Lukas 10:3-39

³Komail kola; kilang, I kadar komail la dueta sippul akan nan pung en kidi en wei akan.

⁴Komail der wewa ed en moni, de ed en sailok, de sut, o der ranamau ong meamen nani al o.

⁵A ma komail pan pedelong ong nan im eu, komail pan inda mas: Popol en mimi nan im wet!

⁶A ma popol amen mi wasa o, omail popol pan mimieta re a, a ma so, omail popol pan pure dong komail.

⁷A komail pan mimieta nan im ota, o manga o nim, me mi re ’rail pwe toun dodok me warong pwain a. Komail der pedoi sang nan eu im ap kolong ong nan eu.

⁸A ma komail pan pedelong nan eu kanim, o re pan kasamo komail, i wasa komail pan tungole, me pan wisike dong komail.

⁹O kakelada me somau kan, me mi wasa o, o kaire kin irail: Wein Kot koren dong komail.

¹⁰A ma komail pan pedelong nan eu kanim, o re sota pan kasamo komail, i wasa komail pan pedoi nani al indada:

¹¹Pil pwel par, me ko dong kit nan omail kanim, sipede dong komail; ari so, komail en asa, me wein Kot koren dong komail.

¹²I indai ong komail, nan a pan mangai ong Sodom ni ran o sang kanim o.

¹³Suedi ong uk Korasim! Suedi ong Petsaida! Pwe ma manaman akan, me wiaui ong uk er, wiaui ong Tirus o Sidon, nan melel, re pan kalula nan tuk en likau o nan pas.

¹⁴A a pan mangai ong Tirus o Sidon ni kadeik o sang komail.

¹⁵A koe Kapernaum, me paidar nanlang, pan pisikondi ong nan pweleko.

¹⁶Me rongerong komail, nan a kin rongerong ia; o me mamaleki komail, nan a kin mamaleki ia. O me mamaleki, ia, nan a kin mamaleki, me kadar ia do.

¹⁷Me isiakan ap puredo, pereperen potoan ong: Maing, pil tewil akan udi ong kit ni mar omui.

¹⁸A kotin masani ong irail: I kilanger Satan likamata liol a pupedi sang nanlang.

¹⁹Kilang, I ki ong komail manaman, en tiakedi serpent o skorpion, o en poedi kel en imwintiti karos. O sota meakot pan kasuedi ong komail,

²⁰Ari so, komail der peren kida, me ngen akan kin udi ong komail, a komail peren kida me ad omail intingidier nanlang.

²¹Ni auer ota Iesus kotin perenda ni ngen e masani: I kapinga komui, Sam ai, kaun pan lang o sappa, me komui okila mepukat sang me lolekong o koiok kan, ap kasale ong seri pwelel akan! Ei Sam ai, pwe iduen me komui kupukupura.

²²Meakaros muei ong ia er sang ren Sam ai, o sota me asa sapwilim a Ol, pwe Sam eta. O sota me asa Sam, pwe sapwilim a Ol eta, o me sapwilim a Ol pan kasale ong.

²³I ap kotin saupei dong tounpadak kan, masani ong irail eta: Meid pai por en mas akan me udial, me komail udialer.

²⁴Pwe I indai ong komail, saukop o nanmarki kan toto anane udial, me komail kin ududial, a re sota kilanger; a re men rongada, me komail kin rongerong, ap sota rongadar.

²⁵A kilang, saunkawewe men ap uda, kasongesong i potoan ong: Saunpadak, da me i en wiada, pwen sosoki maur soutuk?

²⁶A kotin masani ong i: Da me intingidier nan kapung o? Daduen om dondoropwe?

²⁷A sapeng indada: Koe en pok ong Kaun om Kot mongiong om unsok, o ngen om unsok, o kel om unsok, o om Iamelam unsok, o men imp om dueta pein koe.

²⁸A kotin masani ong i: Koe meid sapeng inen, wiada mepukat, a koe pan maurela.

²⁹A ap men ak kapungki pein i indang Iesus: A is men imp ai?

³⁰A Iesus kotin sapeng masani: Aramas amen momait sang Ierusalem kodila Ieriko ap lodi ong lolap akai, me ter sang a likau kan, o kame i, rap koieila; i ari pan mela.

³¹A samero amen momaitela nani al ota. A ni a kilang i, ap daulul wei sang.

³²A leap amen pil dueta. Ni a leler wasa o, kilang i, ap daulul wei sang.

³³A ol en Samaria amen sailok sili ap pil weid wasa o. Ni a kilanger i ap pokela,

³⁴Kola re a, o kidim pena a pwal akan, ap ki ong le o wain lole o kamondi i pon dake pa man o, wala nan im en kairu eu, apapwali i.

³⁵Manda a pan samala, ap ki ong kaun en im o denar riau indang i: Apapwali i! A ma mekis pan dauli, i pan kapungala, ni ai pan puredo.

³⁶A is ren ir silimen, me koe wiaki men impan ol o, me lodi ong lolap oko?

³⁷A sapeng: Me wiadar dodok kadek ong i. Iesus ap kotin masani ong i: Ari, kowei ala sang!

³⁸A kadekadeo ni ar kotin sailokela, a kotilong ong nan kisin kanim eu. Li amen mi wasa o, ad a Marta, me kasamo i long ong nan im a.

³⁹Ri a li amen mia, me ad a Maria, me momod ni aluwilu en Iesus, rongerong a masan.