Isaías 29

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹«¡Ay imanöraj canqui Davidpa siudänin Ariel! ¡Ay imanöraj canqui David pachacushan Jerusalén siudä! Chay siudächo tiyajcunaga cada wata fistata rurar cushicushpanmi goyarcaycan.

²Ichanga nogami Ariel siudämanga ñacaycunata chayachishaj. Chayrämi canga llaquicuy, wagay. Chay siudä nogapäga cangapaj rupachicuna altarnömi.

³Intëruyquipa tumarej curalapaycushunayquipämi suldäröcunata cachamushaj. Intëruyquipa tumarejmi guenchawan chapajno chapashaj. Nircur pillyaj yaycamunäpaj escaluncunata jatarachishaj.

⁴Pengaypämi jitarpaycar quëdanquipaj. Rimashayquipis almapanöllami wiyacanga. Parlashayquicunaga pajallami wiyacanga.

⁵Ichanga mana yarpashapitami Noga munayniyoj Tayta Diosga chiquishojcunata castigashaj. Paycunataga castigashaj räyuwan, timlurwan, löcu wayrawan, löcu tamyawan. Chay aypalla chiquishojcunaga quëdangapaj ñuchu allpamanno ticrashami. Aypalla gaticachäshojcunaga cangapaj chaqui pangata wayra apashanömi.

⁷Aypalla nasyun runacuna Arielcho tiyajcunawan pillyarcaycäga illgangapaj suyñunöllami. Llapan magaycaj runacunaga, perga curralta juchuycächejcunaga illgangapaj chacaypa ricapacushannöllami.

⁸Chayga cangapaj yargaypita puñur runa suyñuynincho micushannömi. Riccharamorga jinalla yargaycan. Yacunaycaj runa suyñuynincho yacuta upushanno canga. Riccharamorga jinalla callpaynaj, yacunaypita cuncanpis chaquisha caycashanno canga. Sión lömaman achca nasyun runacuna pillyaj shamojcunaga manami imatapis rurangapächu.»

⁹¡Ariel runacuna, gamcunaga jinalla goyarcaycay mana tantiyacuypa! ¡Gaprano, imatapis mana ricajno goyarcaycay! ¡Machächicojta mana upusha caycashpayquicunapis machasha runano tapraycachaycanqui!

¹⁰Tayta Diosmi camacächisha gamcuna fiyupa wañuy puñuypa puñucäcunayquipaj. Profëtacunami caycan llapan runacunapa ñawinnöpis. Ichanga Tayta Diosmi bendarcusha mana ricananpaj.

¹¹Chaymi Tayta Dios ribilashanga gamcunapaj caycan mana pipis liguinanpaj lagasha caycaj rölluno. Liguiy-yachaj runata pitapis chay rölluta liguipänanpaj «Tayta cayta liguipämay» niptin, chay runaga nengapaj: «Manami liguëmanchu. Lagashami caycan» nir.

¹²Liguiyta mana-yachaj runata chay rölluta liguipänanpaj «Tayta cayta liguipämay» niptin chay runaga nenga: «Manami liguiyta yachächu» nir.

¹³Tayta Dios nin: «Cay runacunaga shimillanwanmi sirbiman. Janan shongullami alabaman. Shongunchöga juctami yarparcaycan. Nogata aduraycämashanga caycan runacuna yarpaynillanpita nishancunallami. Paycunaga runa yachachishannöllami aduraycäman.

¹⁴Chaypitami cay runacunapäga tantiyayta mana camäpacunanpaj camacächishaj. Camacächishaj cay runacuna fiyupa almirananpaj. Yachajcunapa yachaj cayninpis, tantiyajcunapa tantiyaj cayninpis manami canganachu.»

¹⁵¡Ay imanöraj canqui mana allita rurananpaj yarpaycashanta pacashpan Tayta Diospita pacacojcuna! Paycunaga chacaypami mana allicunata ruran. Nircur «Manami pipis ricamanchïchu. Manami pipis musyanchu» nin.

¹⁶¡Chayno yarpar llutantami yarpaycan! ¿Manca rurajwan mancaga iwalchuraj? ¿Rurasha caycäga rurajta ninmanchuraj: «Gamga manami ruramashcanquichu» nir? ¿Imanirajtapis rurashanpita mituga rurajta nengachuraj: «Manami rurayta yachanquichu» nir?

¹⁷Cananpita manapis aycällatami Libanoga ticracurengapaj muruna chacraman. Muruna chacranami micuy alli wayuptin muntinöraj ricacongapaj.

¹⁸Chay junäga mana wiyaj upacunapis liguipashanta wiyanganami. Gapracunapis ricanganami. Manami chacaychönönachu canga.

¹⁹Tayta Dios yanapaptinmi umildicunaga cushiconga. Pobricunapis cushishami goyangapaj Israelcuna sirbishan Santo Tayta Dios yanapaptin.

²⁰Mana rispitacojcunaga manami canganachu. Fiyucunapis manami canganachu. Llutan ruraycunallata yarpajcunapis illganganami.

²¹Ushacanganami manacajpita jitapajcunapis, dimanduta arriglaj juezcunata mana alliman chayachejcunapis. Manami canganachu alli runata lebantashpan jitapajcunapis.

²²Chaypitami Abrahamta jorgamoj Tayta Diosga Israelcunata nin: «Cananpitaga Jacobpita miraj Israelcuna manami pengaycho canganachu. Cäranpis manchacuywan manami jucajyacäconganachu.

²³Paycunapita mirar-aywajcunaga nasyunnincho imano rurashätapis ricashpan Noga juchaynaj cashäta musyangapaj. Israelcunapa Santo Tayta Diosnin captë Nogallatana rispitamangapaj.

²⁴Mana tantiyajcunapis yachaj caytami yachaconga. Jamurpäcojcunapis yachachishanta wiyaconganami.»