Dad Fngewe 8:8-22

⁸I kdee mangu slame matlu, là agu tmulen kéng, na landè bigkò di mangu.

⁹Na di to too nun kaglabatan, gadean too glut i mangu, na di to nun gnadean, gadean too matlu i mangu.

¹⁰Én nalékyu i dad tdògu ise ku salafì, nalékyu gnadè ise ku i too fye blawen,

¹¹du agu i kfulung na mabtas fa di kabtas i dad too fye kas, na balù tan i knayèyu di tah tanà ani, landè fsalngadyu di deg, dutoo agu mdatah.

¹²Agu kfulung nun kaglabatgu, nun gnadègu, na fulung agu mebe i ktogu.

¹³I to nun klikoan di Dwata, knangan i sasè. Na agu kfulung, mnang agu i kafdatah, i kafdag, i sasè nimò, na i kakakéng.

¹⁴Agu kfulung, fulung agu mngewe, na fulung agu tmabeng, nun kaglabatgu na nun glalgu.

¹⁵Mdà di deg i dad harì gmagan mebe i dad tola, na i dademe dad ulu fulung ale mimò i dad matlu urdin.

¹⁶Landè ulu di tah tanà ani fulung mebe i dad to di fye, ku ise agu tmabeng dale.

¹⁷Kandogu i dad kamdo deg, na dad to mngabal deg, teenla agu.

¹⁸Banlégu ale knun mlawil, afè, na kafye knè.

¹⁹I gwèyu mdà di deg, mabtas fa di kabtas i too blawen, na di kabtas i too salafì.

²⁰Magu agu di dalan matlu, na lalògu i matlu nimò.

²¹Na i dad kamdo deg, banlégu ale knun, na tananùgu i mabtas knun i gumnèla.

²²Agu kfulung, muna mgimò Dwata, di laan fa mgimò i kdee di tah tanà ani.