Tɛnɛ Faalaaliiti 15:3-32

³Ɠɔoɠɔ GALAGI ɠaazuʋɛ ɠa adaʋɛ pɛ, é ɗa nu ɲɔiti ta nu ʋagɔiti sumɔ.

⁴Nu laawoo ʋagɔiti kɛɛʋɛ eɠɛ zɛnvu wulu wolai, kɛlɛ faa ɲɔu ɠɛ nɛgi ɠa ɗa ziiɠoloɠologi ɠɛ.

⁵Ɠimalala nui ɠa ɗa kɛɛɠɛ ná-tɛnɛ gooiti pɛlɛʋɛlɛ, kɛlɛ zɔi é yeezeizu zelilomai wu, naa ɠa ɓɔɠɔ lɛɛzu ga ɠima nu.

⁶Naavolo mɔinmɔin ka é telebo nui ná-pɛlɛi wu, kɛlɛ nii kpein nu ɲɔi sɔlɔɔsu, toɠa ɗa ɠɛ ga ziizoolɛi ma ungi.

⁷Ɠima nuiti daawooi ɠa ɗa faaɠwɛgi vaza, kɛlɛ faaɠaaɠaalala nuiti ziimaʋɛ la ɠana.

⁸Ɠɔoɠɔ GALAGI maaɲɛɛi ɠa ga faa ɲɔu ɠɛ nuiti ta-zalaɠaiti, kɛlɛ sɔle nuiti ta-ƓALA maanɛɛnɛ wooiti nɛɛʋɛ bɛ.

⁹Ɠɔoɠɔ GALAGI maaɲɛɛi ɠa ga faa ɲɔu ɠɛ nui ziɛ ʋelei, kɛlɛ naama nui nɛɛʋɛ bɛ, nii é ʋilɛsu telebodai ʋolu.

¹⁰Zɔi é zeɠezu faa ʋagɔi ʋolu, faa wola ɠa la ma ga maaɠolo, zɔi é zelilomai wɔinzeɠezu, naa undaa ɠa ʋili.

¹¹Ɠɔoɠɔ GALAGI gɔvɛalaazu ta undaaʋili zeɠezaɠai, zu vaiti kpein kwɛɛ, nuɓusɛiti zii ɠwɛɛ fai ɠa ga leeni tɔun bɛ!

¹²Waso nui nɛɛbɛ vaa la ga nu zelii lo ma, é la ɗa ga li ɠima nuiti pɔ bɛ.

¹³Koozunɛɛi ɠa ɗa nu ɠaazuʋɛ volo, kɛlɛ ziiɓɔlɔi ɠa ɗa nu ɠaalɛi.

¹⁴Keleɠele nui ɠa ɗa ɠaaɓa faa maaɠɔli vai ma yeenɔpɛ, kɛlɛ ɠimalala nui ɠɔnɔgi ɠa ɗa ɠɛ ga ɠimalala vaiti nɔ.

¹⁵Maanɔɠɔ nui zii ma voloi kpein ɲɔuʋɛ, kɛlɛ zɔi undaanɛai, naa ɠa ɗa ɠɛ fɛti ɠula vai laawu nɔ ɠɔ.

¹⁶Fizɔgɛ nu ɗa ani go nɔ zɔlɔɔ, è ɠɛ ga Ɠɔoɠɔ GALAGI ɠaazuluaba nu, è ʋa li naavolo wola zɔlɔɔsu, nii ziiɓɔlɔi polu.

¹⁷Fizɔgɛ nu tufa wuulugi ma laamii wo, kpɛtɛai nɛɛbɛi zu, è ʋa li nikɛ wulɔi miizu, ni wɔinzeɠemai ɠa ná.

¹⁸Ziiɠula nui ɠa ɗa kpɔɛiti suwɔɔlɔ, kɛlɛ zɔi ziiɠaa la wana fala, naa ɠa ɗa sakpegiti gaayei.

¹⁹Ɲaka nui ná-pelei ɠɛɛʋɛ eɠɛ ɠain sasai, kɛlɛ sɔle nuiti ta-ʋelei ɠaa ɠa sɔli.

²⁰Ɠima loun zunui ɠa ɗa kɛɛɠɛ ɠoozunɛ, kɛlɛ faaɠaaɠaalala zunui ɠa ɗa dee ʋɛlɛʋili.

²¹Ɠimalalai ɠa ga koozunɛɛi naama nui ʋɛ, nii balagai faaɠaaɠai ma, kɛlɛ zunui keleɠelegai, toɠa ɗa ziɛ sɔledai zu.

²²Faa mɔinmɔin ka ɗa ɠazaʋi, ti la zolooga tɔɔzei gaazaɠatalai ʋa, kɛlɛ ti zu ɠa ɗa ɓɛtɛ, ni tɛnɛbo nua ta ná.

²³Koozunɛ vaa ʋe zunui ʋɛ, siɛgi zu é ɓɔɠɔ wooɠaaʋotegi veezu la, ziilɛi faa ʋe, ni kpɔɛi a wona ga bo yeeɠɛɠala!

²⁴Keleɠele nui ɠa ɗa ziɛ ga pelei, nii é lɛɛzu geezuʋɛ zɛnvui ʋɔ bɛ, naa ɠa kizosu gɔvɛalaazu ma, nii é buu ʋelei.

²⁵Ɠɔoɠɔ GALAGI ɠa ɗa waso nuiti ta-ʋɛlɛi ɠoloɠolo, kɛlɛ toɠa ɗa ɓaa poanzai ɠɔligiti maazu.

²⁶Ɠɔoɠɔ GALAGI maaɲɛɛi ɠa ga kisiɛ ɲɔiti, kɛlɛ kpɔɛ ʋagɔiti ka a ɗa va ti wu.

²⁷Zɔi é wɔinni ʋele-o-ʋele, é ɓɛtɛ, toɠa ɗa ná-pɛlɛyeɠei lɔ kpɔlɔi zu, kɛlɛ zɔi é lobɛanii wɔinzeɠezu, naa zii zu ɠa ɠooza.

²⁸Telebo nui ɠa ɗa ɠigaiziɛ, aisa é ʋa gooɠaaʋotegi ve, kɛlɛ faa ɲɔu ɠɛ nuiti ta ɗa faa ɲɔi vaza ga laaʋɛ.

²⁹Ɠɔoɠɔ GALAGI maaɠoozaʋɛ faa ɲɔu ɠɛ nuiti ba, kɛlɛ toɠa ɗa woilo telebo nuiti ta-maanɛɛnɛ wooiti ma.

³⁰Nuɓɔɠɔlai ma ɠaazuʋɛ ɠa ɗa koozunɛɛi ve, nui a woo niinɛ ʋagɔi mɛnina, toɠa ɗa iɲɔdɔ, é zeeli ma ɠaeiti ma.

³¹Zɔi é woilosu tɛnɛ gooiti ma, ta ɓɔ ba etea ziɛi zu, naa zeizu ɠa ɠima nuiti saama.

³²Zɔi é ɠɛlɛzu ga zelii mina lo ma, naa ɠa ɓɔɠɔ ʋɛlɛʋɛlɛsu, kɛlɛ zɔi é woilosu tɛnɛ gooiti ma, naa ɠa ɠi pagɔiti sɔlɔɔ.