Lukas 10:3-39

³Mu vano ngane! A rudu tala mua manga a tuna sipsip ri laho na kurukuruna kabu na kaugara.

⁴Naha ni bole a hole. Naha ni rodo a vahapolo. Naha ni vakapae ni ta turana viri na dala.

⁵“Na tahuna mu dili na ruma na viri, mu takia, ‘O made na nivalemu.’

⁶A bakovi na nivalemu ge made vonga, a nivalemu bara i rike vona. Pali a bakovi i made vonga i uka ma ga bakovi na nivalemu, a nivalemu bara i hamule mai mua.

⁷Mu mahita na ruma i taku kunana. Mu made na ruma iea, mu kani mu ninu a maki ni habi ne mua, a vuhuna a vora na leho i tahoka a mapana.

⁸“Na tahuna mu dili na tanga tara, lakea e huriki ri gi tagui mua, mu kani a maki ri habi ne mua.

⁹Mu kori e huriki vonga ri giloa, mu taki ria, mu ta maea, ‘A harikianga na Vure i bele tabukoi pali ne mua.’

¹⁰Pali na tahuna mu dili na tanga dagi tara, i uka ma ri tagui mua, mu pesi na matane ria, mu ta maea,

¹¹‘Miri puraki vuroki a habulo na tanga ne mua i madoko na vahane maria, a vuhuna mu rata hale maria. Pali ngane mu luhoi kamumu: A harikianga na Vure i bele tabukoi pali.’

¹²A taki mua, na nilobona parava a nimadihi bara i bole e huriki na tanga iea bara i dagi hateka na nimadihi i bolea e huriki na tanga e Sodoma.”

¹³Muri e Isu i ta maea, “Mua o huriki a bakovi a ngatavine o Korasin, o Betsaida, a Vure bara i ratapile mua! A maka nivakasiri a rata na tanga ne mua, bara ni rata hosi o Tair, o Sidon, bara ri pulo malaviriri a vilone ria, ri rodo a mohu, ri voro tapa mule ne ria a habulo.

¹⁴“Na parava a Vure ge pelekado e huriki vona, a nimadihi bara mu bolea bara i dagi hateka na nimadihi bara ri bole e huriki na tanga e Tair e Sidon.

¹⁵Mua o huriki a bakovi a ngatavine o Kapernaum, mu luhoi a Vure ge bole rike mua na hunu? I uka liu! Bara i voro puru mua na tanga ne huriki ri mate pali.

¹⁶“E rei a viri i longo mai mua, i longo mai iau. E rei a viri i marikoi mua, i marikoi iau. E rei a viri i marikoi iau, i marikoi vona ra viri i rudu iau a valai.”

¹⁷Na tahuna e huriki ala ravulu polo rua a polona i rua ri hamule, ri vivi hateka, ri ta maea, “Bakovi Dagi, mi kurahia a ramu, lakea e huriki a hanitu ri longototo mia.”

¹⁸E Isu i koli i ta maea, “A masia e Satan i boru valai na hunu, i manga a vila.

¹⁹A habia pali ne mua a nitora mu gu pahamomo a mata, a kira, mu gu rangi a nitora na pile ne hita, e Satan. I uka tara maki ge ratapile mua.

²⁰Pali naha ni vivi vona e huriki a hanitu ri longototo mua. A maki mu vivi vona, a rane mua ni here puru pali na hunu.”

²¹Muri a Hanu Kiripiripi i ratea e Isu i vivi, lakea i ta maea, “O Tata, ioe a Bakovi Dagi na hunu a malala. A kavurike ioe, a vuhuna o vakasiri a nitamu ne huriki a bakovi tavula, pali o ruhuloloa ne huriki ri luhoi ta ri lohoka hateka. I muholi, o Tata, o muri mai a ningaru vomu o rata mavonga.”

²²Muri e Isu i ta maea, “E Tata i ru na limagu a maki lobo. I uka tara viri ge lohoka vona e Tuna. E Tata kunana i lohoka vona. E Tata tara i uka tara viri ge lohoka vona. E Tuna kunana i lohoka vona. Na tahuna e Tuna bara i vulaki e huriki ranga, ria ranga bara ri lohoka ne Tata.”

²³Muri, e Isu kunana i made turana e huriki a murimuri, lakea i taki ria, i ta maea, “I kamumu hateka mu matai a maka maki nga. Mu vivi,

²⁴a vuhuna e huriki a propet a hariki hosi ri ngaru hateka ni matai a maki mu matai ngane, pali i uka ma ri matai. Ri ngaru ni longo a maki mu longo ngane, pali i uka ma ri longo.”

²⁵Na parava tara a mari na vinara tara i pesi rike, i tonia e Isu, i nana maea, “Mari ni tovo, a ra maki ga ratea ga bole a nimahuri vakaroro?”

²⁶Pali e Isu i koli i nana tabua, “Ra ngava ni here puru na vinara, i ta navai?”

²⁷A mari na vinara i koli i ta maea, “A vinara i maea, ‘O ngarua e Bakovi Dagi a Vure vomu. O ngarua na hatemu lobo, na hanumu lobo, na nitora vomu lobo, na niluhoi vomu lobo. O ngarua e turamu i manga a hini o ngaru mule ioe.’”

²⁸E Isu i koli i ta maea, “O koli kamumu hateka. O rata mavonga bara o bole a nimahuri vakaroro.”

²⁹Pali a mari na vinara i ngaru ni vakasiri e huriki a ninana vona i kamumu, lakea i nana tabua, “E rei e turagu?”

³⁰Lakea e Isu i koli i ta maea, “A bakovi tara i pea e Ierusalem i laho puru o Ieriko. Pali e huriki a panaho ri lakavua na dala, ri kali vuroki a varakia vona, ri panaho a maki lobo vona, ri ubi pilea, ri taparakia vonga ge mate, ri vano ria.

³¹A prister tara i laho muri valai. Na tahuna i masia a bakovi iea i tabuli mavonga na dala, i laho polo lele vona, i vano.

³²Muri, a bakovi tara na kabu ne Levi i valai i masia a bakovi iea i tabuli mavonga na dala, lakea ia tara i laho polo lele vona, i vano.

³³Pali muri a bakovi tara o Samaria i laho puru valai. Na tahuna i bele vona a hini i tabuli vona a bakovi, i masia, i dodoa.

³⁴I guru puru na harena lebo vona a nibiri, a vain. I kae karia a harena lebo. Muri i vakamadea na donki vona, i bole lakea na roho na mosi, i matakaria vonga.

³⁵Na parava muri i bole tala a moni a silva i rua, i habi na tahona roho na mosi. Muri i takia, i ta maea, ‘O matakari kamumua koea. Muri ga hamule valai tabu, ga koli mule ranga maki o matakaria vona.’

³⁶“E rei ne tou o luhoia ge ia e turana bakovi iea, ra ri ratapilea e huriki a panaho?”

³⁷A mari na vinara i koli i ta maea, “E turana, ra viri i dodoa.” Lakea e Isu i takia, “O vano, o rata mavonga.”

³⁸Na tahuna e Isu turana e huriki a murimuri vona ri lalaho sike o Ierusalem, ri bele vona tara tanga. Lakea a ngatavine tara, a rane Marta, i taguia e Isu, i takia ge kani taro na ruma vona.

³⁹E Marta i tahoka e tarina, a rana e Maria. E Maria i made puru tabukoi na vahane Bakovi Dagi, i longo a ngavana.