Esayi 61

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Noowug Boroom bi Aji Sax jaa ngi fi sama kaw, ndax Aji Sax jee ma diw, fal ma, ngir ma àgge néew-doole yi xibaaru jàmm. Moo ma yebal ngir ma dëfal ñi seen xol jeex, yégal jaam yi, seen goreel, yégal ñi ñu tëj, seen ubbite.

²Moo ma yónni ngir ma yéene atum yiwu Aji Sax ji, ak at mu sunu Yàlla di mbugalee. Moo ma yónni ngir dëfal ñiy ñaawlu ñépp,

³ngir tabb waa Siyoŋ ñiy ñaawlu, jox leen kaala gu wuutu dóom bi ñuy ñaawloo, ak diwu mbégte mu ñu weccikoo seenu tiis, ak mbubbam cant mu ñu weccikoo xol bu jeex, ba ñu naa: «Ñii ñoo di ponkali garabi njekk yi, njëmbat li Aji Sax ji jëmbat, ngir teewal teddngaam.»

⁴Ñooy tabaxaat gent ya woon, yékkati bérab ya tasoon bu yàgg, dekkal dëkk yu tas, bérab yu gental ay maasi maas.

⁵Ay gan ay dikk, di leen sàmmal seeni gétt, ay doomi doxandéem di leen beyal tool ak tóokëru reseñ.

⁶Yeen nag lees di wooye: «Sarxalkati Aji Sax ji,» ñu naa: «Sunu surgay Yàlla yaa ngi!» Alali xeet yi, yeena koy lekk, di damoo seeni koom.

⁷Sama ñoñ ay weccikoo seen gàcce ñaari céri teraanga, sarxolley mbég di seen cér, wuutu toroxte. Ñaari cér lañuy am ca seenum réew, mbégte mu sax ñeel leen.

⁸Man Aji Sax ji, damaa sopp yoon, bañ càcc ak ñaawtéef. Maay dàmp sama ñoñ ni mu ware, fas ak ñoom kóllëre gu sax.

⁹Dees na xàmmee seen askan fi biir xeet yi, xàmmee lu meññe ci ñoom fi biir waaso yi; képp ku leen gis ràññee ne ñooy askan wu Aji Sax ji barkeel.

¹⁰Maa béga bég ci Aji Sax ji, sama xol di sedd ci sama Yàlla jii. Moo ma solal yérey mucc, sànge ma mbubbam njekk, may nirook boroom séet bu kaalawu ni sarxalkat, ne xenjaw ni séet bu takki gànjaram.

¹¹Ni suuf di fettalem njebbit, ab tool di ko saxalem jiwu, ni la Boroom bi Aji Sax ji di jebbile njekk ak cant, xeetoo xeet seede ko.