ̀ bekù kɛ̀ dɛ̀ wenni.

¹⁶Míì te kɛ̀ bɛkpɑ̀ɑ̀tìbɛ̀ nɛ̀ bɛhɛikɛ̀nkótíbɛ̀ nɛ̀ kɛtenkɛ̀ ĩ́nkɛ̀ kó bɛbeémbɛ̀ bɛmɔu kɛ̀ bɛ̀ bɑkɛ́.

¹⁷Bɛ̀ɛ̀ n dɔ́, m bɛ ndɔ́, bɛ̀ɛ̀ n wɑɑ̀, mbɛɛ̀ n yɑ̀u.

¹⁸Míì te tikpɑ̀tì nɛ̀ disɑ̃nni, tikpɑ̀tì tìì í deu nɛ̀ mɛborimɛ sɑ̀ɑ̀mɛ̀.

¹⁹M pɑ̃rɛ̀ wennimu kɛ pɛ̃ɛ̃tɛ́ mɛsɔɔ nsɑ̀ɑ̀mɛ̀, kɛ̀ n cɔ̃́ntimu pɛ̃ɛ̃tɛ́ idíítí.

²⁰N kérí timɔ́mmɔnti kó kucɛ nku bɛnitisɑ̀ɑ̀bɛ̀ tũ nkù,

²¹kɛ dɔɔri mɛsɑ̀ɑ̀ mbɛ̀ɛ̀ n dɔ́, kɛ bɛ̀ duɔ̀ ntikpɑ̀tì.

²²Kuyie nni ndɔ̀ɔ̀ kɛ̀ dɛ̀ mɔ̀ntɛmu, kù niitɛ́ kɛ́dɔɔ̀ mí nwe kɛ nɛ́ dɔɔ̀ dɛsɔnnɛ.