1Dage tigidali tǫ habu we bidi dabe, asiąo. Dage sisinagaselama, te po odagasiąo. Tǫde me tigidali elalubo nai me, dagego me olo muiąo wai.
2Genuai Bidigo te tigidali bulu tǫ kantri dali haliga sębę eyu, te augwa ami bidi dabe dali me sębę yali. Tama agai te po weyu, te augwali tigidali isaibao po wai dao. Awe, agai augwali sese mu dola silaibao.
3Te augwali tigi dabe te bidi dabego pubalubo usugobeo. Menio. Te bulu tǫ dabede danamu pelayu, te bulude dwai kugumini mu yaibao wali. Te augwaligo kaneme dabe te bulu du dabede pągąnalueibao wai dao.
4Giliga, me polua, me hǫ dabe hala pelama, te tutudulaluama, te mu tigidali silaibao. Tama dagalu da, te bidi dabego 1pepa yabe bebe pelama, kękę pabo tiwai yaibao. Te dagalu daide ula ebo hǫ dabe tigidali te ni wain yabe wa pai te tǫba tudulalubo tiwai eyu, te ni kaya fik yabe wa pai tudulalubo tiwai yaibao wai dao.
5Genuai Bidigo te tama po wai, “Eno haliga sębę yali, eno te ena bainat hwą sisi elama, tama te bainatgo hwawa mu weyu, te dagalu tagalama, te Idom dabe eligi painu yali, te eno augwali dolaibao po wali hani dao. Te megi eno aga tagala palubo te augwali ela mugi pomainu yaibao,” wali.
6Tialima, te Idom dabego kaneme me iligo te Genuai Bidigo bainat hwą halua saibao. Te sipsip me meme dabe te bidi dabego te ofa yainu elama, te ofa yainu ebo bidi dabego nogode kaneme piliga pabo tiwai yaibao. Genuai Bidigo te genuai hani we bidi dabe mu te taun Bosra te Idom bulu tǫ kantride elaibao wali, te aga digi genuai ofa ebo tiwai dao.
7Genuai Bidigo te tobage bomai uni bulmakau dabe me elama, te augwaligo kaneme me ili te gea paliyu, te Idom bulu tǫ kantri mesegelaibao wali.
8Te sę pedelaibao, magi baso meni, Genuai Bidigo te boi bidi dabeba te aga taun Jerusalem doliyu, aiyaba elalubo boi bidi dabebolo te dene mabo bodolu mawai dao wai.
9Te Idom bulu tǫ kantri wę dabe te kolta tiwai pedelama, te hogomu dabe te bomai masigi dabe tiwai pedelaibao, te Idom bulu kantri tǫ te kolta sia dabo tiwai yaibao.
10Te sia dabo munu me sia sogobeo. Menio. Te tigidali sogo ulade me hulide bomo elama, dedu, te hano sesemane sogo pedaliduaibao wai. Te Idom dabego tǫ olo sesemane sogo elalu, te bidi teba munu ma biligi pogobeo.
11Te bulu tǫ te dwai ba dabe, te ba kemodage dabe, me sisi yai ba kotkot, me hulide bilalubo ba dabego bulu naga pedelaibao. Godigo te Idom dabego nai doado bage tigidali sia somainu elama, te Idom dabego tǫ olo elalumainu yaibao wali. Te polobadu digi agai te tǫ nigilama, te tǫ olo mu elaluali tiwai gilama pedelaibao wai dao.
12Te tigidali genuai bidi dabe, me tobolu bidi hetman dabe, te munu me bidigobeo, tama te king mego te bulu tǫ kantri me tonalugobeo wali.
13Te sesane yai bono me nosai dabego te kingo be, me gasa be dabe mesegelaibao. Te bulu uni yowi dabe bidagaselama, te badu i wagasobaso, te uni ba dabe te beba piagasaibao wali.
14Te olo masigi bulu kemi tǫde te bulu uni hasa dabe teba sisinagasaibao wali. Te bulu uni meme dabe me te bidagaselama, i weyu, ga udaibao, te tobage hasamani dabe me, te hulide bilalubo hasa me, te aselama, te badu piabo pesage gegagasaibao wai dao.
15Te hulide bilibo ba sibigo te be selama, te augwa ge dabe tede saganaibao, te augwa bogo dinigilama, te augwa gesi ogomani tonalueibao. Tama te omai ba kemodage me, so ba kemodage me, augwali aselama, tonaluagasaibao walio.
16Te Genuai Bidigo buku tomoba sulama, nago te nai dabe elalubo po nedao. Tigidali hasa me ba dabe te bukude po wali gilama, te bulu Idomba bidagasaibao. Te me deli augwali me bidigobeo. Magi baso meni, Genuai Bidigo digi augwali asao wali. Te aga Mobo Bidigo augwali sisinama, te augwali odasa asaibao wali.
17Te Genuai Bidigo digi te Idom tǫ pedaide deli delide dąį ilama, te augwaliba dobawaibao. Tama augwali te Genuai Bidigo dąį ilama, muani madi sesemane bidada paibao wai dao. Godigo tigidali nai wiegi yai ma pedalumainu ilaibao
