1Ni Variqavano tiharo, Ne ti vaiinti nahenti muntuka kukuqama nimitaate. Ti vaiinti nahenti muntuka kukuqama nimitaivaro vika muntukavano qihaaqama viro variarire.
2Ne Ieruharemiqi varia vaiinti nahentika kia nitiraiti, qihaaqamake vika tiva nimiate: Navutaaka ni rumpa taamanta ne qoraiqamavi varia entava taiqama vivo. Haaru Noravano ne qora kaiqa varaa uvarara iriharo, viva kia vohaa tataaqai ni ruqutiraitiro, viva taara tataa ni ruqutiharo qoraiqama nimitairara tiro, viva niqaa vatai uvara ekaa nunkakero tauruma nimitaivo, tura.
3Ho iriate. Uva vovano mintima tivo: Qumina vataini Nora Kotira aara qerama amitaate. Aahara vataini aara avuqavu autu amitaivaro tinavu Variqavano vivau vuarire.
4Ne uqitaiqina vatara ntava mpiqa kaate. Nora aiqinave, inaara aiqinave, teqa kaivaro vatavano avuqavu variarire. Vatavano otiqete urunte inara ehauruma/humuqu kaivaro avuqavu variarire. (Ruki 3:4-6)
5Mintimake vara taivaro Nora Kotira mpeqa okara takuqi vaiva qovarama viramanta, ekaa vataini vai vaiinti nahentika vira tavevarave. Noravano Kotiva naima vi uvara tivo, tiro.
6Minti tivakero qaiqaa uvavano mintima tiro: Are naverai tihara uva vo tiva qoqaiqama kaane, tumanta te tiha, Nana uvae te naverai tivake tirarave? turaro viva tiharo, Ukauvano inaaraiqaqai variqiro viro vuru aaharaiqama vintemake, vaiinti nahentivata inaaraiqaqai variqi vi vuru taiqa vivarave. Kaampi/Qinaara iratero koqema kero ataa iharo vuru tamunta viro hiqinti hiqinti intema kero, vaiinti nora autuvanovata vataini tuvi vuanarove.
7Noravano Kotiva uvai vara kaivaro utiharo ukau aaharaiqama kaivaro kaampi/qinaara tavavano tamunteharo vataini hiqinti vairave. Ho ukauvano vahuqa varikero taiqa vintemake, vaiinti nahentivata vahuqa varike taiqe variarave.
8Ukauvano aaharaiqama vivaro kaampi/qinaara tavavanovata tamunteharo hiqinti vairave. Mintivarovata, tinavu Variqa vira uvavano ekaa enta ekaa enta qaqi variqiro vuanarove, tura. (1 Pitaa 1:24, 25)
9Are Saioniqi variaka koqe vakaaka vuru tiva nimi variara vaiintio, are aiqinaqaa oru vaihara, maa uvara vika tiva nimiane: Are Ieruharemiqi variaka koqe vakaaka vuru tiva nimi variara vaiintio, noraiqaakera naverai tihara maa uvara tiva qoqaiqama kaane. Are kia qetaraitira, ekaa Iutaa vataini vai vatukaraqi variaka tiva nimihara mintima tiane: Ne tavaate. Ni Variqavano mainima vaivo, tiane.
10Tavaate. Noravano Kotiva ekaa haikaqaa raqiki vaiva vaiinti nahentiqaa kempukaiqama kero raqikireva tuviharo, viva nai ruaruama nimitai vaiinti nahentika hampata tuvi vaivo.
11Sipisipi qova nai sipisipiqaa koqema kero raqikintema kero, viva nai vaiinti nahentiqaa raqikiqiro vuanaro. Sipisipi qova nai sipisipi naati ravuku kero kaqa varero viharo vika noka koqema kero aara numiqaintema kero, viva nai vaiinti nahentiqaa koqema kero raqikianaro.
12Hoe vaiinti vovano ekaa nora namari kaqakero nai kauquqi tuataanarove? Hoe vaiinti vovano nai kauquqohairo naaruva avatamakero tavaanarove? Hoe vaiinti vovano kokuqi ekaa maa vataraqaa vai vatara ntuva mpiqa kaanarove? Hoe vaiinti vovano nora aiqinave inaara aiqinave vara kero, sikeriqaa hirikero tavaanarove?
13Nai tavave Nora Kotira avu aatoqi vai uvara iri tavairave? Nai tavave Nora Kotira koqe avu aato amirave?
14Noravano Kotiva hoe vorara tiharo, Mpo, te kia iruna okarara ti humiqairaqe te tavaare, tianaro? Vovano hoe virara maantima kera avuqavuqama kera nuane tianaro? Nai tavave vo haika vo haika okarara vira tiva amianaro?
15Taqu ataini namari titiqaiqatanta vaira voqaara, Noravano Kotiva ekaa vo vatanaa vo vatanaaka taveharo vikara qumina haika variavo, ti vaira. Vikara qumina haika konkoma voqaarama variavo, ti vaira. Viva ekaa nora namari avutaqaa inaara vata vairara tiharo, Vira maaravano konkoma maara voqaarama vaivo, ti vaira.
16Lebanoni nora nantaqihai ekaa vo katari vo katari ihatova teqake vare viri aqukumate, viraqaa ekaa aantauvahi Kotira iha quara amitaivera, vi ofaava Kotira avuqaa kia ho vairaitiro, qumina haikaqaima varianarove.
17Ekaa naato vatanaaka nai airitahaa vaihavata, vika Nora Kotira avuqaa vaireka, taaraiqa voqaara variarave. Viva vikara qumina haika voqaara variavo, ti vairave.
18Kotiva tara voqaantemakero vaivave? Nai nana maraqura/varaha autuke vataara voqaarae vaivo?
19Vaiintivano una variqa maraqura/varaha autu kero vataivaro, vovano kori ori kakanairima kero vatairaqohairo vira naavuma tero, silvaaqohai aututaa senira varakero vi haikara vaahehema/vaataiqama amite vairave.
20Vehi vaiinti vovano kia korive silvaave vataiva, viva maraqura/varaha autireva iharo, viva kia nteraaina katarira varakero tiharo, Hauri te qora maraqura/varaha autuke vaaviarama taariraro hiqintuantorave, tivakeharo viva vi kaiqara kankomake tavai vaiintirara autu timitaane ti vairave.
21Vika mintiavarovata, ne kiae tinavu Variqara kankomake iriavo? Haaru kiae vovano virara ni tiva nimimanta iriarave? Maa vatara autu kero vatai Variqarara ne kiae virara kankomake iriavo?
22Naaruvavano vaivaro nai vira vuruvi verantoqama kero avuhainaara taintaqaa oquviro vaiva, ˻vivama tinavu Variqavano vaivo˼. Vira avuqaa vataini variaka vaireka, nai qumina haika, kainkori voqaara variara. Vaiintivano tavuna raira kaintemakero, viva naaruva autukero rairakaira. Vaiintivano seri naavuqi vaireva vira vaaviarama kaintemakero, viva naaruva autukero vataira.
23Viva avuhainauka nora kempuka vatauka vara muntuvi vatainiqamake vaivaro kia vika nutu voqavata vaira.
24Kuvukanaa utu taivaro tuqavano kia koqema kero vataqi otu vivaro nora uvaivano utiharo vira ravantau kaivaro aaharauqama vintema kero, viva vi vaiintika taiqake vaira. Uvaivano ahaka mare vuaqa kaintema kero, viva vika qaqini varakeharo taiqake vaira.
25Nai turuaraini takuqu kero vai Variqava ni irama nimitero tiharo, Tavave ti voqaantema kero vaivo? Vovano ti voqaantema kero vaiva vairove? tura.
26Ho ne naaruvaini vuruvi tavaate. Opu makau tavave autukero vatairave? Vaiinti taruva nai iqoka vaiinti ntita kero vikara mini mini oru variate tintemakero, Noravano entaqi opu makau vika nái nutu ntava keharo mini mini vuru ke vaimanta ite variara. Viva ekaa kempuka vataava vairara tiro, vikaqihairo kia voqavanovata kakakima vi vaira.
27Isareri vatanaakao, nantihae ne Iekopira vaintivara vaiha nuntu nauntu ti variavo? Ne tiha, Mpo, tenavu nora maaraqi vauraro Noravano Kotiva tenavu qoraiqama vi vaunara kia tave vaivo. Vokiaka kia avuqavu okarara iriraiti, vika tinavu qoraiqama timite variavarovata, tinavu Variqavano tinavu qaqira kero kia tinavu kahaqi vairave, ti variara.
28Ne kiae virara kankomake iriarave? Haaru kiae vovano virara ni tiva nimimanta iriarave? Noravano Kotiva vaireva, viva ekaa enta ekaa enta qaqi variqiro vi vai Variqavama vaivo. Viva ekaa haikave vata maatave autu kero vataivave. Vira avuvano kia tauntairaro viva kia popoharaitiro, viva kempukavano variqiro vuanarove. Kia vovanovata vira avu aatoqiraara ho iri tavaanarove.
29Vaiinti nahenti kempukavano taiqa vimanta variaka viva vika kempukaiqama nimite vairave. Viva quqerara vaiinti nahenti kahaqama nimite vaimanta vika kempukaiqamavi ho variarave.
30Quvaaraa vaintive, qaraaka vaiintive, variqi vi vaivaro vika kempukavano taiqa viramanta vika popohama vivara. Vikavata kuntavaivaima vare kaavuntivara.
31Vika mintimake vaivarovata, vaiinti nahenti Nora Kotirara viva tinavu kahaqiariravave ti variaka vaivaro vika kempukavano qaraakaiqama viramanta ho vaivara. Memoravano kia vukaari utiraitiro, qihaaqama kero aroka rairakero ni vaintemake, vika koqemake variqi vivara. Vika kantamaqi viha kiama aanaraiqivara. Vika aara niha kiama popohevara.
