LUKA 10:3-39

³Ndokoni! Tsono dziwani kuti, ndiri kukutumizani ninga mabira pakati pa pamphumphi.

⁴Lekani kutakula bzikhwama, ayai budu, ayai xango. Ndipo lekani kumusana na wanthu munjira.

⁵Mukafika panyumba iri yentse, cakuyamba muwauze kuti: “Ntendere mbaukhale pano!”

⁶Panyumba imweyo pakakhala pana munthu omwe an'funa ntendere, ndipo ntendereyo un'khala na iye. Tsono pakakhala palibe munthu omwe aniufuna, iwo un'bwerera pomwe kuna imwepo.

⁷Na tenepo khalani panyumba imweyo, ndipo mucidya na kumwa bzomwe an'kupasanibzo. Thangwe munthu ali wentse omwe am'phata basa bzinfunika kuti atambire malipiro yace. Lekani kucoka panyumba yomwe mwafukirayo muciyenda nyumba inango.

⁸Mukafika munzinda uli wentse, mucitambiridwa bwino, dyani bzomwe an'kupasanibzo.

⁹Limbisani atenda omwe ali m'mwemo, muciwauza kuti: “Umambo bwa Mulungu bwakufikirani.”

¹⁰Tsono mukafika mumzinda mucisaya kutambiridwa bwino, phatani njira muyende muciwawuza kuti:

¹¹“Napo pfumbi lentse lomwe latisvipiza mumzinda mwanu muno, tiri kukukutumulirani. Na tenepo dziwani kuti Umambo bwa Mulungu bwafika.”

¹²Ndiri kukuwuzani pomwe kuti pantsiku yakutongeduwa nyathwa ya Sodoma in'dzakhala in'gono kuposa ya mzinda umweyo.

¹³Nandi iwe Korazi! Na iwembo Betsaida! Yangadakhala kuti matsenga yomwe yacitika kumwekoyo, yacitikira kumzinda wa Tiru na Sidoni, wanthu wa m'mwemo angadabvala mausakala acibvumbvulika padotha kuti cikhale cizindikirokuti iwo aleka kucita bzakuipa.

¹⁴Ndipo kuna Tiru na Sidoni, nyathwa yawo in'dzakhala ing'ono kuposa yanu pantsiku yakutongedwa.

¹⁵Na iwembo Kafarnau, kodi un'kumbuka kuti un'dzabzikwiza mpaka kudzulu? Tsono iwepo un'dzathusidwa m'cidindi ca moto!

¹⁶Na tenepo ule omwe an'kutetekeraniyo, na inembo wanditetekera. Na ule omwe an'kulambaniyo, na ine wandilambambo. Ndipo ule omwe andilambayo, walambambo ule omwe adandituma.

¹⁷Pomwe ateweri makumi manomwe na awiri adabwerera akhadakomeduwa acimuwuza kuti: “Mbuya, na bziwanda kubodzi bzikhatibvera mudzina lanu.”

¹⁸Ndipo Jezu adawatawira aciti: ''Ine-pano ndamuwona Sathani acigwa ninga mpheni iri kucokera kudzulu.

¹⁹Tsono ndidakupasani kale mphambvu zakuphata nazo nyoka na anyankalize na manja. Ndipo mucikunda mphambvu zetnse za nyamadulanthaka. Ndipo palibe cinthu comwe cin'dzakucitani kuipa.

²⁰Na tenepo lekani kukondwa nakuti bziwanda bzikhakubverani. Tsono kondwani thangwe madzina yanu yadanembedwa kudzulu.”

²¹Panthawe imweyo, Jezu adakondwa kwene-kwene na thangwe ra Mzimu Wakucena acilewa kuti: ''Ndiri kukupasani mbiri imwe Baba Mulungu, Mbuya wakutonga kudzulu na pantsi. Nakuti imwepo mudabisira bzinthu bzimwebzi wanthu waluso na wakupfundza. Ndipo mucibzilatiza kuna tuwana tung'ono-tung'ono. Na tenepo mudabzicita na thangwe ra cifundo canu.

²²Bzensenebzi adandipasa ni Babangu. Ndipo palibe munthu winango omwe an'dziwa Mwana kuposa Baba. Ndipo palibe pomwe munthu omwe an'dziwa kuti Baba mbani kuposa Mwana, mphambo wale omwe Mwanayo angafune kuwalatiza.”

²³Na tenepo Jezu adaceuka kuna ateweri wace aciwauuza kumphundzu aciti: “Yakusimbidwa ni maso yomwe yali kuwona bzomwe imwepo muli kuwonabzi!

²⁴Na tenepo dziwani kuti apolofeta na azimambo azinji akhafunambo kuwona bzomwe muli kuwonabzi. Tsono iwo alibe kubziwona. Ndipo na kubva bzomwe muli kubvabzi. Tsono iwo alibe kubzibva.”

²⁵Pantsiku ibodzi adamuka munthu mwinango omwe akhali mpfundzisi wa mtemo. Na tenepo iye akhafuna kuyezera Jezu. Ndipo iye adam'bvundza kuti: “Misiri! Kodi ningacite tani kuti ndidzakhale na moyo wa kusaya kumala?”

²⁶Na tenepo Jezu adamutawira aciti: “Kodi ntemo udanemba ciani? Umbauwerenga tani?”

²⁷Ndipo iye adatawira aciti: “Udzacitire lufoi Mbuya Mulungu wako, na mtima wako wentse, na moyo wako wentse, na mphambvu zako zentse, na ndzeru zako zentse. Ndipo udzacitirembo lufoi mwandzako ninga momwe umbabzicitira iwepo.”

²⁸Na tenepo Jezu adamuwuza kuti: “Watawira bwino. Cita bzimwebzo na tenepo un'dzakhala na moyo wa kusaya kumala.”

²⁹Tsono iye nakuti akhafuna kubziyesa munthu wabwino. Ndipo iye adabvundza Jezu kuti: “Kodi mwandzanguyo mbani?”

³⁰Na tenepo Jezu adamutawira aciti: “Pakhana munthu m'bodzi omwe akhabuluka kucokera kuJeruzalema acimbayenda kuJerikoo. Ndipo iye adagumana na akapondo. Na tenepo iwo adam'khundula bzakubvala, acim'menya. Ndipo iwo adamusiya wafumphira.

³¹Tsono baba wa ntsembe mwinango akhandobzipitirambo na njira, pomwe adamuwona, ndipo iye adamutsembera.

³²Ninga bzibodzi-bodzibzo adapitambo na pamwepo m'Levi, nyabasa wa nyumba ya Mulungu acimuwonambo. Ndipo iye adamutsemberambo pomwe.

³³Tsono m'Samaliya m'bodzi nyakudza omwe akhayendambo ulendo bwace, pomwe adafika pakhana iyepo acimuwona ndipo adam'bvera ntsisi.

³⁴Na tenepo adamutsuka bzirondabzo na mafuta na vinyu acimumanga. Pomwe adamala adam'pakiza pabulu. Ndipo adayenda naye kunyumba ya alendo acikamucengeta bwino.

³⁵Pomwe iye adaguduka mangwana yandzace adacosa kobiri ziwiri zandzaya acipasa nyakutambira alendo, acimuwuza kuti: “Ndicengeterenimbo munthuyu. Ndipo bzentse bzomwe imwe mun'cosabzo ine ndin'dzakulipirani pakubwerera.”

³⁶Kodi paatatuwa, mwandzace nguponi kuna ule omwe adamenyedwa na akapondo ule?”

³⁷Ndipo mpfundzisi wa mtemoyo adatawira aciti: “Mwandzce ngule omwe adamubvera ntsisi ule.” Na tenepo Jezu adamuwuza kuti: “Kacitembo bzibodzi-bodzibzo.”

³⁸Pantsiku ibodzi Jezu na ateweri wace akhayenda na njira, ndipo adafika mui winango, m'mwemo mukhana mkazi m'bodzi dzina lace Marta omwe adamutambira panyumba pace.

³⁹Ndipo m'bale wace wacikazi Maliya adadzakhalambo na Jezupo acimbabva mafala yace.