1Yawey nawu Kawohrnan Rowk ngankangebarlkeng Namalngmakkaykenh nuye. Nungka wanjh ngandjarrngbom dja nganmunkeweng kore birrimarladj bininj ba ngabenbengdayhke kunwok kunmak bedberre, dja mak ngabenkangemarnbun nawu birrikangewarre bininj, dja mak ngabenmarneyime nawu kabirribongdi bininj bu kabirribebme kabirrire. Dja mak ngaye ngabenmarneyime bininj nawu kabirrihbongdi kore kubolkmunun bu bedda kabirribebme.
2Nawu Yawey nganmunkeweng ba bu ngabenbengdayhke bininj rowk bu nungka bolkkime kamre kabenbidyikarrme. Nungka wanjh kabenbun bininj nawu kabindibongkarrme God nuye bininj. Dja mak ngaye ngabenkangemarnbun bininj rowk nawu kabindimarnenalkbun nawu birridoweng bininj.
3Dja mak ngaye ngabennahnan bininj nawu kabirrihni kunred Zion bu kabindimarnenalkbun nawu birridoweng bininj. Ngaye ngabennjilngmarnbun bu kabirrimarrmarr dja yuwn bu kabirriyawoyhkukbarurren kunburle dorrengh. Ngaye ngabenkangemarnbun yiman bu ngabenkodjdelke mankalkidmak ba bu minj kabirriyawoyhkangewarreworren. Ngaye ngabenmarnbun bu bedda munguyh kabirriburlume nawu God, dja minj kabirrimarrkbaworren kore kabirridjalnjilngwarre. Bu kunmekbe wanjh bedda yiman kayime kundulkmak manbu Yawey karrudjeng dja kabirridjalkurduyime kore kunmakkenh nuye. Kunmekbekenh wanjh birriwarlahkenh bininj kabindinan djakabirriburlume nawu Yawey.
4Kaluk Yawey nuye bininj kabirriyawoyhrurrkmarnbun kunrurrk kunwern manbu rurrkwarrhmeng rowk kore kunkare birriyoy.
5Nawu birridjenbuyika bininj ngundimarnedurrkmirri. Bedda kabirrimirndenahnan ngudberre mayh, dja mak kabirribolknahnan ngudberre manmekenh karrudjindi, dja kore manrakel manbu grapes karrudjindi, wanjh bedda ngundimarnedurrkmirri.
6Ngudda wanjh bininj ngundingeybun ngudberre priests duninjh nuye nawu Yawey. Bedda ngundingeybun ngudberre “Nawu ngurrimarnedurrkmirri God kadberre.” Ngudda ngurrimang manmakmak bedberre birribuyika bininj kore birribolkbubuyikabeh, dja ngurriburlumerren bu Yawey ngunkukenwon.
7Ngudda minj ngurriyawoyhyeme, dja minj nangale ngundiyawoyhdjuhbun ngudberre. Ngaye won ngudberre manbu ngardduk kunmakmak. Ngurridjalyo kore kunbolk ngudberre, dja ngurridjalmarrmarr duninjh munguyh munguyh.
8Ngaye nawu Yawey, ngaye ngadjare bu ngudda ngurridjadmerren bu djal mandjadkenh kore mankarre, dja ngadjalwarnyak bu bininj kabirribangmen dja kabindiwirrihme birribuyika bininj, dja kabirrikurduyime kunwarre. Ngaye minj ngakurren, dja woybukkih ngaye ngabenkarremulewan nawu bininj ngardduk. Ngaye wanjh ngabenmarnewokkurrmerren bedberre manbu kunwok kahdjaldi munguyh munguyh.
9Kaluk yerrekah nawu mawahmawah bedberre kabirringeykimukmen kore kubolkbubuyika rowk. Birriwern bininj kabindiburrbun bu bedda ngardduk bininj. Birriwern bininj kabindinan wanjh kabindiyolyolme bu kabirriyime, “Yoh, bedda wanjh nawu Yawey benmarnekurduyimeng kunmak!”
10Nawu Messiah kayime, “Ngaye ngamarnenjlngmakmen wernkih duninjh nuye nawu Yawey. Kore kukange ngardduk wanjh ngamarnenjilngmarnburren God ngardduk. Nungka wanjh nganmarnbom ba bu ngabenngehke, dja ngadjalkurduyime kundjalmak duninjh. Nungka yiman ngankukmarnbom bu ngakukmakkaykenh kore nungka kadjare, yiman kayime nawu nakaliyi dja ngalbininjkobeng nuye kabenemarnburren kunmadj dja njalenjale kore kabenemarrenkenh.
11Kaluk Yawey nawu Kawohrnan Rowk kabenngehke bininj, ba bu bedda kabirriburlume kore kubolkbubuyika rowk kabirrihni. Kuhni wanjh kunwoybuk duninjh! Manbu mankolhde kabebme kore kunkulk, dja manme kawernhmerren kore manmim karrudjindi. Wanjh karohrok, nawu Yawey kakurduyime rowk kore nungka yingkihwokkurrmerrinj.”
