1Se Zelopehadi si na tuna koreo e Hepa sa tuna koreo e Qileadi. Se Qileadi hie si na tuna koreo e Makiri sa tuna Manase, sa tuna koreo e Zosepa. Zelopehadi hie si loke tuna koreo ba na vineki mo sari na tuna: Ari Mala, Noa, Hoqola, Milika meke Tiriza.
2La si arini meke turu pa kenuna e Mosese meke Eleaza sa hiama, meke sari na koimata pa doduruna sa butubutu pa sasadana sa Ipi Hopena, meke zama,
3“Sa tamamami si ele mate pa soloso qega meke loke tuna koreo. Na lopu somana nia sa sa puku butubutu te Kora, saripu varipera la koe Zihova, nana sinea mo telena si mate nia sa.
4Na loke tuna koreo si asa, na vegua ke kote murimuri taloa tu sa pozana sa tamamami koari pa Izireli. Paqaha poni gami pepeso koari na turaṉa mami pa tutidia ri na tiatamamami.”
5Paleke la nia e Mosese sa ginugua hie koe Zihova,
6meke zama koa sa se Zihova,
7“Gua sapu tepa ia rina tuna vineki e Zelopehadi si toṉoto; paqaha poni pepeso koari na turaṉadi ri na tiatamadia. Va malumi pude di vari teteini sari na dia tinago koa rini.
8Tozini sari na tinoni Izireli, pana mate si keke tie meke loke tuna koreo, sa tuna vineki si kaqu tagoa sa pepeso.
9Be loke tuna vineki si asa, sa tasina koreo si kaqu tagoa sa pepeso.
10Be loke tasina koreo si asa, sa tasina sa tamana, si kaqu tagoa si asa.
11Be loke tasina koreo, babe buhina si asa, sa turaṉana soti sapu tata, si kaqu tagoa si asa. Kaqu vagia sa pude nana soti si asa. Sa tinarae hie si kaqu kopuni ri na tie Izireli sina Arau Zihova si ele poni gamu si arini.”
12Meke zama la koe Mosese se Zihova, “Mu ene sage la koasa toqere Abarimi, mamu la dogoria sa popoa sapu vala nia Rau koari na tinoni Izireli.
13Pa mudina sapu ele dogoria goi si asa, si kaqu mate tugo si goi, kekeṉoṉo gua tugo se Eroni sa tasimu.
14Ura koa gua sapu gamu kara beto si va karia sa Qua ginarunu pa korapa popoa qega pa Zini, sipu nominomi mae Au ri doduru tinoni Izireli koasa kolo pa Meriba, meke koromia vata gilana nia koarini sa qua ṉiniraṉira madina.” Meriba si na kolo bukaha pa Kadesi pa korapa popoa qega ta pozae Zini.
15Meke varavara la se Mosese koe Zihova,
16“Zihova Tamasa pu poni tinoa koari doduru tie pa pepeso, mamu vizatia si keke tie pude koimatani sari doduru butubutu Izireli,
17pude turu habotu pa kenudia rini pa totoso varipera, meke lopu kaqu kekeṉoṉo gua ri na sipi sapu loke dia sepati.”
18Ke zama la koe Mosese se Zihova, “Mu turaṉa vagia se Zosua tuna e Nani, sapu koa ia Maqomaqoqu, mamu va opo nia limamu, mamu va madia.
19Mu va turua pa kenuna sa hiama Eleaza meke sa doduru butubutu Izireli, mamu va madia pude pa kenudia rini pude hobe igo.
20Mamu ponia koasa sari kaiqa mua ṉiniraṉira soti, pude di va tabea ri doduru butubutu Izireli si asa.
21Kaqu turu pa kenuna sa hiama Eleaza si asa. Meke Eleaza kaqu nananasa ponia si asa sipu tavetavete nia sa sa Urimi pa kenuna e Zihova.”
22Meke tavetia tugo Mosese sapu gua garunu nia e Zihova koasa. Turaṉia sa se Zosua meke va turua sa pa kenuna sa hiama Eleaza meke doduruna sa butubutu Izireli.
23Beto asa si va opoa sa sa limana koasa, meke tozi vura nia sa si asa, gua puta tugo sapu va tumatumae nia e Zihova koasa.
