1Jesu kejala gebe Parisai sêŋô eŋ gêjam lau taêsam ôkwi têtu ŋacseŋomi to kêsagu lau kêlêlêc Joaŋ ŋawae,
2Jesu tau kêsagu lau atom, ênê ŋacseŋomigeŋ sêgôm,
3tec gêwi Judaia siŋ ma gêmu gêja Galilaia kêtiam.
4Gamêŋ tonaŋ ŋaintêna tageŋ kêsa Samariaŋageŋ gêja.
5Tec eŋ kêsêIêŋ e gêô lasê malac Samariaŋa teŋ ŋaê Sukar gêc kôm, taŋ Jakob kêkêŋ gêdêŋ latu Josep naŋ ŋagala.
6Ma Jakobnê bumata kêpoac tonaŋ. Jesu kêsêlêŋ e têkwa gêbac tec gêŋgôŋ bumata tau, ma oc amboac kêkô ŋaluŋgeŋ.
7Go awê teŋ aŋga Samaria kêsa gêmêŋ gebe êtê bu. Tec Jesu kêsôm gêdêŋ eŋ gebe “Ôkêŋ bu mêŋjanôm.”
8Gêdêŋ tonaŋ Jesunê ŋacseŋomi sêsa malac sêja sebe sênam ôli mo.
9Ma awê Samariaŋa tonaŋ kêsôm gêdêŋ eŋ gebe “Aôm Juda ma aê awê Samariaŋa, mago amboac ondoc tec koteŋ gebe jakêŋ bu aôm ônôm nec.” (Gebe Juda to lau Samaria nêŋ biŋ gelom tau atom.)
10Go Jesu gêjô eŋ awa gebe “Aôm embe ôjala gêŋ, taŋ Anôtô kêkêŋ naŋ, to ŋac taŋ kêsôm gêdêŋ aôm gebe Ôkêŋ bu mêŋjanôm naŋ, go aômgeŋ oteŋ eŋ gebe êkêŋ bu mata jaliŋa êndêŋ aôm.”
11Ma awê kêsôm gêdêŋ eŋ gebe “Apômtau, aômnêm laclu masi ma bu nec gacgeŋ kêsêp gêja su, ma aôm oc ôkôc bu mata jaliŋa tau aŋga ondoc.
12Aêac tameŋi Jakob kêkêŋ bumata tonec gêdêŋ aêac. Êsêac to latui ma nê bôc sênôm bu tau. Aôm kôlêlêc eŋ su me.”
13Go Jesu gêjô eŋ awa gebe “Lau samob, naŋ sênôm bu tonec, oc êjô êsêac êtiam.
14Mago teŋ embe ênôm bu, taŋ aê oc jakêŋ êndêŋ eŋ naŋ, oc bu êjô eŋ êtiam atom, êôc eŋ tôŋ endeŋ tôŋgeŋ. Gebe bu, taŋ aê jakêŋ êndêŋ eŋ naŋ, êtu bumata êpulu aŋga ênê ŋalêlôm ma êkêŋ eŋ êŋgôŋ mata jali teŋgeŋ.”
15Tec awê tau kêsôm gêdêŋ Jesu gebe “Apômtau, ôkêŋ bu tonaŋ êndêŋ aê acgommaŋ, gebe bu êjô aê êtiam atom ma jamêŋ tonec êtu jatê buŋa êtiam atom.”
16Ma Jesu kêsôm gêdêŋ eŋ gebe “Ôna ômôêc nêm akweŋ, agêc amu amêŋ tonec.”
17Tec awê gêjô eŋ awa gebe “Aêŋoc akweŋ masi.” Go Jesu kêsôm gêdêŋ eŋ gebe “Kôsôm jagêdêŋ gebe nêm akweŋ masi.
18Aôm gôjam ŋac lemeŋ teŋ su, ma ŋac, taŋ galoc gôjam gômoa naŋ, nêm akweŋ eŋ atom. Tec kôsôm jagêdêŋ.”
19Ma awê kêsôm gêdêŋ eŋ gebe “Apômtau, aê galic aôm propete teŋ.
20Aêac tameŋi teteŋ mec aŋga lôc tônê, ma amac tec asôm gebe ateŋ mec ŋamala gêc Jerusalem.”
21Go Jesu kêsôm gebe “Awê, ôkêŋ êwiŋ aê gebe noc teŋ oc mêŋêsa, naŋ ateŋ mec êndêŋ Tamoc aŋga lôc tônê to Jerusalem atom.
22Amac tonaŋ ateŋ mec gêdêŋ ŋac, taŋ ajala eŋ sapu naŋ, ma aêac tec ateŋ gêdêŋ ŋac, taŋ ajala eŋ naŋ, gebe Anôtô ênam ŋamalac kêsi ŋamoasiŋ êsa aŋga Judanêŋ.
23Mago noc oc mêŋêsa, ma noc tau kêdabiŋ su, ma êsêac, taŋ teteŋ mec ŋanô naŋ, oc teteŋ êndêŋ Tamoc toŋalau ma tobiŋŋanôgeŋ. Tamoc tec gesom lau, naŋ teteŋ mec amboac tonaŋ êndêŋ eŋ.
24Anôtô eŋ Ŋalau, ma êsêac, taŋ teteŋ mec êndêŋ eŋ naŋ, teteŋ toŋalau ma tobiŋŋanôgêŋ.”
25Ma awê kêsôm gêdêŋ eŋ gebe “Aê kajala gebe Mesia, taŋ sêsam eŋ sebe Kilisi naŋ, oc êmêŋ. Êndêŋ noc êmêŋŋa, oc êwa biŋ samob ŋam sa êndêŋ aêac.”
26Tec Jesu kêsôm gêdêŋ eŋ gebe “Ŋac tau aê, tec kasôm biŋ gêdêŋ aôm.”
27Gêdêŋ tonaŋ ênê ŋacseŋomi sêô lasê e têtakê, gebe gêjam biŋgalôm gêwiŋ awê teŋ. Mago nêŋ teŋ kêsôm gebe “Aôm gobe amboac ondoc,” me “Aôm kôsôm asageŋ gêdêŋ eŋ,” nec atom.
28Awê tau gedec nê ku kêkô ma gêja malac jakêsôm gêdêŋ lau gebe
29“Amêŋ alic ŋac teŋ, tê kêsôm ŋoc gêŋ, taŋ gagôm naŋ, samob lasê nê. Oc moae Kilisi tau me.”
30Tec êsêac sêsa aŋga malac dêdêŋ eŋ sêja.
31Gêdêŋ ŋasawa tonaŋgeŋ ênê ŋacseŋomi jateteŋ eŋ gebe “Mêtêmôkê, ôniŋ gêŋ.”
32Tec eŋ kêsôm gêdêŋ êsêac gebe “Aêŋoc mo teŋ tec gêc, amac ajala atom.”
33Ma ênê ŋacseŋomi sêsôm gêdêŋ tauŋ gebe “Ŋac teŋ kêkêŋ gêŋ taniŋŋa gêdêŋ eŋ me.”
34Tec Jesu kêsôm gêdêŋ êsêac gebe “Aêŋoc mo tonec gebe jaŋgôm ŋac, taŋ kêsakiŋ aê gamêŋ naŋ, nê biŋ êtu tôŋ to janac dabiŋ ênê koleŋ.
35Amac asôm gebe ‘Ajôŋ aclê ênaŋa acgom, go tajoŋ kôm ŋanô sa,’ asôm me masi. Ma aê tec jasôm êndêŋ amac gebe Aôc matemanô ŋa alic gêŋ kômŋa gebe mo tau ŋakwac kêtu sôlôcgac.
36Ŋac-kejoŋ-sawaga kêkôc nê ŋaôli tec gêmoa ma gêjac ŋanô sêŋgôŋ mateŋ jali teŋgeŋŋa sa, e ŋackêsêgêŋwaga agêc ŋac-kejoŋ-sawaga lulugeŋ têntac ŋajam.
37Biŋ tonec biŋŋanô gebe ŋac teŋ kêsê ma ŋac teŋ kejoŋ ŋanô sa.
38Aê kasakiŋ amac gebe akôc kôm, taŋ ajam atom naŋ, ŋanô sa. Lau teŋ gêjam ŋakôm su, ma amac akôc êsêac lemeŋgêdô su.”
39Lau Samaria taêsam aŋga malac tonaŋ sêkêŋ gêwiŋ eŋ kêtu biŋ, taŋ awê kêsôm lasê gêdêŋ êsêac naŋŋa gebe “Eŋ kêsôm aêŋoc gêŋ, taŋ gagôm naŋ, samob gêdêŋ aê.”
40Amboac tonaŋ lau Samaria dêdêŋ eŋ sêja ma teteŋ eŋ gebe êmoa êwiŋ êsêac. Tec eŋ gêmoa gamêŋ tonaŋ kêtôm bêc luagêc.
41Lau taêsam kêlêlêc sêkêŋ gêwiŋ eŋ kêtu eŋ tau nê biŋŋa,
42ma sêsôm gêdêŋ awê tau gebe “Aêac akêŋ gêwiŋ kêtu aômnêm biŋŋageŋ atom, gebe aêac tauŋ aŋô to ajalagac gebe ŋac tecenec kêtu ŋamalac samob nêŋ kêsiwaga biŋŋanô.”
43Bêc luagêc tonaŋ gêjaŋa, go Jesu gêdi aŋga tonaŋ gêja Galilaia.
44Eŋ tau tec kêsôm lasê gebe “Propete teŋ oc tetoc eŋ sa aŋga tau nê malac atom.”
45Gêdêŋ taŋ jagêô lasê Galilaia naŋ, lau Galilaiaŋa sêkôc eŋ sa kêtu sêlic gêŋ samob, taŋ gêgôm gêdêŋ om gêmoa Jerusalem naŋŋa, gebe tauŋ sêlic om tonaŋ sêwiŋ.
46Amboac tonaŋ gêmu gêja Kana Galilaiaŋa, taŋ gêjam bu ôkwi kêtu wain naŋ. Kiŋnê ŋac teŋ gêmoa Kapanaum, naŋ latu gêmac gêc.
47Ŋac tau gêŋô Jesu aŋga Judaia gêmêŋ Galilaia ŋawae ma gêdêŋ eŋ jaketeŋ eŋ gebe êsêp êwiŋ eŋ naêŋgôm ênê latu ôli ŋajam êsa, gebe eŋ awa kêtu dambê.
48Ma Jesu kêsôm gêdêŋ eŋ gebe “Amac embe alic gêŋtalô to gêŋsêga atom, oc akêŋ êwiŋ atom.”
49Tec kiŋnê ŋac kêsôm gêdêŋ eŋ gebe “Apômtau, ôsêp ôwiŋ aê ŋagaô, gebe ŋoc ŋapalê oc êmac êndu.”
50Ma Jesu kêsôm gêdêŋ eŋ gebe “Ôna, latôm oc êmoa mata jali.” Ŋac tau kêkêŋ gêwiŋ biŋ, taŋ Jesu kêsôm gêdêŋ eŋ naŋ, ma gêja.
51Kêsêlêŋ gêmu kêsêp gêmoa ma nê sakiŋwaga sêpuc eŋ tôŋtôŋ sêja e sêsôm gêdêŋ eŋ gebe “Latôm gêmoa mata jali.”
52Eŋ kêtu kênac ockatu ŋasawa, taŋ ŋac tau ôli kêpôlac tau su naŋŋa gêdêŋ êsêac e sêsôm gêdêŋ eŋ gebe “Gêdêŋ nôgeŋ katuŋ gêmu kêsa ma ôli ŋandaŋ gawi eŋ siŋ.”
53Ma tama kêjala gebe oc kêtôm tonaŋ, tec Jesu kêsôm gêdêŋ eŋ gebe “Latôm oc êmoa mata jali.” Amboac tonaŋ êsêac to nê gôlôac samob sêkêŋ gêwiŋ Jesu.
54Gêŋtalô tonaŋ Jesu gêgôm kêtu luagêc gêdêŋ taŋ gêmu aŋga Judaia gêja Galilaia naŋ.
