YƐKOTINƆ̀ 30:1-8

¹Akuu Sɑkee birɛ nɑ̀kɛ́ tìì nɑ́ɑǹtì Itiyɛɛdi nɛ̀ Ukɑɑdi.

²N tú kuyɛìnkù nku kɛ pɛ̃ɛ̃tɛ́ bɛnìtìbɛ̀ bɛmɔu, n yí mɔkɛ mɛniticiì.

³N yí mɔkɛ mɛciì n nɛ́ mɔkɛmu mɛciì mmɛ̀ɛ̀ bo nte kɛ̀ n yĩ́ɛ̃́tɛ́ Kuyie.

⁴We ndèkɛ kɛĩ́nkɛ̀ kɛ wɛ̃̀tɛní? We mpikú kuyɑɑkù nɛ̀ o nɔ̀ùtɛ̀? We mpɔ̃ṹ mmɛniɛ nnɛ̀ kuyɑ̀ɑ̀kù? We nhɑ̃nnɛ́ itemmɑ̀nkɛ? Dɛ yiɛ̀ nyètìrì tu bɑ? O birɛ kpɛri tú bɑ? N nɑ́kɛ́ ti.

⁵Kuyie nnɑ̀kɛ́ tì timɔu tu timɔ́mmɔnti nti, kuù kɑ̃nkɛ́ bɛ̀ɛ̀ bo ku bo dɛ̀ kudɔpìkù kɔ̃mɛ.

⁶Bɑ́ɑ́ yíɛ́ tìmɑtì ku nɑ́ɑǹtì miɛkɛ, kù yɑ̀ɑ̀ bo dɑ kpetínnɛ́ kɛ́bɛnkɛ ɑ túmɛ̀ siyɑ́ɑ̀bìsí yiɛ̀.

⁷Kuyie, n dɑ mɔ́ú dɛ̀mɑrɛ̀ dɛ̀dɛ́rɛ̀ ndɛ n fòmmu miɛkɛ, bɑ́ɑ́ dɛ̀ nni nyetɛnɛ̀.

⁸N dɛ́tinnɛ̀ siyɑ́ɑ̀bìsí, nɛ̀ mɛciìmmɛ̀, ɑ bɑ́ɑ́ yóu kɛ̀ n dɔkɛ nɑɑ́ nfɛdɑwɑnfɛ̀ yoo n dɔkɛ kpɑrìkɛ̀, nni nduɔ̀ m bo nyo mù kɛ fòùnɛ̀.