1Tônê su ma Jesu gelom bugêjactoŋ Galilaiaŋa, taŋ sêsam teŋ gebe Tiberiaŋa naŋ, ŋamakeŋ ônêŋa gêja.
2Ma lau taêsam têdaguc eŋ sêja, gebe sêlic gêŋtalô, taŋ eŋ gêgôm gêdêŋ lau gêmac naŋ.
3Jesu kêpi lôc jagêŋgôŋ sic gêwiŋ nê ŋacseŋomi.
4Ma Judanêŋ omsêga Pasa kêdabiŋ.
5Jesu gêôc mataanô sa e gêlic lau taêsam dêdêŋ eŋ, ma kêsôm gêdêŋ Pilip gebe “Aêac tanam ôli mo aŋga ondoc gebe lau tonec sêniŋ.”
6Biŋ tonaŋ Jesu kêsôm gebe ênsaê eŋ, gebe tau kêjala gêŋ, taŋ gebe êŋgômŋa naŋ.
7Ma Pilip gêjô eŋ awa gebe “Aêac embe tanam ôli mo ŋa denari 200 ma mêŋtakêŋ ŋagec-ŋagec êndêŋ êsêac êndêŋ-êndêŋgeŋ, mago oc êtôm atom.”
8Go ênê ŋacseŋominêŋ teŋ, Simon Petere lasi Andrea, kêsôm gadêŋ eŋ gebe
9“Ŋapalê teŋ kêkôc mo lemeŋ teŋ ma i luagêc tec gêmoa, mago gêŋ tecenec oc êtôm lau taêsam tonec ŋai amboac ondoc.”
10Go Jesu kêsôm gebe “Asôm gebe lau sêŋgôŋ sic.” Aŋga gamêŋ tonaŋ gêgwaŋ taêsam gêc. Amboac tonaŋ lau, taŋ sêŋgôŋ sic naŋ, amboac 5,000.
11Go Jesu kêkôc mo ma gêjam daŋge, go gêjac sam gêdêŋ lau, taŋ sêŋgôŋ naŋ, ma gêgôm i amboac tonaŋgeŋ gebe sêniŋ êtôm têntac êwiŋ.
12Seŋ e gêôc êsêac tôŋ, go kêsôm gêdêŋ nê ŋacseŋomi gebe “Anac ŋagêdôgêdô sa, gebe teŋ ênaŋa atom.”
13Mo lemeŋ teŋgeŋ tecenaŋ, mago lau seŋ e dedec ŋagêdô-gêdô gêcŋa, go sêjac sa kêsêp gadob 12 e mêŋgêc.
14Ŋamalac sêlic gêŋtalô, taŋ eŋ gêgôm naŋ, tec sêsôm gebe “Propete taŋ êmêŋ nom naŋ ŋac tau tonec biŋŋanôgoc.”
15Jesu kêjala gebe êsêac sebe sêmêŋ sêjaŋgo eŋ su ma sêkêŋ eŋ êtu nêŋ kiŋ, tec kêtaiŋ taugeŋ gêc kêpi lôc gêja.
16Kêtula, go nê ŋacseŋomi sêsêp bugêjactoŋ sêja
17e sêpi waŋ teŋ sebe sêlac sêna Kapanaum. Gamêŋ ŋakesec kêsa su, mago Jesu gêô lasê êsêac atom tageŋ,
18ma mu gêbuc ŋatêna e ŋadembom secanô.
19Sêlac e sêkêŋ gamêŋ kêtu sêga gêc waŋkuŋa, go sêlic Jesu tau kêsêlêŋ gêmoa ŋadembom ŋaôgeŋ mêŋkêdabiŋ waŋ ma têtêc tauŋ.
20Tec eŋ kêsôm gêdêŋ êsêac gebe “Aê tau tonec, atêc taôm atom.”
21Êsêac sebe nasêkôc eŋ êpi waŋ, ma eb tageŋ waŋ kêsô gamêŋ, taŋ sepeŋ naŋ.
22Ŋageleŋ lau, taŋ sêmoa bugêjactoŋ ŋamakeŋ ônêŋa naŋ, sêlic gebe waŋ teŋ kêpoac sêcluŋ gêwiŋ atom, waŋ tageŋ, ma Jesu tau gêwiŋ nê ŋacseŋomi gêja atom, nê ŋacseŋomi tauŋgeŋ sêja.
23Mago waŋ ŋagêdô aŋga Tiberia sêlac e jasêsô gamêŋ, taŋ Apômtau gêjam daŋge ma kêkêŋ mo êsêac seŋ naŋ ŋagala.
24Gêdêŋ taŋ lau sêlic Jesu to nê ŋacseŋomi laŋôŋmê naŋ, ac sêpi waŋ jasêsôm Jesu aŋga Kapanaum.
25Êsêac têtap eŋ sa gêmoa bu makeŋ, tec sêsôm gêdêŋ eŋ gebe “Mêtêmôkê, aôm gêdêŋ ondoc gômôêŋ tonec.”
26Ma Jesu gêjô êsêac aweŋ gebe “Biŋŋanô, aê jasôm tobiŋŋanôgeŋ êndêŋ amac gebe Amac asôm aê kêtu alic gêŋtalôŋa atom, ac asôm aê kêtu aeŋ mo e gêôc amac tôŋŋa.
27Aŋgôm mocsac gêŋ taniŋŋa, taŋ êtu palê naŋ atom, mago aŋgôm mocsac gêŋ taniŋŋa, taŋ ênêc e êkêŋ ŋamalac sêŋgôŋ mateŋ jali teŋgeŋŋa naŋ. Ŋamalacnê Latu oc êkêŋ gêŋ tau êndêŋ amac gebe Tama Anôtô gêlôc gêdêŋ eŋ kêtu tôŋ sugac.”
28Ma êsêac sêsôm gêdêŋ eŋ gebe “Aêac aŋgôm amboac ondoc gebe anam Anôtônê kôm.”
29Tec Jesu gêjô êsêac aweŋ gebe “Anôtônê kôm tau tonec gebe akêŋ êwiŋ ŋac, taŋ eŋ kêsakiŋ naŋ.”
30Ma êsêac sêsôm gêdêŋ eŋ gebe “Aôm ôŋgôm gêŋtalô ondoc gebe aêac alic ec akêŋ êwiŋ aôm. Aôm ôŋgôm asageŋ.
31Tameŋi tec seŋ mana aŋga gamêŋ sawa kêtôm biŋ, taŋ teto gêc naŋ gebe ‘Eŋ kêkêŋ mo aŋga undambê gêdêŋ êsêac seŋ.’”
32Go Jesu kêsôm gêdêŋ êsêac gebe “Biŋŋanô, aê jasôm tobiŋŋanôgeŋ êndêŋ amac gebe Mose kêkêŋ mo aŋga undambê gêdêŋ amac atom. Mo ŋanô undambêŋa tonaŋ Tamoc tau kêkêŋ gêdêŋ amac,
33gebe ŋac, taŋ aŋga undambê kêsêp gêmêŋ ma kêkêŋ ŋamalac sêŋgôŋ mateŋ jali naŋ, tec kêtu Anôtônê mo.”
34Ma êsêac sêsôm gêdêŋ eŋ gebe “Apômtau, ôkêŋ mo tonaŋ êndêŋ aêac endeŋ tôŋgeŋmaŋ.”
35Tec Jesu kêsôm gêdêŋ êsêac gebe “Aê tauc tec katu mo ŋamalac sêmoa mateŋ jaliŋa tau. Ŋac taŋ êndêŋ aê êmêŋ naŋ, mo êjô eŋ êtiam atom. Ma ŋac, taŋ êkêŋ êwiŋ aê naŋ, bu êjô eŋ êtiam atomanô.
36“Aê tec kasôm gêdêŋ amac su gebe Amac alic aêgac, mago akêŋ gêwiŋ atom.
37Gêŋ samob, taŋ Tamoc kêkêŋ gêdêŋ aê naŋ, oc êndêŋ aê êmêŋ ma ŋac teŋ embe êndêŋ aê êmêŋ, oc jamasuc eŋ atom.
38Aê kasêp aŋga undambê gamêŋ gebe jaŋgôm tauc ŋoc biŋ êtu tôŋ atom, jaŋgôm ŋac-kêsakiŋaêwaga nê biŋ êtu tôŋ.
39Ma ŋackêsakiŋ-aêwaga tau nê biŋ amboac tonec gebe gêŋ samob, taŋ kêkêŋ gêdêŋ aêŋa naŋ, janam ŋateŋ sapu atom, jaŋu samob sêndi sa êndêŋ bêc ŋamuŋa.
40Tamocnê biŋ tau tonec gebe lau samob, taŋ sêlic Latu ma sêkêŋ gêwiŋ eŋ naŋ, gêŋgôŋ mateŋ jali teŋgeŋ ma aê êŋu êsêac sêndi ŋa êndêŋ bêc ŋamuŋa.”
41Juda sêli aweŋ sa kêtu biŋ, taŋ kêsôm gebe “Aê mo kasêp aŋga undambê gamêŋ naŋŋa.”
42Ma êsêac sêsôm gebe “Ŋac tonec Josep latu Jesu me masi. Têna agêc tama tec tajalagac. Ma amboac ondoc tec galoc eŋ kêsôm gebe Aê kasêp aŋga undambê gamêŋ nec.”
43Tec Jesu gêjô êsêac aweŋ gebe “Ali awem sa atom.
44Ŋac teŋ kêtôm gebe tau êndêŋ aê êmêŋ atom. Tamoc taŋ kêsakiŋ aê gamêŋ naŋ, embe ê eŋ, go aê jaŋu eŋ êndi sa êndêŋ bêc ŋamuŋa.
45Teto gêc propetenêŋ buku gebe ‘Anôtô oc êndôŋ ŋamalac samob.’ Ma samob, taŋ sêŋô Tamocnê biŋ ma sêkôc kauc aŋga ênê naŋ, tec dêdêŋ aê sêmêŋ.
46Teŋ gêlic Tamoc atom, ŋac tageŋ, taŋ kêsa aŋga Anôtô tau nê naŋ, taugeŋ tec gêlic tama.
47Biŋŋanô, aê jasôm tobiŋŋanôgeŋ êndêŋ amac gebe Eŋ taŋ kêkêŋ gêwiŋ naŋ, gêŋgôŋ mata jali teŋgeŋ.
48Mo ŋamalac gêŋgôŋ mateŋ jaliŋa aê.
49Tamemi seŋ mana aŋga gamêŋ sawa, mago sêmac êndu.
50Mo tecenec kêsêp aŋga undambê gêmêŋ gebe teŋ embe êniŋ oc êmac êndu atom.
51Mo mata jali, taŋ kêsêp aŋga undambê gêmêŋ naŋ aê. Ŋamalac teŋ embe êniŋ mo tau tonec, oc êŋgôŋ mata jali teŋgeŋ. Ma mo tau, taŋ aê jakêŋ naŋ, tauc ôlic tec jakêŋ gebe ŋamalac samob sêŋgôŋ mateŋ jali.”
52Judawaga aweŋsuŋ gêôc ka tauŋ ma sêsôm gebe “Amboac ondoc, ŋac tonec kêtôm gebe êkêŋ nê ôli aêac taniŋ me.”
53Tec Jesu kêsôm gêdêŋ êsêac gebe “Biŋŋanô, aê jasôm tobiŋŋanôgeŋ êndêŋ amac gebe Amac embe aniŋ Ŋamalacnê Latunê ôli to anôm ênê dec atom, oc matem jali ŋam ênêc amacŋa atom.
54Eŋ taŋ geŋ aêŋoc ôlic to gênôm aêŋoc dec naŋ, gêŋgôŋ mata jali teŋgeŋ, ma aê oc jaŋu eŋ sa êndê bêc ŋamuŋa,
55gebe aêŋoc ôlic kêtu gêŋ taniŋŋa ŋanô tau, ma aêŋoc dec kêtu gêŋ tanômŋa ŋanô tau.
56Eŋ taŋ geŋ aêŋoc ôlic to gênôm aêŋoc dec naŋ, gêmoa aê ŋalelôm ma aê gamoa eŋ ŋalêlôm.
57Tamoc mata jali kêsakiŋ aê gamêŋ, ma aê tec gamoa matoc jali kêtu Tamocŋa. Ma eŋ taŋ geŋ aê naŋ, êŋgôŋ mata jali êtu aêŋa amboac tonaŋgeŋ.
58Mo tau, taŋ kêsêp aŋga undambê gêmêŋ naŋ, kêtôm mo, taŋ tamemi seŋ-seŋ ma sêmac êndu naŋ atom. Eŋ taŋ geŋ mo tonaŋ êŋgôŋ mata jali teŋgeŋ.”
59Biŋ tonaŋ Jesu kêsôm gêdêŋ kêdôŋ mêtê gêmoa lôm Kapanaumŋa.
60Ênê ŋacseŋomi gwalêkiŋ sêŋô biŋ tonaŋ ma sêsôm gebe “Biŋ tonaŋ ŋawapac sec. Asa kêtôm gebe êkêŋ taŋa.”
61Jesu kêjala gêc tau gebe nê ŋacseŋomi sêli aweŋ sa, tec kêsôm gêdêŋ êsêac gebe “Biŋ tonec kêtu kasec amac me.
62Ma embe alic Ŋamalacnê Latu êmu êpi gamêŋ, taŋ andaŋgeŋ gêŋgôŋ naŋ êna, oc amboac ondoc.
63Ŋalau tageŋ êkêŋ ŋamalac sêŋgôŋ mateŋ jali. Ôliŋ oc ênam sa naeo. Biŋ taŋ kasôm gêdêŋ amac su naŋ, tau ŋalau to mata jali.
64Mago amacnêm ŋagêdô sêkêŋ gêwiŋ atom.” Jesu kêsôm biŋ tonaŋ gebe kêjala êsêac, taŋ sêkêŋ gêwiŋ eŋ atomŋa naŋ, ma kêjala ŋac, taŋ eoc eŋ lasêŋa naŋ kawanaŋgeŋ.
65Tec kêsôm gebe “Kêtu tonaŋŋa tec kasôm gêdêŋ amac gebe Ŋac teŋ kêtôm gebe tau êndêŋ aê êmêŋ atom, Tamoc êlôc êndêŋ eŋ acgom.”
66Gêdêŋ tonaŋ ênê ŋacseŋomi gwaŋkiŋ sêwi eŋ siŋ sêsêlêŋ sêwiŋ eŋ kêtiam atom.
67Tec Jesu kêsôm gêdêŋ êsêac lau 12 gebe “Ma amac abe aêc ana amboac tonaŋgeŋ me.”
68Ma Simon Petere gêjô eŋ awa gebe “Apômtau, aêac oc andêŋ asa ana, aŋgôŋ mateŋ jali teŋgeŋ ŋam gêc aômgeŋ nêm, biŋ.
69Ma aêac akêŋ gêwiŋ to ajala gebe Anôtônê ŋac dabuŋ aôm.”
70Go Jesu gêjô êsêac aweŋ gebe “Aê kajaliŋ amac lau 12 sa me masi. Mago amacnêm ŋac teŋ kêtu Sadaŋnê ŋac.”
71Eŋ kêsôm biŋ tonaŋ kêpi Simon Isariot latu Juda, taŋ gebe eoc eŋ lasê naŋ. Êsêac lau 12 nêŋ ŋac teŋ eŋ.
