YƐKOTINƆ̀ 15:3-32

³Kuyie nwùómmu tipíìtì timɔu, kɛ wúó mbɛyɛibɛ nɛ̀ bɛsɑ̀ɑ̀bɛ̀.

⁴Tinɑ́ɑǹnɑtì duɔ̀ mufòmmu mmu, kɛ̀ tinɑ́ɑnyɛiti kɔùrì mɛyɛ̀mmɛ̀.

⁵Kuyɛìnkù kuù sènku ku cicɛ tié, wèè dɑ̀kɛ kòò ì yié.

⁶Tikpɑ̀tì diɛtì bo onitisɑ̀ù cĩ́ɛ̃̀tɛ̀ miɛkɛ nkɛ kòo nitiyɛiwe kó mucɔ̃́ntimu tú mɛyɛǹcɑɑ̀rìmɛ̀.

⁷Mɛciì nyɛmbɛ̀ ntùònko mɛciì mmɛ, tiyɛìntì kpɛrɛ í mɛ ndò.

⁸Kuyie nyí dɔ́ bɛnitiyɛibɛ pɑ̃rɛ̀, kù cɔú bɛsɑ̀ɑ̀bɛ̀ kó mubɑ́ɑmmu mmu.

⁹Kuyie nyí dɔ́ bɛnitiyɛibɛ borimɛ bìtì, kù dɔ́ bɛ̀ɛ̀ wɑnti bɛ̀mbɛ dɛ̀ɛ̀ wenni.

¹⁰Fɛnɑsɑ̃́ɑ̃̀fɛ̀ bo wèè yóu kucɛ o kpɛ́í nkɛ, wèè yetɛ itié nhò yóó kúmu.

¹¹Kuyie nyɛ̃́mu kudɔnkù dòmmɛ̀, kù nɛ́ bɑ́ nyɛ̃́ onìtì yɛ̀mmɛ̀ mmɑɑ̀?

¹²Tɛpɔ̀tɛ̀ yiɛ̀ nyí dɔ́ bɛ̀ɛ ò kpɑnnɛ̀, ò í kɔrì mɛciì nyɛmbɛ̀ borɛ̀.

¹³Kuyɛǹnɑɑtí cɑɑ́nnì kɛyììkɛ̀ nkɛ, kɑ̀ɑ yɛ̀mmɛ̀ cɑ̀ɑ̀rɛ̀ kɛ̀ɛ yɑ̃́tí kɛ́yɑ̃́tí.

¹⁴Wèè mɔ̀kɛ mɛyɛ̀mmɛ̀ weè wɑnti mɛciì nkɛ́yĩ́ɛ̃́tɛ́ dɛ̀mɑrɛ̀, dɛ̀ ɔ̃ nnɑɑti kuyɛìnkù ku yɛìntì miɛkɛ nkɛ.

¹⁵Yɛwe yɛmɔu tu mɛfɛ̃́ṹtímɛ̀ mmɛ osénnìwè borɛ̀, kɛ tú dibɑnni sɑ̃́ɑ̃̀ wèè yɛ̀mmɛ̀ nɑɑti o borɛ̀.

¹⁶Kɑ̀ɑ kpɑ ɑ kpɛrɛ kɛ dé Kuyie ndɛ̀ tɔ̃ũnɛ̀ ɑ bo ndɛ̀ mɔ̀kɛmɛ̀ kɛ bonɛ̀ iyĩ̀ɛ̃̀kɛ.

¹⁷Kɑ̀ɑ yo ntikũnfɑ̃ɑ̃̀tì kɛ bonɛ̀ diwɛ̀ì dɛ̀ tɔ̃ũnɛ̀ ɑ bo nyommɛ̀ inɑɑmɑ̀ɑ mɛkùɔ̀ nkpɛyi kɛ bonɛ̀ yɛkpɑ̀rɛ̀.

¹⁸Kɛmiɛkɛ yiɛ̀ nce nyɛkpɑ̀rɛ̀ nyɛ, wèè pĩĩ nhomɑ́ɑ̀ kòo yɛ̀ bónkùnko.

¹⁹Otɔ̃nnɛ́díétì cɛ ɔ̃ ndɑ́ɑ́tí tipotì nti, kòo nitisɑ̀ù kɔku wenni.

²⁰Dɛbirɛ dɛ̀ɛ̀ ciì dɛ̀ nɑ́ríkùnko dɛ yɛmbɛ̀ yɛ̀mmɛ̀ mmɛ, kɛ̀ dɛ̀ɛ yɛi nkɛ̀ dɛ̀ bɛ̀ sènku.

²¹Kɛ̀ kuyɛìnkù dɔ̀ɔ̀ri dɛyɛìnkpɛrɛ dɛ̀ ɔ̃ nkù nɑɑtimu, wèè toti o yɛ̀mmɛ̀ kòò dɔ̀ɔ̀ri dɛ̀ɛ̀ wenni.

²²Kòo nìtì í békú bɛtɔbɛ̀ mɛciì o kpɛrɛ bɑ́ɑ́ yie, kɛ̀ bɛnìtìbɛ̀ pɛ́u ò duɔ́ nyitié nwèe nɑ kɛ́ dɛ̀ dɔ̀ɔ̀.

²³Kòo nìtì nɔ nkɛ tɛ̃́nnìnko tinɑ́ɑǹtì dɛ̀ wennimu, kɛ nɑɑti ò bo bɛ́immɛ̀ tinɑ́ɑǹtì tìì wenni dɛ̀ dò nwèe tì bɛ́i ndìì mɔ̀nnì.

²⁴Onìtì wèè ciì ò tũ ndɛ ĩ́nkɛ̀ kó kucɛ nku mufòmmu kɔku, kɛ búútí kùù cuuti kudɔnkù.

²⁵Kuyie nhɔ̃ɔ̃ pɔntɛmu tɛpɔ̀tɛ̀ yiɛ̀ ncĩ́ɛ̃̀tɛ̀, kɛ́nkɑ̃nkɛ́ okúpokù kó tɛbɑ̀tɛ̀.

²⁶Kuyie nyí dɔ́ mɛyɛ̀mmɛ̀ yɛimɛ, tinɑ́ɑǹsɑ̀ɑ̀tì nti kù dɔ́mɛ̀.

²⁷Wèè dɔ́ idíítí mɛdiɛ̀ nhò buɔ̀ nho cĩ́ɛ̃̀tɛ̀ ntɛ, wèè í dɔ́ ticuuti kòò ɔ̃ nfòù kɛ́mɔntɛ.

²⁸Onitisɑ̀ù ɔ̃ɔ̃ totí o yɛ̀mmɛ̀ mmɛ kɛ nɛ́ nɑ kɛ́bɛ́i, kòo nitiyɛiwee sɔ̃́ntɛ́ kɛ́pĩɛ̃too tisĩ́ntɛ́nɑ́ɑǹtì.

²⁹Kuyie nyí dɔ́ bɛnitiyɛibɛ, kù kèḿmú bɛsɑ̀ɑ̀bɛ̀ kó mubɑ́ɑmmu mmu.

³⁰Fɛnɔnsɑ̀ɑ̀fɛ̀ nɑ́ríkùnko mɛyɛ̀mmɛ̀ mmɛ, kɛ̀ tinɑ́ɑǹsɑ̀ɑ̀tì yɛ̀útí muwɛ̃rímú.

³¹Bɛ̀ kpɑ̀nnɛ̀ wè o ɔ̃nnì kpɛ́í nkòò kèḿmú ò bo mɛciì nyɛmbɛ̀ kó fɛnɑfɛ miɛkɛ nkɛ.

³²Wèè yetɛ itié nwè í dɔ́ o ɔ̃nnì, wèè kemmu itié nkòò piɛti mɛciì.