Lukas 15

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹A SAUNOPWEI o me dipan akan karos ap kai dong i pwen rong i.

²A Parisär o saunkawewe kan lipaned indada: Ol men et kin kompokeki me dipan akan o iang irail sakasak.

³A a kotin masani ong irail karaseras wet:

⁴Is aramas re omail me na sip epuki, a ma amen irail salongalar me so pan pwilikidi ir duekduemen nan wel ap raparapaki me salongalar, lao a pan diarada i?

⁵A lao diarada i, a kidang pon pop a pereperen.

⁶A lao pure dong deu a, a kin eker pena kompokepa kan o men imp a kan indai ong irail: Komail iang ia perenda, pwe i diaradar nai sip me salongalar.

⁷I indai ong komail, nan iduen peren pil pan mi nanlang pweki me dipan me ta men, me kalula, sang duekduemen me pung ap sota mau ong kalula.

⁸O is li o me na denar eisok, eu ap salongala sang, me so pan isikada lamp o koke im o, o raparapaki mau, lao a pan diarada?

⁹A lao diaradar i, a kin eker pena kompokepa kan o men imp a kan indai ong irail: Komail iang ia perenda, pwe i diarada ai denar o, me salongalar.

¹⁰Nan I indai ong komail, iduen peren mi ren tounlang en Kot akan, pweki me dipan me ta men, me kalula.

¹¹A kotin masani: Aramas amen mia, me na ol riamen.

¹²A me tikitik re ’ra indai ong sam a: Sam ai, kotiki dong ia pwais ai en soso, me udan ai. I ari nene ong ira ara dipisou kan.

¹³A murin ran akai me tikitik ren ol oko ki pena a dipisou karos, ap sailokalang sap doo, wasa a kasela mal a kapwa kan nin tiak sued.

¹⁴A lao kamuse weita a kapwa karos, lek lapalap ap pwaida sap o, i ari dupokalar.

¹⁵I ap koieila dodok ren me pweledan sap o men. I ap kadarala i, pwen kamanga na pwik kan.

¹⁶I ari inong iong, kangkang wantuka kai, me pwik kin namenam, a sota me mueid ong i.

¹⁷A kadekadeo i lao lolekongalar, ap indada: Ladu me depa mi ren sam ai, me kan ar manga me rak, a ngai pan mekila so kan ai manga.

¹⁸I pan uda purela ren sam ai indai ong i: Sam ai, i wiadar dip ong nanlang o ong komui.

¹⁹I solar warong adaneki noumui putak, komui ari wia kin ia ladu ’mui men.

²⁰I ari uda purela ren sam a. A ni a mi wasa doo, sam a kilangada i, ap pokela, pitipiti dong i o polodi i, metik i.

²¹A putak o indai ong i: Sam ai, i wiadar dip ong nanlang o ong komui, i solar war ong adaneki noumui putak.

²²A sam masani ong na ladu kan: Wado likau kasampwal o kalikauwia kida i, o ki ong ring ni sondin pa a, o sut ni nä a kan.

²³O wado kau pul wi o kamela, pwe kitail en kang o pereperen.

²⁴Pwe nai putak men et melar ap mauredar, a salongalar ap diarokadar. Irail ari perendar.

²⁵A na putak laud mi nan sap o. Ni a pure dong koren iong im o, ap rongadar kakaul o kakalek,

²⁶Ap kalelapok ren ladu men duen ar wiawia.

²⁷A indang i: Ri omui ol puredo, sam omui ap kamela kau pul wi o, pwe a diaradar i memaur o kelail.

²⁸A ap makara kida o sota men pedelong, sam a ap pedoi dong re a poekipoeki.

²⁹A a sapeng indang sam a: Kom mangi, par toto me i papa komui, o i saikenta kawela eu omui masan akan, a kom sota kotiki ong ia kisin kut amen, i en kamadipeki kompoke pai kan.

³⁰A noumui putak men et lao kodo, murin a kamuse wei a dipisou ren me sued akan, komui ap isik ong i kau pul wi o.

³¹Sam a ap masani ong i: Nai seri, koe kin mimieta re i ansau karos, o ai meakaros me om.

³²Me mau, koe en peren o insenemau. Pwe ri om ol men et melar, ap mauredar, a salongalar ap diarokadar.