Luk 10:3-39

³Awa! Nəkɔ, isak’un nəkɔ pəmɔ ntɛ aŋsak ŋkesiya calma dacɔ mɔ.

⁴Ta nətɔmpərɛnɛ pəsam pa delek, ta nətɔmpərɛnɛ lɔba, ta nətɔmpərɛnɛ cɔfta, ta nəyifɛnɛ sɔ kɔ fum o fum dɔpɔ.

⁵Kəlɔ nkɛ o nkɛ nəndekɔ-bɛrɛ mɔ, nəkulɛ kərɛsna: ‹Kanu kəbɛrsɛ pəforu kəlɔ kaŋkɛ!›

⁶Kɔ pəyɔnɛ, fum wəka pəforu eyi kəlɔ kaŋkɔ-ɛ, pəforu ponu peŋyi kɔ kəroŋ; kɔ pəyɔnɛ fɛ ti-ɛ, pəforu papɔkɔ poluksərn’on.

⁷Nəyi kəlɔ kaŋkɔ, nədi yeri, nəmun domun da kəlɔ kaŋkɔ; bawo pəmar pasɔŋ wəbəc kəway kɔn. Ta nəc-cal-cali wɔlɔ de!

⁸Dare ndɛ o ndɛ nəbɛrɛ a pabaŋ’un mɔ, nədi yeri yɔkɔ aŋsɔŋ’un mɔ.

⁹Nətaməs acuy akɔ ŋayi di mɔ, nəloku ŋa: ‹dɛbɛ da Kanu dɔlɔtərn’on.›

¹⁰Dare ndɛ o ndɛ nəkɔ ta ambaŋ’un mɔ, nəkɔ nde abaŋka ŋaŋan nəloku:

¹¹‹Səŋkoŋər’un kəbof ka dare donu ali nkɛ kəsoptɛ su dəwɛcək mɔ, səluks’on ki; nətam kəcərɛ a dɛbɛ da Kanu dɔlɔtərnɛ.›

¹²Ic-lok’un a dɔsɔk dadɔkɔ, tɔyɔ ntɛ andeyɔ dare dadɔkɔ mɔ, tendeyeŋk tecepər ta Sodom.»

¹³«Pəlɛcər’əm məna dare da Korasin! Pəlɛcər’əm məna, dare da Bɛtsayida! Bawo mes mɛwɛy-wɛy mmɛ Kanu kəmmentər ayɔ nnɔ ndoronu mɔ, m’ anayɔ sədare sa Tir kɔ Sidɔŋ-ɛ, kɔ ŋanasəkpər mera pəwon, ŋacəmɛ pəlompu darəŋ, ŋabɛrnɛ yamos yaŋan ya kəbal, ŋandɛ ŋamɔŋcnɛ!

¹⁴Itɔ endesɔŋɛ dɔsɔk da kiti ka Kanu dadɔkɔ, pəfɔdeyeŋkər Tir kɔ Sidɔŋ pəmɔ nəna.

¹⁵Kɔ məna, dare da Kapɛrnayum, məŋcɛm-cɛmnɛ a andekɔ-pɛn’am haŋ dareŋc? Ala! Andekɔ-tor’am dəntɔf haŋ nnɔ afum afi ŋayi mɔ.

¹⁶Nwɛ ɛŋcəŋkəl’un mɔ, ɛŋcəŋkəl’im. Kɔ nwɛ ɛŋwɛnəs’un mɔ, ɛwɛnəs’im, k’ɛwɛnəs wəkɔ osom’im mɔ.»

¹⁷Kɔ afum 72 aŋɛ anasom mɔ ŋalukus pəbotu disrɛ kɔ ŋaloku: «Wəbɛ! Ali yɔŋk yɛlɛc fəp yɛnayi su dəntɔf tewe tam.»

¹⁸K’oloku ŋa: «Indenanəŋk Sentani kətɛmpɛnɛ kəyɛfɛ dareŋc pəmɔ tɔkɔ pəŋmot mɔ.

¹⁹Nəcəŋkəl: Isɔŋ’un kətam kəkɔt ka bok kɔ mekəleŋcər kəroŋ kəlɛkɛnɛ fənɔntər fa ater anu fəp, daka o daka dɔfɔtam kəyams’on ti.

²⁰Mba ta pəbɔt’un ntɛ yɔŋk yɛlɛc yeyi nu dəntɔf mɔ, mba pəbɔt’un ntɛ aŋcic mewe monu nde dareŋc, ndena Kanu mɔ.»

²¹Tɛnatəŋnɛ, Amera Ŋecempi ŋa Kanu ŋɔsɔŋɛ pənaŋkanɛ kəbɔt Yesu, k’oloku: «Iŋyek-yekəs’əm, Papa, Wəbɛ wəka dareŋc kɔ dəntɔf, ntɛ məmɛŋkər abeki kɔ asoku səbomp mes mamɛ, a kɔ məmentər mi awut afɛt mɔ. Ɛy, Papa, bawo tatɔkɔ tɔ məfaŋ ti.

²²Ic-lok’un a Papa kem ɛmbɛr’im ca fəp dəwaca. Nwɛ o nwɛ ɛŋcərɛ fɛ nwɛ ɔyɔnɛ Wan mɔ, kɔ pəntɔyɔnɛ Papa-ɛ; nwɛ o nwɛ ɛŋcərɛ fɛ sɔ nwɛ ɔyɔnɛ Papa mɔ, kɔ pəntɔyɔnɛ Wan-ɛ, kɔ afum akɔ Wan ɛŋfaŋ kəloku ti mɔ.»

²³Kɔ Yesu ɛŋkafəlɛ k’ɛntɛfərnɛ acɛpsɛ ɔn darəŋ, k’ɛyɛl dim, pəc-loku ŋa: «Pəmbɔt fɔr yɔkɔ yɛŋnəŋk mɔkɔ nəyi kənəŋk mɔ!

²⁴Bawo adəŋk a Kanu kɔ abɛ a tɔf yɛlarəm ŋanafaŋ kənəŋk mmɛ nəyi kənəŋk mɔ, mba ŋananəŋk fɛ mi; ŋanafaŋ kəne mmɛ nəyi kəne mɔ, mba ŋanane fɛ mi.

²⁵Kɔ wətəksɛ sariyɛ wəlɔma ɛyɛfɛ k’oloku Yesu, ntɛ ɛfaŋ kəcəpɛ kɔ towul mɔ. K’eyif Yesu: «Wəbɛ, cəke cɔ pəmar iyɔ kəsɔtɔ ka kəyi wəyeŋ katina-ɛ?»

²⁶Kɔ Yesu eyif kɔ: «Cəke cɔ aŋcic nde buk ba sariyɛ-ɛ? Cəke cɔ məŋkaraŋ bi disrɛ-ɛ?»

²⁷Kɔ fum nwɛ oloku Yesu: «Pəmar məbɔtərɛ Wəbɛ Kanu abəkəc ŋam fəp, amera ŋam fəp, fənɔntər fam fəp, kɔ kəsɔk kam domp fəp. Kɔ telip-ɛ, məbɔtər wɛŋc’əm pəmɔ tɔkɔ məmbɔtərnɛ məna sərka mɔ.»

²⁸Kɔ Yesu oloku kɔ: «Məloku ti bel-bel, məyɔ tatɔkɔ ntɛ tɔŋsɔŋ’am kəyi wəyeŋ katina mɔ.»

²⁹Mba ntɛ wəbɛ wəka sariyɛ nwɛ ɛfaŋ kəmentər dolompu dɔn mɔ, k’eyif Yesu: «Anɔ ɔyɔnɛ wɛŋc’im-ɛ?»

³⁰Kɔ Yesu ɔŋgbɔkərɛ moloku k’oloku: «Fum wəlɔma ɛnayɛfɛ Yerusalɛm pəc-kɔ Yeriko. Kɔ afum wəkakɔ ɔŋkɔ pəbɛrɛ afum alɛc dacɔ, kɔ afum alɛc akakɔ ŋambaŋər kɔ daka dɔkɔ ɛnatɔmpər mɔ fəp, kɔ ŋasut kɔ haŋ pəc-but kəfi, kɔ ŋasumpər dɔpɔ kɔ ŋaŋkɔ.

³¹Kɔ tosurɛnɛ wəloŋnɛ wəlɔma osolnɛ sɔ dɔpɔ din dadɔkɔ; ntɛ wəloŋnɛ nwɛ ɛnəŋk fum wəkɔ anasut mɔ, k’eŋcepər dɔpɔ ntende pəbɔlɛ kɔ.

³²Kɔ wəLewy wəlɔma ender sɔ kəfo kin kaŋkɔ; kɔ wəkakɔ sɔ ɛnəŋk fum nwɛ, kɔ nkɔn sɔ eŋcepər ntende pəbɔlɛ kɔ.

³³Kɔ wəSamari wəlɔma nwɛ ɔŋc-kɔ delek mɔ, ender pəbəp fum wəkawɛ ntɛ ɛnəŋk kɔ mɔ, kɔ nɔnɔfɔr deyi kɔ.

³⁴Kɔ wəSamari nwɛ ɔlɔtərnɛ fum nwɛ, k’oloŋər ruŋc yɔn member, k’ɔmbɔy yi moro; k’esektər yi. Kɔ wəSamari nwɛ ɛlɛk fum wəkakɔ k’endeŋ kɔ pɔkɔtɛnɛ pɔn kəroŋ, k’eŋkekərɛ kɔ karwaŋse kəlɔma, k’ɔŋkɔ pəboc kɔ di, k’ɛŋcəmɛ tetɔn.

³⁵Dɔckɔsɔk kɔ wəSamari nwɛ owurɛ gbəleŋ mɛrəŋ ba pəsam, k’ɔsɔŋ bi wəka karwaŋse. K’oloku kɔ: ‹Məgbɛkərɛ kɔ, mpɛ o mpɛ mendesɔŋ kɔ mɔ, indeluks’am pi dəkəlukus dem.›»

³⁶Kɔ Yesu ɔnɔcər: «Afum akaŋɛ maas dacɔ anɔ ɔ məna məŋcɛm-cɛmnɛ kəyɔnɛ ka wɛŋc ka fum wəkɔ afum alɛc ŋanasut mɔ?»

³⁷Kɔ wəbɛ wəka sariyɛ nwɛ oloku: «Nwɛ ɛnamentər kɔ amera ŋobotu mɔ.» Kɔ Yesu oloku wəbɛ wəka sariyɛ nwɛ: «Awa, məna sɔ məkɔ məyɔ tatɔkɔ.»

³⁸Yesu ŋayi dɔpɔ kəkɔ kɔ acɛpsɛ ɔn darəŋ, kɔ ŋambɛrɛ dare dɔlɔma, kɔ wəran wəlɔma pac-we kɔ Marta, ɛmbaŋ kɔ nde ndɔrɔn.

³⁹Marta ɛnayɔ wɛŋc wəran wəlɔma nwɛ aŋc-we Mari mɔ, kɔ wɛŋc nwɛ ɔŋkɔ pəndɛ Wəbɛ dəntɔf, pəc-cəŋkəl moloku mɔn.