3Ŋoŋe rahuc ʒiŋuc mananʒepieŋ: Lama kâte qâto jaŋere ŋondeŋko mi sosorec‐jopane i ŋoŋe sorec‐ŋopakopac.
4Eme ŋoŋe moneŋ kânoŋ me he me kikehuhu mi amecke ranʒepieŋ. Erâ hatao ŋic bâfuac‐joparâ dâŋ mi bacjopanʒepieŋ.
5Fic mocko fezo ehuc rune ʒiŋuc jazanʒepieŋ: ‘Fic kecʒira wama fozejec.’
6Eme fic ira ŋic moc wamare biŋe jume wamadâŋ‐ŋeŋicte fârinezi erao fotâcnerâ foocmu. Arictac eme wamadâŋ‐ŋeŋicte fârine ŋoŋerao mocwâc risieocmu.
7Fic feniŋmu ijaha ŋeŋe juju ehuc nânâ gumec‐ŋopapie nânʒepieŋ. Gie bapa ŋic wiac furimâc jare gumec ezo. Ŋoŋe ficbiri mi junʒepieŋ.
8Hae mocko fisipie hezu hewâneŋ eŋarehuc nânâ gumec‐ŋopapie nânʒepieŋ.
9Erâ ŋic huchec ɋiɋicne bacjoparâ hae rune ʒiŋuc jazanʒepieŋ: ‘Anuture uucmaŋzi maic‐ŋopakac.’
10Hae mocko fisipie qikiŋ‐ŋopapie hae ʒoŋao domahuc‐ʒiŋuc jazanʒepieŋ:
11‘Gâc wândoc‐ŋeŋic kike‐nâŋecko bohotakac, i âteickepene waha foŋarezejec. Erâ ine ʒiŋuc mananiŋ: Anuture uucmaŋzi maic‐ŋopame bâsuembieŋ.’
12No ŋazape mananiŋ: Okac dameŋko Sodom haeonec katucne bawahahuc ejarezo â hae iŋucne jaŋe bafehuc ejarezo.
13“Jei Koraziŋ rune, jei Besaida rune, ŋoŋerao mâsi hâhâwicne fuawec, iŋucne Tiro Sidoŋ haeo fuame muzac jaŋe mârâc jaha ki busâqoc ehuc maŋjeŋic bârisienʒapiŋ.
14Irec juku okac dameŋko Tiro Sidoŋ haeonec katucne bawahahuc ejarezo â ŋoŋe ine katucne bafehuc eŋarezo.
15Erâ Kafanaum rune, go sambâŋko bafecguo me? Aricne, go hârâcko tuŋguzo.
16Ŋoŋere dâŋ manaocmuzi nore dâŋ manaocmu. Â ŋoŋe qikiŋ‐ŋopaocmuzi no qikiŋnuocmu. No qikiŋnuocmuzi ine sorecnuwec e qikiŋneocmu.”
17Motec 70 jaŋe juku risierâ ʒeri ehuc Jesu dâŋ binaŋ ʒiŋuc ecnembiŋ: “Wofuŋ, gore ʒâŋe muhuc demoŋ jâpe‐jarepene micnâŋec reŋke‐jâmbâŋkeŋgopieŋ i!”
18Mupie ʒiŋuc jazawec: “Sataŋ e sambâŋkonec bâbâric iŋucne waha qame honepo.
19Manaŋgopieŋ, ŋoŋe homa â omeqaqa â râsire wiac ʒârâ hâriŋ irec faio âtepie mi sipiric‐ŋopaocte tâpiri râe‐ŋarepo.
20Eme ŋoŋe ine demoŋzi micŋeŋic reŋkeŋgopieŋ irec mi ʒeri enʒepieŋ, ʒâŋe‐ŋeŋic sambâŋko qâreŋkekicne fokac irec ʒeri enʒepieŋ.”
21Eme dameŋ ijaha Tiri Mârozi Jesu bufahac qacneme ʒeridâŋ kecʒiŋuc muwec: “Mamac, sambâŋ â mâreŋ rune, go mamana‐jeŋicte manapie kâcɋene eekac ŋic i jaŋe mitidâŋge hesoŋke‐jareekic, â maŋjeŋicte manapie gegecne eekac jaŋe ine mufua‐jareekic, eme no irec muteŋgukopac. Go iŋuc fua biaŋ raocte mupaŋkemeŋ hâcne ine.
22Wiac sasawa i Mamac‐nanezi râe‐nare‐fârewec. Eme ŋic moczi Ŋokâ mi ʒâŋitaekac, Mamaczi buc ʒâŋitaekac. Erâ Mamac iŋuc jaha ŋic moczi mi ʒâŋitaekac, Ŋokâzi buc ʒâŋitaekac. Erâ Ŋokâzi ŋic moc Mamacte fuŋne mufuacneme e wâc ʒâŋitaocmu.”
23Iŋuc murâ motecfâcne jaŋacne ʒiŋuc jazawe: “Ŋoŋe wiac ʒâŋe furu honehuc jueŋgopieŋ irec ʒeri enʒepieŋ.
24No ŋazape mananiŋ: Porofete â ŋicwofuŋ bocjaha jaŋe ŋoŋe wiac hone manac eeŋgopieŋ i hone manac eniŋte ejare‐bipiehame sifu mi hone manac embiŋ.”
25Sâcmutâc mamana ŋic moczi Jesu ʒiŋuc muhuc esâickewec: “Qaqazu, no weniŋuc erâ juju sanaŋte biŋe epemu?”
26Mume Jesuzi okacne ʒiŋuc wiocnewec: “Sâcmutâc dâŋ weniŋuc fome woseekic?”
27Wiocneme eki muwec: “Go maŋge â qâqâtâcge â tâpirige â mamanasuge i Wofuŋ Anutuge furu jaha qikiŋnecnetec fozejec, erâ go gahacne egareekac, sâc ijaha âgogere egarezejec, dâŋ iŋuc fokâc.”
28Mume Jesuzi ʒiŋuc âzâcnewec: “Go dâŋ sâcne mukomec, i reŋkerâ juju sanaŋte biŋe ecmu.”
29Eme ŋic e no maŋsioc tâmiric hawari ezepac muhuc harierâ Jesu ʒiŋuc wiocnewec: “Eme more manape âgo‐nane ezejec?”
30Mume Jesuzi binaŋ moc ʒiŋuc bacnewec: “Ŋic moczi Jerusalem haeonec Jeriko haeo rahuc râsi jaŋere somâmaŋko huwec. Eme jaŋe qarâ ŋaqi â mafa wiac‐ticne jâoc rofârerâ behepie hâmozo ehuc fowec.
31Fohame taha bapa moczi hata ijaha rarâ hone takirerâ jâuruwec.
32Eki rahame taha ufuŋte kiŋaŋŋic moczi ijaha ra fisirâ hone takirerâ jâuruwec.
33Ehame Samaria mâreŋkonec ŋic furune moczi hata raku ŋic bâfuawec.
34Erâ honerâ bune sâqoreme maŋfuŋnao rarâ wicticne wokemaŋ â waiŋ opâzi ʒure foŋ ewec. Erâ becâsic‐ticnao râeme feme haeo bararâ tomaficko râerâ jauŋ bawec.
35Hae fureme raocte tomafic rune 20 toea râcnehuc ʒiŋuc muwec: ‘Go ŋic kecʒi jauŋ bahuc juzemec, eme moneŋ garekopac mi sâckeme juku risierâ mocwâc ʒuhucke‐garepemu.’”
36Jesu iŋuc murâ muwec: “Ŋic jahec â moc jaŋeraonec wenimo irec manatec ŋic qakicne ere âgo ewec?”
37Wiocneme ʒiŋuc muwec: “Jauŋ bawec eki.” Eme Jesuzi ʒiŋuc âzâcnewec: “Go rarâ iŋuc hâcne ezemec.”
38Jesu â motecfâcne jaŋe raku hae mocko fisipie ŋokac moc ʒâŋene Mata eki Jesu ficticnao hefârerâ hezu hewâneŋ ecnewec.
39Eme qoticne moc juwec ʒâŋene Maria, eki Wofuŋte maŋfuŋko waha ŋehuc miti‐ticne manawec.
Luka 10
Luka 10:3-39