Namba 27

6

9

10

11

12

13

14

20

21

22

23

24

27

¹²Ma Apômtau kêsôm gêdêŋ Mose gebe “Ôpi lôc Abarim ônamaŋ ma ôsala gamêŋ, taŋ kakêŋ gêdêŋ lau Israel naŋ.

¹³Embe ôlic gamêŋ tau su, go naôwiŋ nêm lau amboac têwam Aron jagêwiŋ êsêac.

¹⁴Biŋ tonec êtap amagêc sa gebe taŋempêc aŋga gamêŋ sawa Sin. Gôlôac sêli aweŋ sa gêdêŋ aê, ma amagêc akô êsêac laŋôŋnêmŋa ma awa aê sa aŋga bu gebe aê ŋac dabuŋ nec atom.” Bu tau bu Meriba aŋga gamêŋ sawa Sin ŋamalac Kades.

¹⁵Ma Mose kêsôm gêdêŋ Apômtau gebe

¹⁶“Aê jateŋ Apômtau, gêŋ mateŋ jali samob nêŋ aweŋjaô ŋaAnôtô, gebe êjaliŋ ŋac teŋ sa gebe ênam gôliŋ gôlôac.

¹⁷Ŋac tau êsô-êsa êmuŋ êsêac ma êwê êsêac sêsô-sêsa, gebe Apômtaunê gôlôac tau têtôm toŋ dombaŋa, taŋ ŋacgejob masi naŋ, atom.”

¹⁸Apômtau kêsôm gêdêŋ Mose gebe “Ôkôc Nun latu Josua. Eŋ ŋac toŊalau ma u lêmam ênsac eŋ.

¹⁹Ôwê eŋ naêkô dabuŋwaga Eleasar to gôlôac samob laŋôŋnêm ma ôsakiŋ eŋ lau samob sêlic.

²⁰Ôkêŋ nêm ŋaclai ŋagêdô elom eŋ, gebe lau Israel nêŋ gôlôac samob taŋeŋ wamu eŋ.

²¹Eŋ naêkô dabuŋwaga Eleasar laŋônêm gebe êtu kênac Urim gebe êtap Apômtaunê taê gêjam sa. Josua êjatu ma Israel nêŋ gôlôac samob sêsô-sêsa sêwiŋ eŋ.”

²²Mose gêgôm biŋ, taŋ Apômtau kêjatu naŋ, ŋanô kêsa ma kêkôc Josua to gêwê eŋ jakêkô dabuŋwaga Eleasar to gôlôac samob laŋôŋnêm

²³ma gêu lêma gêsac eŋ to kêsakiŋ eŋ kêtôm Apômtau kêsôm gêjam Mose awa.