Proveps-Knare Nomaniza 15:3-32

³Ra Anumzamo'a mika kaziga kefo vahete' ene, knare vahetera avua keteno nemanie.

⁴Fru kema hu'zamo'a vahe'mofo asimu ami zafagna hu'ne. Hianagi akrehe akrehe kema hu'zamo'a, vahe'mofo agu'a ahenefri.

⁵Neginagi antahizane vahe'mo'a nefa'ma azeri fatgo hiankea nontahie. Hianagi iza'o azeri fatgoma hiankema antahimo'a, knare antahiza e'nerie.

⁶Fatgo vahe'mokizmia nozamifina, fenozamo avinete. Hianagi kefo vahe'mo'za erisaza mizana, hazenke'za erigahaze.

⁷Knare antahi'zane vahe'mo'za, antahizana vahera nezamize. Hianagi neginagi antahizane vahe'mo'za, anahura osugahaze.

⁸Kefo avu'avama nehaza vahe'mo'zama, Ra Anumzamofonte'ma kre sramnama vunentaza zankura, agonete. Hianagi fatgo vahe'mo'zama haza nunamunku, Agra muse nehie.

⁹Kefo vahe'mo'ma hia avu'ava zankura, Ra Anumzamo'a agotenente. Hianagi fatgo avu'avama huzanku'ma kazigazima hia vahe'mofona, Ra Anumzamo'a avesinente.

¹⁰Fatgo kamofoma amefi humisimo'a, tusi'a hazenke erigahie. Iza'o azeri fatgohu kemofoma avesrama huntesimo'a, frigahie.

¹¹Fri' vahe'mofo kuma'mo'ene frizamo'a, Ra Anumzamofo avurera amate me'neankino, tagutumotia keno antahino hu'ne!

¹²Veganokno kema hu vahe'mo'za, azeri fatgoma hanimofona avesra hunenteno, ama' antahizane vahe'mofontera aza hinogura urava'o osugahie.

¹³Krimpamo'ma musema hu'nesigeno'a, kavu'gosafintira knare huno kizankiza hugahie. Hianagi karimpamo'ma musema osu'nesigeno'a, kavugosamo'a rugaririgahie.

¹⁴Ama' antahizane vahe'mo'za antahizama erizankura zamaganete. Hianagi neginagi antahizane vahe'mofona havi kemo'a, ne'zama'agna hugahie.

¹⁵Zamunte omane vahe'mo'za mika zupa maniza zmifina tusi'a amuho nehu'za maragu'zanetize. Hianagi muse arimpane manisimo'a, nezane tine neneno muse huvava hugahie.

¹⁶Osi'a fenoma anteneta Ra Anumzamofonkuma kore'ma huntenunazamo'a, rama'a fenoza ante'neta hazenkema erizana agaterene.

¹⁷Vahe'ma avesinentenka hozafi kamo'ma osia refko hunka ne'zamo'a, ra bulimakao afu'ma ahegino rimpagnanema refkoma huno nezana, agaterene.

¹⁸Ame' hunoma rimpama ahe vahe'mo, ha'frama hu'zana eri fore nehie. Hianagi akohenoma rimpa fru huno mani vahe'mo, ha'frama huzana erifru nehie.

¹⁹Eri'za e'ori feru'ma mani vahemofo kamo'a, ave'ave trazampima neviankna hu'ne. Hianagi mani fatgo hu'za mani vahe'mokizmi kamo'a ranka me'nege'za nevaze.

²⁰Ama' antahi'zama me'nea mofavremofo nefa'a, muse nehie. Hianagi neginagi ne'mo'a, nererana kefenkaminetre.

²¹Antahizama'a omane vahe'mo'a, neginagi avu'avazankura muse hugahie. Hianagi ama' antahizane vahe'mo'a, knare zanke nehuno, fatgo kante nevie.

²²Knare antahizama vahepinti e'orinenka mago'a zama retroma hunaku'ma hananana, ana zamo'a forera osugahie. Hianagi rama'a knare antahintahima eritenka, retroma hanana zamo'a, efore hugahie.

²³Fatgo hunoma kenonama hanimo'a, muse hugahie. Hagi kna fatgore'ma huga kema hania kemo'a, knare'zantfa hugahie.

²⁴Knare antahi'zane vahe'moma asimu erisia kamo'a anagamu marenerino, fri vahe kumapima uramizankura kegva hunente.

²⁵Ra Anumzamo'a avufama eri antesgama hanimofona nomanizama'a, eri haviza hugahie. Hianagi kento a'mofo fenoma'ane nonkuma'a, kegva huntegahie.

²⁶Kefo avu'avazama hu antahizama retroma huzankura, Ra Anumzamo'a avesra huno agonete. Hianagi avusese hu'nea kema huzankura, Agra muse nehie.

²⁷Iza'o mika'za rehatri huno nagrike zanema hu' vahe'mo'a, hazenke erino naga'afi efregahie. Hianagi havi kazigatima masavema huno mizama sezankuma avesrama huntesimo'a, knare huno manigahie.

²⁸Fatgo agu'ane vahe'mo'a agesa antahiteno, kenona nehie. Hanki kefo vahe'mofo agipintera, kefoge atineramie.

²⁹Ra Anumzamo'a kefo zamavu'zmavama nehaza vahe'mokizmirera, afete nemanie. Hianagi fatgo vahe'mokizmi nunamunte, agesa anteno antahinezamie.

³⁰Musema nehia vahe'mofo avufima kesanana, muse hugahane. Knarezama hu'nesia zamofo agenkema hu ke'mo'a, vahe'mofona zaferina kampina azeri fru hugahie.

³¹Iza'o so'e nomanizama manisieguma, azeri fatgoma hu kema nehinkeno antahisimo'a, knare antahizane vahe'mozama manisaza amunompi manigahie.

³²Iza'o azeri fatgo hu kema nehanigeno ontahisimo'a, agra'a azeri haviza nehie. Hianagi iza'o azeri fatgo hu kema nehinkeno, antahisimo'a, ama' antahintahi erigahie.