ሉቃሴ 10:3-39

³ዓካሪ ዓኣዹዋቴ፥ ታ ዒንሢ ማራይጉዲ ያኣያሢ ባኣኮ'' ዳካኔ፤

⁴ዒንሢ ጎይፆኮ ዓይጎ ባኣዚ''ያ ዓርቂፖቴ፤ ሚኢሼ ዓጎ ቡራሻ፥ ጋላ ዓርቆ ሉካ'' ማዔቶ ሃሣ ዱርሲ ማዔቶዋ ዔኪፖቴ፤ ዓሲና ዎላ'' ጎይፃ ካኣማዖ ዔኤሊ''ሢና ናጊፖቴ።

⁵ዒንሢ ጌላ ማኣራ ቢያ ቤርታዺ ‹ማኣሪ ዓሲዮ፥ ኮሹሞ ሃኖ' ማኣሮም ማዖም› ጎዑዋቴ፤

⁶ኮሹሞ ናሽካ ዓሲ ዬኖ ማኣራ ዓኣቴ ዒንሢ ጌዔ ኮሹማ ዔያቶም ማዓንዳኔ፤ ያዺ ማዒባኣያታቶ ዒንሢ ጌዔ ኮሹማ ጊንሣ ዒንሢም ማዓንዳኔ።

⁷ማዾ'' ማዻ ዓሲም ማዻ ዛሎ'' ዒንጎ ባኣዚ'' ኮይሳኔ፤ ዬያሮ ዒንሢ ጌሌ ማኣሮይዳ ዒንሢም ሺኢሾና ባኮ ሙዒ ሙዒ ሃሣ ዑሽኪ ዑሽኪ ዒኢካ ዴዑዋቴ፤ ዬኖ ማኣራፓ ሜሌ'' ማኣሪ ሃንቲ ሃንቲ ሺሪፖቴ።

⁸ዎኖ ካታሞዋ ዒንሢ ጌላኣና ዓሳ ዒንሢ ሾኦጫሲ ዔካዖ ዒንጋ ባኮ ሙዑዋቴ።

⁹ዬኖ ካታሜሎይዳ ዓኣ ሃርጊንቴ ዓሶ ፓሡዋቴ፤ ዴሮ''ማኣ ‹ፆኦሲ ካኣቱማ ዒንሢ ባንሢ ዑኬኔ› ጌዒ ኬኤዙዋቴ።

¹⁰ጋዓንቴ ዎኖ ካታሞዋ ዒንሢ ጌላኣና ዓሳ ዒንሢ ዔኩዋያ ማዔቶ ካታሜሎኮ ዙሎ'' ኬስኪጋፓ፦

¹¹‹ሃይሾ፥ ኑኡኮ ቶካ'' ዓኣ ሃኖ' ካታሜሎ ሲላሎ ኑ ዒንሢም ፒፃ''ኔ፤ ጋዓንቴ ፆኦሲ ካኣቱማ ዒንሢ ባንሢ ዑኬሢ ዔሩዋቴ› ዔያቶም ጎዑዋቴ።

¹²ጋፒንፆ ዎዶ''ና ፆኦሲ ዬኖ ካታሜሎም ዒንጋንዳ ዎጋ'' ቤርታ ሶዶሜ ካታሞ ሄሌ''ስካፓ ባሼ ማዓንዳኔ ታ ዒንሢም ጋዓኔ» ጌዔኔ።

¹³ዬካፓ ዬሱሴ፦ «ኮራዚኔ ጎዖዜ ኔና ባዴዔ፤ ቤቴሳይዳ ኔናኣ ባዴዔ፤ ዒንሢዳ ማዺንቴ ፆኦሲ ዎልቄና ማዺንታ ዓኮ ባካ ዎንዴ ፂሮሴና ሲዶናናይዳ ማዺንቴያታቶ ዒኢካ ናንጋ ዓሳ ሄኤዶ ሲዬ ፓቲሌ ማይንቲ፥ ቢዲንሢያ ቶኦካ ዋሂ ዬኖ ዎዶ''ና ጎሞ ቡኡፄያ ናንዳኔ።

¹⁴ዬያሮ ጋፒንፆ ዎጎ ኬሎ''ና ቤርታ ፂሮሴና ሲዶናናም ዒንጎናስካፓ ዒንሢ ሜታሢ ባሼ ማዓንዳኔ።

¹⁵ሃና'' ኔኤኒ ቂፒርናሆሜ ካታሜሌ፥ ሌካ ጫሪንጮ ሄላ''ንዳኣና ዼ'ጊ ጋዓኒ ኔ ኮዒያ? ማዔቶዋ ኔ ሊካ ሄሊ''ንቱዋ ዼኤፖ ዔቶ'' ኬዳ''ንዳኔ» ጌዔኔ።

¹⁶ላሚ ሃሣ ዬሱሴ ዒዛኮ ጊንፆ ሃንታዞንሢ ኮራ፦ «ዒንሢም ዋይዛሢ ታኣም ዋይዛኔ፤ ዒንሢ ቦንቺ ዔኩዋኣሢ ታና ዔኩዋሴ፤ ታና ዔኩዋኣሢ ታና ዳኬሢያ ቦንቺ ዔኩዋሴ» ጌዔኔ።

¹⁷ላንካይታሚ'' ላምዖ ጊንፆ ሃንታዞንሢ ዳኪንቴ ቤዛፓ ሚርጌ ዎዛና ዬሱሴ ባንሢ ማዒ ሙካዖ፦ «ጎዳሢዮ! ኔ ሱንፆና ፑርቶ ዓያና'' ኑም ዓይሢንቲናኣኮቲ» ጌዔኔ።

¹⁸ዬሱሴ ዔያቶም፦ «ፃላሄ ዜኤሊንሢጉዲ ጫሪንጫፓ ኬዳ''ንቴ ታ ዛጌኔ፤

¹⁹ዬያሮ ዒንሢ ሾኦዦና ኮርናሢና ሄ'ርቃንዳጉዲ፥ ዒንሢ ሞርኮ ዒንሢ ባሻንዳጉዲ ቢታንቶ ዒንሢም ታ ዒንጌኔ፤ ዒንሢ ሄላ''ንዳ ባኣዚ'' ፔቴ''ታዖ ባኣሴ።

²⁰ጋዓንቴ ፑርቶ ዓያና'' ዒንሢም ዓይሢንቴሢሮ ዒንሢ ዎዛዻሢፓ ባሼ ሱንፃ ዒንሢኮ ጫሪንጮ ማኣራ ፃኣፒንቴም ፆኦሲ ዓሶ ባኣካ'' ዒንሢ ማዔሢሮ ዎዛዹዋቴ» ጌዔኔ።

²¹ዬማና ዬሱሴ ዓያና ጌኤሺ ዒዛ ዎዛሴም፦ «ጫሪንጮና ሳዖናኮ ጎዳ ማዔ፥ ዓዳሢዮ! ሃያ ባኮ ኔኤኒ ዔሮ''ና ዼኤፖ ዓሶናይዳፓ ዓኣቺ ናይጉዲ ማዔ ዓሶም ፔጋሲ ዻዌሢሮ ታ ኔና ጋላታኔ፤ ሂዮ! ታ ዓዳሢዮ! ዬያይዳኒ ኔ ማሊሢ ማዔኔ።

²²«ቢያ ባኣዚ'' ታ ዓዶይዳፓ ታኣም ዒንጊንቴኔ፤ ናኣዚ'' ዖና ማዔቴ ዓዶይዳፓ ዓታዛ ሜሌ'' ዔራይ ባኣሴ፤ ዬያጉዲ ሃሣ ዓዴ ዖና ማዔቶ ናኣዚ''ዳፓ ዓታዛ ሃሣ ጊንሣ ናኣዚ'' ዒዛም ፔጋሲ ኬኤዛኒ ኮዔ ዓሲዳፓ ዓታዛ ሜሌ'' ዖኦኒያ ዔራይ ባኣሴ» ጌዔኔ።

²³ዬካፓ ሃሣ ዬሱሴ ፔኤኮ ጊንፆ ሃንታዞንሢ ባንሢ ሺራዖ ዔያቶም ሌሊ፦ «ዒንሢ ሃያ ዛጋሢ ዛጋዞንሢ ኮሺ ባሊቲና ዓኣያኬ።

²⁴ጎኔና ሚርጌ ፆኦሲ ማሊፆ ኬኤዛዞንሢና ካኣቶ''ና ሃሢ ሃያ ዒንሢ ዛጋ ባኮ ዛጋኒ ሱኡካዼያታዖ ዔያታ ዛጊባኣሴ፤ ዒንሢ ዋይዛ ባኮዋ ዔያታ ዋይዛኒ ሱኡካዼኔ፤ ጋዓንቴ ዔያታ ዋይዚባኣሴ» ጌዔኔ።

²⁵ፔቴ'' ኬሊ'' ሙሴ ዔርዜ ዎጎ ዔርዛ ፔቴ'' ዓሲስኬይ ዬሱሴ ኮራ ሙካዖ ዒ ዎዚ ጋዓቴያ ዛጋኒ ኮዒ፦ «ዔርዛሢዮ! ናንጊና ናንጊ ዴንቃኒ ዓይጌንዴ ማዻንዳያ ታና ኮይሳይ?» ጌይ ዒዛ ዖኦጫዛ፥

²⁶ዬሱሴ ማሃዖ፦ «ሙሴ ዔርዜ ዎጎይዳ ዓይጌ ፃኣፒንቴይ? ኔ ናባባዛ ዎዚ ጋዓይ?» ዒዛም ጌዔኔ።

²⁷ዓሢ ማሃዖ፦ «ዎጋ'' ‹ፆኦሲ ኔ ጎዳሢ ጉቤ ዒናፓ፥ ጉቤ ሼምፓፓ፥ ጉቤ ዎልቃፓ፥ ጉቤ ማሊፃፓ ናሽኬ› ዬያጉዲ ሃሣ ‹ኔ ዓሺኖ ዓዳ'' ኔና ማሂ ናሽኬ› ጋዓኔ» ጌዔኔ።

²⁸ዬሱሴያ ፒዜ ኔ ማሄኔ፤ «ዓካሪ ኔኤኒ ዬኖ ጎይፆ ማዼ፤ ናንጊና ናንጊያ ኔ ዴንቃንዳኔ» ጌዔኔ።

²⁹ዎጎ ዔርዛሢ ጋዓንቴ ፔና ጌኤሺ ዓሲ ማሃኒ ኮዓዖ፦ «ያዺ ማዔቶ ታኣኮ ዓሺናሢ ዖናዳይ?» ጌይ ዖኦጬኔ።

³⁰ዬሱሴ ዒዛም ማሃዖ፦ «ፔቴ'' ዓሲ ዬሩሳላሜፓ ዒያርኮ ኬዳ''ንቴ ጎይፆይዳ ሱላ ዒዛ ዴንቂ ዓፒሎ ዒዛኮ ቡሪ ዔኪ ጳርቄሢኮ ጊንፃ ሃይቃኒ ሳዛ ጋሽካንቴ ሃሺ'' ዓኣዼኔ።

³¹ዒዛ ቶኪጉዲ ፔቴ'' ቄኤሴስኬይ ዬኖ ጎይፄሎና ዓኣዺቤቃ ጳዺንቲ ላቢ''፥ ላሂ ዓኣ ዓሢ ዴንቄያታዖ ዚቲ ጌዒ ዒዛኮ ኮርሳ ዓኣዼኔ።

³²ዬያጉዲ ሃሣ ቄኤሶ ፃጳፓ ማዔ ሌዊ ዜርሢስኬይ ዬኖ ጎይፆና ዓኣዺቤቃ ዬያ ዓሢ ዴንቄዖ ኮርሳ ዚቲ ጌዒ ዴንዴኔ።

³³ፔቴ'' ሳማሪያ ዓጪ ዓሲስኬያ ዬኖ ጎይፆና ዓኣዺቤቃ ጳዺንቴ ዓሢ ዴንቂ ሚጪንታዖ፥

³⁴ዓሢ ኮይላ'' ሙኪ ዛይቴ ቲሺና ዎይኔፓ ኮሾ''ና ዑሺና ኪፆይዳ ዓሢኮ ዋሂ ቱርጫና ማሪ ቱኬ''ሢኮ ጊንፃ ፔ ሃሮ'' ቶጊሲ ፔቴ'' ሾኦቺ ዎርቃ ማኣሪ ዔኪ ዓኣዼኔ፥ ዒኢካ ዒዛ ዒ ኮሺ'' ዛጊ ማይሤኔ፤

³⁵ዚሮ ጉቴ''ሎ ፔቴ'' ዓሲ ላምዖ ኬሊ'' ማዾ ማዼም ጪጎንዶ ቢራጉዴያ ኬሲ'' ዬኖ ሾኦጮ ዎይሣ ማኣሮኮ ዓዶም ዒንጋዖ ‹ሃያ ዓሢ ታኣም ኮሺ'' ዛጊ ማይሤ፤ ጊዳ'' ቃሲ'' ኔ ዒዛ ዛሎ'' ጪጌ ባኣዚ'' ዓኣቶ ታ ማዒ ሙካዖ ኔኤም ማሂ ጪጋንዳኔ› ጌዔኔ።

³⁶«ዓካሪ ዬንሢ ሃይሦንሢዳፓ ሱሎ''ና ጳዺንቴ ዓሢም ዓሺኖ ማዔሢ ዎያ ኔኤም ማላይ?» ጌዔኔ።

³⁷ዎጎ ዔርዛሢ «ዬያ ዒዛ ሚጪንቲ ማኣዴ''ሢሾ!» ጌዒ ማሃዛ፥ ዬሱሴ ማሃዖ፦ «ሂዴቶ ኔኤኒያ ዒማ ጎይፆ ማዼ» ጌዔኔ።

³⁸ዬሱሴ ዒዛኮ ጊንፆ ሃንታዞንሢና ዎላ'' ጎይሢ ዓኣዺ ፔቴ'' ጉርዳስኬኖ ሄላ''ዛ ዒኢካ ማርታ ፔ ማኣራ ዒዛ ሾኦቺንሢ ዔኬኔ፤

³⁹ዒዞኮ ማይራሞ ጌይንታ ጌራ ዓኣኔ፤ ዒማ''ና ዬና ማይራማ ዬሱሴኮ ቶኮ'' ዴማ'' ዴዒ ዒዛኮ ጌኤዞ ዋይዛኔ።