Luka 10:3-39

³Džan! Ače, bičhalava tumen sar bakrorjen maškaro ruva.

⁴Ma legaren tumencar kesa e lovencar, ni torba dromese, ni buderi obuća. I ma našalen tumaro vreme ađahar so ka terđoven te vaćeren nekasar odrumal.

⁵I ked đerdinena ko nesavo čher, prvo vaćeren: 'Mir akale čhereste!'

⁶Te adari bešela o manuš kova mangela mir, tegani o mir, savese tumen molinena, ka ačhol oleja; a te na manglja mir, na ka ovel adava mir savese molinena.

⁷Ked avena ko nesavo čher, ma palo adava nakhen ko aver čhera. Ačhoven ko jekh than, xan hem pijen adava so o čherutne ikalena angla tumende, adalese soi o bućarno dostojno pla plataće.

⁸I ki savi diz đerdinena, a o dizutne priminena tumen, xan okova so ikalena angla tumende.

⁹Sasljaren e nambormen adari hem vaćeren sarijenđe: 'Akaleja mothovaja tumenđe dai paše o carstvo e Devlesoro!'

¹⁰A ki savi diz đerdinena, a o dizutne na priminena tumen, iklindoj ko glavna droma e dizjakere, vaćeren:

¹¹'Hem i prašina tumara dizjakiri, savi dolinđa pe ko amare pre, amen kosaja la sar znako da o Devel ka sudini tumenđe. Ali te džanen da o carstvo e Devlesoro alo paše!'

¹²Vaćerava tumenđe da ko dive ked o Devel ka sudini e manušenđe, po lokhe ka ovel zako manuša tari Sodoma negoli zako manuša tari adaja diz.

¹³Jao tumenđe, manušalen taro Horazin! Jao tumenđe, manušalen tari Vitsaida! Te oven ine čudesija maškaro manuša taro Tir hem taro Sidon save ule maškara tumende, pana angleder ine ka kajinen pe, bešindoj ano šeja oto kanaj hem ano pepeo.

¹⁴Ali e manušenđe taro Tir hem taro Sidon ka ovel po lokhe ko Sudo negoli tumenđe.

¹⁵A tumen, manušalen taro Kafarnaum, ma mislinen da o Devel ka povazdel tumen đi o nebo; đi o Had isi te peraj tumen.

¹⁶Tegani phenđa e učenikonenđe: Ko šunela tumen, man šunela, a ko odbini tumen, man odbini. A ko odbini man, odbini e Devle kova bičhalđa man.”

¹⁷Ked o eftavardešuduj učenici irinde pe oto drom radosna, phende e Isusese: “Gospode, hem o demonja šunena amen ked naredinaja lenđe ano klo anav!”

¹⁸A o Isus ko adava phenđa lenđe: “Dikhljum e Sotone sar perela taro nebo sar munja.

¹⁹Eče, dinđum tumen vlast te gazinen upro sapa hem o škorpije hem upro sa o zoralipe e dušmanesoro e Sotonesoro i ništa na ka ovel tumenđe.

²⁰Ali ma edobor radujinen tumen zako adava so o demonja šunena tumen, nego više radujinen tumen adalese soi tumare anava zapisime ko lil e Devlesoro ano nebo.”

²¹I tegani o Isus radujinđa pe ano Sveto Duho hem phenđa: “Hvalinava tut, Dade, Gospode e nebosoro hem e phuvjakoro, so garavđan o čačipe okolendar kola pes dikhena sar mudronen hem džanden, a mothovđan okolenđe kolai sar čhavore. Oja, Dade, džanav da ćerđan adava adalese so ađahar mangljan.”

²²Tegani o Isus phenđa okolenđe so inele adari: “Mlo Dad sa muklja maje ko vasta. Samo o Dad šukar džanel e Čhave; hem e Dade šukar džanel samo o Čhavo hem o manuša kolenđe o Čhavo mangela te mothoj le.”

²³Tegani irinđa pe nakoro učenici hem samo olenđe phenđa: “Blago e manušenđe kola dikhena adava so tumen dikhena!

²⁴Vaćerava tumenđe da but proroci hem carija mangle te dikhen man, ali na dikhle man; hem mangle te šunen man, ali na šunde man!

²⁵I dikh, jekh dive sar o Isus ine sikaj, nesavo učitelj e Mojsijasere zakonestar uštino te pučel le nešto sar te iskušini le, i pučlja: “Učitelju, so valjani te ćerav te dobinav o večno dživdipe?

²⁶A o Isus phenđa lese: “Soi pisime ano e Mojsijasoro zakoni? So čitineja adari?”

²⁷I ov phenđa e Isusese: “Mang e Gospode te Devle sa te vileja, sa te dušaja, sa te snagaja hem sa te gođaja; hem mang te pašutne sar korkore tut.”

²⁸Tegani o Isus phenđa lese: “Šukar phenđan. Ćer ađahar hem ka ovel tut o večno dživdipe.”

²⁹Ali o učitelj e Mojsijasere zakonestar manglja te opravdini pe i pučlja e Isuse: “A koi mlo pašutno?”

³⁰A ko adava, o Isus phenđa lese akaja paramiz: “Nesave manuše, sar ine huljela tari diz Jerusalim ki diz Jerihon, dolinde o čora. On lelje lestar sa, đi o šeja. Edobor marde le da o manuš samo so na ine te merel. Tegani o čora cidinde pe olestar, a o manuš pašlilo ko drom hem na džanđa pese.

³¹Na nakhino but, i nekotar adale dromeja sar huljela ine nesavo svešteniko, dikhlja e manuše sar pašljola ko drom i nakhino avrethar.

³²Ađahar da nesavo levit: alo đi adava than kote o manuš pašljola, dikhlja le i nakhino oti aver strana adale dromesiri.

³³A inele nesavo Samarijanco savo džala ine adale dromeja. Ked reslja đi ko than kote o manuš pašljola, dikhlja le, i pelo lese žal olese.

³⁴Tegani o Samarijanco alo đi o manuš, čhorđa ulje hem mol upro lesere rane te kosel len hem paćarđa len. I vazdinđa le upro plo xer hem legarđa le ko čher kote lovenđe šaj te xal pe hem te sovel pe, i adari brininđa pe olestar.

³⁵Tejsato dive o Samarijanco ikalđa duj denarija hem dinđa ko manuš kasoro inele o čher hem phenđa lese: 'Brinin tut akale manušestar, i sa so ka trošine buderi, ka irinav će ked ka irinav oto drom.'”

³⁶Tegani o Isus pučlja e učitelje e Mojsijasere zakonestar: “So tu pheneja? Kova akale trinendar mothovđa pe sar pašutno okolese kole dolinde o čora?”

³⁷A ov phenđa: “Okova kova mothovđa lese milosrđe.” Tegani o Isus phenđa lese: “Oja, akana dža hem ćer ađahar!”

³⁸I sar o Isus hem lesere učenici džana ine dromeja đi ko Jerusalim, đerdinde ko nesavo gav. Adari živinđa nesavi đuvli palo anav Marta. Oj vičinđa len kora peste ko čher hem lelja te ćerel lenđe xajbnase.

³⁹Ola inele phen palo anav Marija, koja beštini uzalo e Gospodesere e Isusesere pre hem šunđa lesoro lafi.