1Nge ekewe aramas mi nom lon riaföü resap nonomfochofoch lon rochopwak. Me lom Kot a atekisonätiu ewe fanü Sepulon me Naftali, nge lon fansoun mwach epwe alinga ei fanü seni ewe al mi ale ngeni ewe matau watte tori ewe fanü pekilan ewe chanpupu Jortan, pwal tori ewe fanü Kaliläa, ia ekewe chon lükün Israel ra nom ie.
2Iwe, ekewe aramas mi fetal lon rochopwak ra küna eu saram mi watte, nge eu saram a pwä ngeni chokewe mi nom lon fanüen rochopwak.
3En ka achomonga pwapwan ekewe aramas o alapala ar mwänek. Ra pwapwa fän mesom usun chök ar pwapwa lupwen fansoun räs, pwal usun mwän ra pwapwa, lupwen ra ineti liaper lon maun.
4Pun ka kupi ewe waas mi chou won afarer me ewe wok ra fokun weires ren, ka akufu chon ekewe mwü mi ariaföüür usun ka akufu ekewe sounfiun Mitian me lom.
5Iwe, iteiten ipwen sounfiu sus pwal üfer mi cha lon maun repwe karala ren ekkei.
6Pun eman mönükol a uputiu rech. Kot a lifang ngenikich eman ät, i epwe ach sounemenem. Iwe, epwe iteni “Souekiek mi amwarar, Kot mi manaman, Samach mi nom tori feilfeilachök, pwal Samolun kinamwe.”
7Iwe, nemeneman epwe chök wattela, nge mwün epwe chök kinamwe fansoun meinisin. Epwe siwili Tafit lon wisan wisen king o nemeni mwün. Epwe aüetä o apöchöküla mwün ren apwüng me pwüngüöch seni ikenai tori feilfeilachök. Iwe, ewe Samol mi Unusen Manaman epwe tiliken le apwönüetä ei.
8Iwe, ewe Samol a tinala kapasen apwüng ngeni ewe mwün Israel, ir ekewe mwirimwirin Jakop.
9Iwe, ekewe aramasen Israel me chon Samaria meinisin repwe mefi pwe Kot a föri ei. Iei ra apasa fän ar sikesik me lamalamtekian letiper,
10“Ekewe imwepwül ra turula, nge sipwe chök aüetä imwesimen. Ekewe irä sikamor ra tala, nge sipwe chök siwili ngeni irä setar.”
11Nge ewe Samol mi Lapalap a amwökütü chon oputeer pwe repwe maun ngeni Israel.
12Ekewe chon Siria mi nom ötiu me ekewe chon Filistia mi nom lotou ra amasala awer o oromala Israel. Iwe, lon ekei feiengau än Kot song esap kisikisila, nge pöün a chüen afeiengaueer.
13Nge ekewe chon Israel resap ekieksefäl. Inamwo ika ewe Samol mi Unusen Manaman a feiengaueer, nge resap kul ngeni.
14Iei mine ewe Samol mi Lapalap epwe apwüngü ekewe souemwenin Israel me aramasen lon, epwe pöküela möküran me wükün lon eu chök rän.
15Iwe, ekewe souakom me ekewe aramas tekia ra wewe ngeni möküren Israel, nge ekewe soufos chofana ra wewe ngeni wükün.
16Pun chokewe ra emweni ekei aramas ra atokerela, nge chokewe mi tapwela mürir repwe feiengau.
17Iei popun ewe Samol esap echika nöür alüal, esap pwal tongei chokewe mi mäsen me ekewe fefin mi mä pwülüer. Pun ir meinisin resap niueiti Kot, ra pwal föföringau, nge kapasen awer a ngau. Iwe, lon ekei feiengau än Kot song esap kisikisila, nge pöün a chüen afeiengaueer.
18Ellet, än ekewe aramas föföringau a ngetenget usun ekkei, a ngeteri pötöwölingau me iräfölüföl, a kenala ewe wöllap pwe eu kuchun ötüöt a ötütä seni.
19Pokiten än ewe Samol mi Unusen Manaman song ewe fanü a karala, nge ekewe aramas ra usun chök amüch lon ekkei. Esap wor eman a tongei pwiin.
20Ra anenefetal ener mongö ekis meinisin, nge ra chüen echik. Ra mongö ekewe äkäekis mongö ra küna, nge resap mötüla ren. Ra mwo nge ochei en me püsin nöün.
21Ekewe aramasen Manasa me ekewe aramasen Efraim ra püsin nifengeniir. Nge ir meinisin ra ni ekewe aramasen Juta. Iwe, lon ekei feiengau än Kot song esap kisikisila, nge pöün a chüen afeiengaueer.
