1Yami God iwona bo, “Wonawiitora sisiyidi kovisisiya yagu wawaya biiyadi, wonawiitora sisiyidi kovisisiya.
2Nuwapikae kovisisiya wawaya biiyadi Jerusalem kamone bi kowonedi da yadi kabikwarakwara raghanina ikovi, da kate bada Yawe God yadi tamumu inoghotatavedi. Bi touna wasina yadi tamumu kiiravine aro kasiwiikapuna iveredi.”
3Kowaiyana, tagu wawaya tana yarurukwatu na gamona awaiyaneni, “Warereye keda kogigiri Yawe God kiiravine. Mayabe keda rotomanina kobera yada God kiiravine.
4Anagha tupadi kotounamumu, bi koyapoko da koyanuwa kotarawiipikapika. Tanawa opopukidi siniruwiipikapika, bi gawara akakimidi komumutavedi.
5Wasina bi Yawe God yanakiniwa inarumaghatara, da wawaya tupadi meghamegha na raghanina tanagha sinakita. Bi Yawe God touna wosina mmko wiisuwonina ibera, kiiravine mmko ivisisiyeni.”
9Zaiyon, tam na sawariyonayona iiyabo wara miisena kwapiipiikeni, na kugae, kunagho koya kiidamo debane. Jerusalem, tam na sawariyonayona iiyabo wara miisena kwapiipiikeni, na gamo kiitowanama kurukwatu, kurukwatu bi gekunanagharana. Jiuda kubura kwanatudi kuwonedi bo, “Kokita yami God mmakatanina!”
10Eka, Yawe God ere maragasina yapiipiika da inibada. Bi wawaya iviyawiidi na yawata yapiipiikedi.
11Yana wawaya inakoyagha yaporidi ware sip bodaboda yana sip yakoyakoyayidina naboni. Touna sip wotuwotudi imanama inarukabepidi, inadogaredi da inakawaridi, bi sip yagayagaridi ere natunatudi, nuwatepane ininagho kedaridi sinanagho.
