Duku 10:3-39

³Kɔtɛnɛ̀, di dò nyipe nyi kɛ̀ n di tũɔ̃̀ nyɛkpɑmɑɑ̀ mmiɛkɛ.

⁴Di bɑ́ ntɔ idíítí, di bɑ́ ntɔ kudɔukù, di bɑ́ nniɛ tinɛùtì, di bɑ́ɑ́ cómmú kucɛ kɛ́dɔu nhòmɔù.

⁵Kɛ̀ di tɑti tɛ̀ɛ̀ cĩ́ɛ̃̀tɛ̀, di dɔ̀: Kunɑɑtí ndi bonɛ̀!

⁶Kòò mɔù bo dɛ kó tɛcĩ́ɛ̃̀tɛ̀ kɛ tú kunɑɑtí yiɛ̀, kù nhò bonɛ̀, kòò mɔù mɛ nyí bo, kùu wɛ̃tɛní di ĩ́nkɛ̀.

⁷Dí mbo dɛ kó tɛcĩ́ɛ̃̀tɛ̀ kɛ yo nkɛ yɔ̃ mbɛ̀ di duɔ́ ndɛ̀, otɔ̃ntì nɛ̀ o tɔ̃ndiitì nti, di bɑ́ nsɔɔti sɔɔti sicɛ̃́ĩ.

⁸Kɛ̀ di tɑ dìì ɛì kɛ̀ bɛ̀ di cɔutɛ́ kɛ di duɔ̀ ndɛ̀ dí ńyo,

⁹kɛ́mmiɛkùnko bɛmuɔmbɛ kɛ nɑ́ɑ́ ndɛ kó dihɛì yɛmbɛ̀ Kuyie nkpɑ̀ɑ̀tìyuu tɔ̀ɔ́nnímɛ̀.

¹⁰Kɛ̀ di tɑ dihɛì mɑrì kɛ̀ bɛ̀ í di cɔutɛ́, di yɛ̀ kɛ́cómmú dɛ kó dihɛì icɛ,

¹¹kɛ́kpɑ̃́ɑ̃́tɛ́ dɛ kó dihɛì kó mutɑ̃́ɑ̃́ mmùù dɑ̀ri di nɑɑ̀cɛ̀i, kɛ nɛ́ bɛ̀ nɑ̀kɛ́ kɛ dɔ̀: Di nyɛ̃́ kɛ̀ Kuyie nkpɑ̀ɑ̀tìyuu tɔ̀ɔ́nnímu.

¹²N di nɑ́ɑ́mmu Kuyie mbeéntì yiè, Sodɔmmu ɛì kɔbɛ kó tiyɛ̃ĩti bo nkɛ̃ńnìnɛ̀ dɛ kó dihɛì kɔbɛ kpɛti.

¹³Di bo yɑ̀ díndi Korɑsɛ̃ɛ̃ kɔbɛ nɛ̀ Bɛtisɑidɑɑ kɔbɛ, kɛ yɛ̃́ tidiɛtì n dɔ̀ɔ̀ di di ciɛ, kɛ̀ n do ntì dɔ̀ɔ̀ Tiiri nɛ̀ Sitɔ̃ɔ̃ miɛkɛ nkɛ bɛ̀ nɑ ndɑ̀ɑ́tí tifɔ̀ɔ̀tɔ̃̀ntì, kɛ pe mmutɑ́pɛí nnɛ̀ dimɔ̀nnì kɛ bɛnkɛ bɛ̀ cèètɛmɛ̀.

¹⁴Dɛɛ̀ kpɛ́í nte Kuyie mbeéntì yiè, Tiiri nɛ̀ Sitɔ̃ɔ̃ ɛkɛ̀ kɔkɛ kó tiyɛ̃ĩti bo nkɛ̃ńnìnɛ̀ di kpɛti.

¹⁵Díndi Kɑpɛnnɑummu kɔbɛ di yɛ̀mmɛ̀ do nKuyie mbo ndi dee nkɛĩ́nkɑ̀ɑ? Bìtì. Kù bo di cṹũnní kɛ́ di tɑnnɛ́ kudɔnkù miɛkɛ.

¹⁶Kɛ̀ Yesu yíɛ́ kɛ́nɑ́kɛ́ o tɔ̃mbɛ̀ kɛ dɔ̀: Kɛ̀ wèè yie ndi kpɛti ò yie mmíì kpɛti, kɛ̀ wèè di yetɛ ò yetɛ mínwe, wèè n yetɛ kòò yetɛ wèè n tɔ̃nní.

¹⁷Kɛ̀ Yesu tɔ̃mbɛ̀ɛ wɛ̃tɛní nɛ̀ diwɛ̀ì kɛ dɔ̀: Ti Yiɛ̀, ti ɔ̃ɔ̃ pɛɛ nyɛbɔkɛ̀ nɛ̀ ɑ yètìrì kɛ̀ yɛ̀ɛ cokɛ́mu.

¹⁸Kɛ̀ Yesu bɛ̀ tɛ̃̀ńnɛ́ kɛ dɔ̀: N do wúómmu dibɔɔ̀ dotinímɛ̀ kɛĩ́nkɛ̀ tɛwɑ̃̀tɛ̀ tɛ̃mɛ̀.

¹⁹N di duɔ́mmu muwɛ̃rímú kɛ̀ di bo nnɑù iwɑ̀ɑ̀kɛ nɛ̀ inɑɑ́ nkɛ́pɔntɛ dibɔɔ̀ wɛ̃rímú mumɔu, bɑ́ dɛ̀mɑrɛ̀ bɑ́ɑ́ di dɔɔ̀ mɛyɛi.

²⁰Dɛ̀ bɑ́ ndi nɑɑti yɛbɔkɛ̀ di cokùmɛ̀, dɛ̀ pètìnkɛ ndi nɑɑti di yètɛ̀ wɑ̃̀ri mɛ̀ɛ̀ kpɛ́í nkɛĩ́nkɛ̀.

²¹Dɛ mɔ̀nnì kɛ̀ Muyɑɑ́nsɑ̀ɑ̀mùu píɛ nYesu kòo sɑ̃ntɛ Kuyie nkɛ dɔ̀: N dɑ sɑ̃ntí n cicɛ Kuyie nfɔ̃́ nwèè bɑkɛ́ kɛĩ́nkɛ̀ nɛ̀ kɛtenkɛ̀, ɑ sɔ̀nnɛ mɛ̀ɛ̀ kpɛ́í ntimɔ́mmɔnti mɛciì nyɛmbɛ̀, nɛ̀ mɛyĩ́ɛ̃́tímɛ̀ yɛmbɛ̀, kɛ ti bɛnkɛ bɛ̀ɛ̀ í tú bɛ̀mɑbɛ̀. N cicɛ fɔ̃́ɔ̃̀ mɛ̀ dɔ́ kɛ mɛ̀ tɑ̃ɑ̃tɛ́.

²²Ò dèè mɛmmɛ kɛ dɔ̀: N Cicɛ n duɔ́mmu dɛmɔu, òmɔù í yɛ̃́ dɛbirɛ kɛ̀ dɛ̀ í tú dɛ Cicɛ, òmɔù mɛ nyí yɛ̃́ dɛbirɛ Cicɛ kɛ̀ dɛ̀ í tú dɛbirɛ nɛ̀ dɛbirɛ dɔ́ kɛ́bɛnkɛ bɛ̀ dɛ Cicɛ.

²³Kòo deè kɛ́wéntɛ́ o tɑncɔ́ùmbɛ̀, kɛ́ bɛ̀ nɑ̀kɛ́ bɛmɑ́ɑ̀ borɛ̀ kɛ dɔ̀: Dɛ̀ ndi nɑɑti, dínni bɛ̀ɛ̀ yɑ̀ di mɛ̀ nwùó ndɛ̀.

²⁴N di nɑ́ɑ́mmu Kuyie mpɑ̃ɑ̃nɑ́ɑǹtì nɑ́ɑm̀bɛ̀ pɛ́u nɛ̀ bɛkpɑ̀ɑ̀tìbɛ̀ pɛ́u do dɔ́mu kɛ́yɑ̀ di mɛ̀ nwùó ndɛ̀ bɑ́ bɛ̀ í dɛ̀ yɑ̀, bɛ̀ do dɔ́mu kɛ́keè di mɛ nyo tì bɑ́ bɛ̀ í tì kèè.

²⁵Kɛ̀ ikuɔ́ wɑ̃ɑ̃̀bɛ̀ kóò kótì mɔù ndɔ́ kɛ́díí nYesu kɛ́ítɛ́ kóò bekɛ kɛ dɔ̀: Okótì n dò nkɛ́dɔɔ̀ bɑ kɛ́pɛ́tɛ́ mufòmmu mùù bo sɑ̃́ɑ̃̀?

²⁶Kɛ̀ Yesu ò tɛ̃̀ńnɛ́ kɛ dɔ̀: Tì wɑ̃̀ri ikuɔ́ miɛkɛ kɛ yɛ̃ mbɑ? A ti kɑ̀ɑ nkɛ̀ tì tú bɑ?

²⁷Kɛ̀ dɛ kóo nìtìi ò tɛ̃̀ńnɛ́ kɛ dɔ̀: Tì wɑ̃̀ri kɛ tú: Ndɔ́ ɑ Yiɛ̀ nKuyie nnɛ̀ ɑ yɛ̀mmɛ̀ mɛmɔu nɛ̀ ɑ wɛ̃ǹnì dimɔu, nɛ̀ ɑ wɛ̃rímú mumɔu nɛ̀ ɑ ciì mmɛmɔu kɛ́ndɔ́ ɑ kou tɔù ɑ dɔ́ mɛ̀ɛ̀ botí ɑmɑ́ɑ̀.

²⁸Kɛ̀ Yesu ò nɑ̀kɛ́ kɛ dɔ̀: A tɛ̃̀ńnɛ́ kɛ̀ dɛ̀ wenni, ńdɔɔri mɛmmɛ ɑ yó nfòùmu.

²⁹Kɛ̀ ikuɔ́ wɑ̃ɑ̃̀bɛ̀ kóò kótì ndɔ́ kɛ́bɛnkɛ ò dɔ̀ɔ̀rimɛ̀ Kuyie ndɔ́ dɛ̀, kɛ́bekɛ Yesu kɛ dɔ̀: We ntú n kou tɔù?

³⁰Kɛ̀ Yesu ò tɛ̃̀ńnɛ́ kɛ dɔ̀: Onìtì mɔù weè do yɛ̀nní Sedisɑdɛmmu kɛ́nkɔri Sedikoo, kɛ̀ bɛyóóbɛ̀ɛ ò dintɛ́ kɛ́dukú kòò ndò nhò kú, kɛ̀ bɛ̀ɛ fietɛ o kpɛrɛ kóò dɔunko kɛ́pɛ̃ɛ̃tɛ́.

³¹Kɛ̀ dɛ̀ mmɑ̀nnɛ̀ ikuɔ́ nìùtì mɔù dɛ̀ kèrínímɛ̀ kóò yɑ̀ kɛ́pɛɛ́ nkɛ́pɛ̃ɛ̃tɛ́.

³²Kɛ̀ Defii botí kou mɔù nkéríní kɛ́tuɔkɛní o borɛ̀ kóò yɑ̀ kɛ́pɛɛ́ nkɛ́pɛ̃ɛ̃tɛ́.

³³Kɛ̀ Sɑmmɑrii ɛì kou mɔù weè nɛ́ nkɔri kupɔ̀ɔ̀kù kɛ́nkéríní kóò yɑ̀ kɛ̀ mɛsémmɛ̀ɛ ò pĩ mmɛdiɛ̀.

³⁴Kòo kɔtoo o borɛ̀, kɛ́ɔ́ú o muɔ nkɛ́wɑɑrɛ mɛkùɔ̀ nnɛ̀ mɛnɑɑ̀ mbɛ̀ tu mɛ̀ dìfɛ̃́ɛ̃̀ nkɛ́boú kɛ́deè kóò kɑ̀nnɛ o sɑ̃mmɑrímú ĩ́nkɛ̀, kóò kɔ̀tɛnɛ̀ tɛpɔ̀ɔ̀cĩ́ɛ̃̀tɛ̀ kɛ́nyié nkoò tɑ̀ɑ̀.

³⁵Kɛ̀ dɛ̀ɛ wentɛ́ kòo dɛitɛ mɛdítíbii mmɛ̀dɛ́mɛ̀ kɛ́duɔ́ nwèè bɑ̀ɑ tɛpɔ̀ɔ̀cĩ́ɛ̃̀tɛ̀ kɛ dɔ̀: Ntɑɑ̀nnɛ̀ we, kɛ̀ ì dòńtɛ́, kɑ̀ɑ yìɛ́, m bo nwɛ̃tiní kɛ dɑ yietí.

³⁶Kɛ̀ Yesu deè kóò bekɛ kɛ dɔ̀: A yɛ̀mmɛ̀ dò mbɛyóóbɛ̀ mɛ mpuotí wè kou tú we bɛtɑ̃ɑ̃ti mɛmmɛ?

³⁷Kɛ̀ ikuɔ́ wɑ̃ɑ̃̀bɛ̀ kóò kótìi ò tɛ̃̀ńnɛ́ kɛ dɔ̀: Wèè mɛ nhò dɔ̀ɔ̀ mɛsɑ̀ɑ̀. Kɛ̀ Yesu ò nɑ̀kɛ́ kɛ dɔ̀: Kɔtɛ kɛ́dɔɔ̀ mɛ botí.

³⁸Yesu nɛ̀ o tɑncɔ́ùmbɛ̀ kɛ̀ bɛ̀ nkérí kɛ́tuɔkɛ dihɛì mɑrì, kòo nitipòkù mɔù ò cɔutɛ́ o cĩ́ɛ̃̀tɛ̀ kòo yètìrì tu Mɑriti,

³⁹kòo nɑntɛ̀ bo kɛ̀ bɛ̀ tɛ̀ tu Mɑɑri, kɛ̀ tɛ̀ɛ kɔtoo kɛ́nkɑri ti Yiɛ̀ nYesu borɛ̀ kɛ kémmú o nɑ́ɑǹtì.