Luka 10:3-39

³Caan munu ntomunu nafo akam nanya ninyonyo,

⁴Na iwa yaun nkka nikurfun ba, sa nkkan ncin ba, sa akwatak, na iwa su ilip libau ba.

⁵Nanya vat kilari ka na ipira, nin cizine woro, 'Nsheu so nanya kilari kane.'

⁶Asa unan kibinai kisheu duku, nsheu mine ba so nanghe, andi na aduku ba, nshew mine ba kpilu kiti mine.

⁷Soon nanya kilari kani, ilii iso ile imon na ina mune, bara unan kauwa nbatina aseru uduk mine na iwa dortu niliri ba.

⁸Vat kagbir ka na ipira, asa isere munu leo vat nile imon na inna munu,

⁹shinon nin na tikonu, iworo nani, 'kipin tigo Kutelle di susut nanghinu.

¹⁰Bara vat nanya kagbir ka na ipira asa na isere munu ba, nuzun nanya tibau mine iworo,

¹¹'Vat lidau kagbir mine na litafina nabunu bite, ti wese kiti mine, bara yinnon kipin tigo Kutelle nda susut nanghinu.'

¹²Meng nworo munu, uwui nwucu kidegen, nbati ayi asheu nin Sodom nanin kipin kane.

¹³Kash Korasinu! Kash Batsaida! Dafo umon izikiki ile na ina su kiti mine nda innere inasu ntaya nin Sidon iwa su udiu kutyin, iwa shonu imon tiyom iso nanya ntong.

¹⁴Bara nbati ayi asheu nin ntaya nin Sidon au na anug ba.

¹⁵Anung anan Kafarnahum idin kpilizu iba ghantin munu kitene kane? Nani ba iba da nin ghinu udu kuwu nlah sa ligan.

¹⁶Ule na alanza munu, alanza menku, ule na anari munu anari menku, anari ule na ana tiiyi.

¹⁷Anit akut kuzor ane saa nin liburi libo, agbergenu nna nari atimine nanya lisafe.

¹⁸Yesu woro nani, “Nwandi nyenju sheitan wa diu kitene kani nafo ummali nu kiti.

¹⁹Yenen, ina na munu likara, ipatilu iyii nan ninang, nan vat nakarra na nan nivira mine, na imomon ba lanzu munu ukul ba.

²⁰Vat nani na iwa su, liburi liboo bara nani cas ba, nworu tiruhu nna atimine kiti mine ba, suun liburi libo inyertinee ti sa mine kitene kani.”

²¹Nanya kubi kurum, asu liburu libo nanya Nruhu Ulau, “Nzazin fi Ucif nigh, Cikilarikitene nin kutyin bara unyeshe ile imone kiti ni najinjin anan yiru, umini npuno kiti nalenge na ina dursuzo nani ba, ni nono nibebene, nanere Ucif nigh, ucaun nanya nyenu fe.”

²²“Vat nimon Ucif nighe na niy, na umon yiru gone ba, Ucife, na umon yiru Ucife ba se gone, vat nle na gone nyinna aba dursu ghe liti mye.”

²³Na agitirno kiti nono katuwa mye a woro kusari, “Anan nmariari alenge na idin yenju ile imon na anug nyene.

²⁴Meng woro munu gbardang na nan nliru nin nnu Kutelle nan nago din piziru iyene ile imon na anung na yene na iyene inin ba, Ukuru ilanza ile imon na anung na lanza, na ilanza ba.”

²⁵Nani umon unan ndursuzu nduka na Yahuduwa, dumunghe a woro, “Unan nyiru iyaghari nba su inan se ulai sa ligan?”

²⁶Yesu woroghe, “Iyaghari di nanya ninyerte nduke?”

²⁷Akawa awooro, “Ubati usu Ncikilari Kutelle fe, nin vat nlaife inin vat likara fen nin kibinai fe, nin ndindin lisosin kupofe nafo liti fe.”

²⁸Yesu kawa a woroghe, “Ubelle dert, su nani unan so.”

²⁹Ame unan yiru ninyerte dinin su a durso liti mye, a woro Yesu ku, “Ghari udondon kupo nighe?”

³⁰Nkawe Yesu woroghe, “Umon unit wa nuzu Nurushelima udu Ujariko apira nacara nakiri, ifoghe icinghe fal.

³¹Nanya kube umon upirist dofino libau we, n ayene a raffa likot akata nkon kusari.

³²Nani tutung nkon kuliviyawa da kitene ayene ghe, akuru ayira nkon kusari akata.

³³Nkon ku Samariyawa di ncin mye ada kiti nkunekune mye.

³⁴Ada kupo mye atece ghe annute, atintio ghe nnufu ku, a tarda ghe kitene kajaki mye, ada ninghe kilari namara, amin ghe gegeme.

³⁵Ukurtunu nkuiye, ayira isule iba anah unan kitene aworoghe, 'Mini ame gegeme, ndo ndak, vat nile imon na Uwutuno mba biufi.'

³⁶Uyemeri nanya na watat ale udin yenju adi udondon lisosin kiti nle na awa piru a cara nakire?”

³⁷Unan yure woro, “Ulange na awa lanza ukunekune.” Yesu woroghe, “Can udi su nani.”

³⁸Nene ikiffo ucin, ipira nkan kagbir umon uwani lisa mye Marta taa ghe mahabi, ada ninghe kilari mye.

³⁹Ayita nin gwana kishono lisa mye Maryamu, aso nabunu Ncikilari adin nlanzu nliru mye.