Zone 16

1

2

3

4

5

6

7

8

9

10

11

12

13

14

15

16

17

18

19

20

21

¹Ele tozini gamu tu Rau saripu gua hire, pude lopu kote taluarae si gamu koasa mia rinaṉeraṉe.

²Kaqu hitu vurani gamu rini si gamu pa dia sinaqoqi d. Na korapa mae sa totoso, sapu kote va mate gamu rini, meke kote balabala ia rini sapu tavete va leana la si arini koasa Tamasa, gua.

³Kote evaṉi rini koa gamu saripu gua hire, sina lopu gilanau rini si Arau meke sa Tamaqu.

⁴Ba ele tozini gamu tu Rau saripu gua hire, pude pana kamo sa totoso si kote balabala ia gamu sapu ele va balau gamu tu Arau si gamu. Lopu tozini gamu Rau tatasana sina korapa koa turaṉa gamu mo Arau.

⁵Ba kamahire si korapa la Qua tu koasa Tamaqu pu garunu mae Nau. Ba loke tie koa gamu si hite nanasau, ‘Pavei la si Goi?’ gua.

⁶Sina tozini gamu Rau kamahire, ke tiqe talotaṉa sari bulomia.

⁷Ba Maqu tozi va hinokarani gamu, sapu pa mia lineana gamu kaqu taloa tugo si Rau. Ura be lopu taloa Rau, si lopu kaqu mae sa Tie Varitokae pa Binalabala koa gamu. Ba pana taloa si Rau, si kote tiqe garunu mae nia Rau koa gamu si Asa.

⁸Meke pana mae Sa, si kote va gilana ni Sa sapu na tie sea si arini meke lopu na tie toṉoto si arini meke kote kamo pa vinaripitui.

⁹Sea nia rini sa guguana sa sinea, sina lopu va hinokarau rini si Arau.

¹⁰Sea nia rini sa tinoṉoto, sina korapa la koa sa Tamaqu si Rau, meke lopu kaqu dogoro pule Au gamu.

¹¹Sea nia rini sa vinaripitui, sina se Setani sa baṉarana sa kasia popoa hie si ele ta pitu pude tava kilasa pa Heli.

¹²Sokudi pule si hiva tozini gamu Rau, ba lopu kaqu boka avoso va nonoga i gamu kamahire.

¹³Ba pana kamo tu sa Maqomaqo Hope sapu tozia sa hinokara, si kaqu va bakalia Sa koa gamu meke turaṉa lani gamu koari doduru hinokara. Lopu kote zama nia Sa sa Nana ṉiniraṉira soti, ba kote zama nia mo Sa sapu avosia Sa, meke tozini gamu saripu korapa mae pa kenumia.

¹⁴Kote va lavatau Sa si Rau, sina kote tozi mo Sa koa gamu sapu vagi sa pa guguaqu Rau.

¹⁵Sari doduru guguana sa Tamaqu si Taqarau tugo, gua asa ke sa Maqomaqo Hope si kote vagi sari doduru pa guguaqu Rau meke vata gilana ni koa gamu.

¹⁶Lopu seunae meke lopu kote dogorau gamu si Arau, ba lopu kaqu seunae, meke kote dogoro pule Au mo gamu si Arau.”

¹⁷Meke vari nanasa pulei teledia sari kaiqa ri Nana disaepeli, “Na sa si gunia Sa totoso zama si Asa ‘Lopu seunae meke lopu kaqu dogoria gita si Asa, ba lopu kaqu seunae meke kote dogoro pulea gita si Asa,’ gua, meke zama gua tugo he si Asa, ‘Sina korapa la koa Sa Tamaqu si Arau,’ gua pule.

¹⁸Na sa sapu ‘Lopu seunae’ gunia Sa? Lopu gilania gita sapu zama nia Sa!” gua si arini.

¹⁹Gilania tu Zisu sapu odi hiva nanasia rini si Asa, ke zama la koa rini si Asa, “Lopu seunae meke lopu kote dogorau gamu si Arau, ba lopu kote seunae pule meke kote dogoro pule Au gamu si Arau. Gua asa sapu vari nanasa pule nia gamu telemia?

²⁰Ba maqu tozi va hinokarani gamu, kote kabo na talotaṉa si gamu, ba sari na tiena sa kasia popoa si kote qetuqetu dia. Kote talotaṉa si gamu, ba sari na mia tinalotaṉa si kote ta ilirae na qinetuqetu.

²¹Pana tata sa nana totoso sa barikaleqe, si balabala mamata si asa, sina korapa kamo mae mo sa nana totoso ta sigiti. Ba sipu ele podo sa haha, si muliṉi nia sa sa nana tinasigiti, sina qetu nia sa sapu ele podo vura mae koasa kasia popoa si keke haha.

²²Gua tugo asa sapu ta evaṉa koa gamu kamahire. Balabala mamata si gamu, ba kote dogoro pule gamu mo Rau, meke kote qetuqetu hola sari bulomia, meke loke tie hokara kote boka vagi pania pa korapa bulomia.

²³Meke pa rane asa, si lopu kote nanasa Nau keketoṉa gamu si Arau. Ba maqu tozi va hinokarani gamu sapu kote ponini gamu sa Tamaqu gua sapu tepa ia gamu pa pozaqu Rau.

²⁴Kamoa kamahire si lopu hite tepa ia gamu si keketoṉa pa pozaqu Rau. Mi tepa meke kaqu poni gamu sa Tamasa, meke kote gorevura valeana sa mia qinetuqetu.

²⁵Ele vivineini gamu tu Arau sari na tiṉitoṉa hire pa parabolo. Ba vugo repere, si lopu kote vivinei si Rau pa parabolo, ba kote tozi va bakalia mo Rau koa gamu sa guguana sa Tamaqu.

²⁶Pa rane asa, si kote tepa koa sa Tamaqu si gamu pa Pozaqu Rau. Lopu zama si Rau sapu Arau kote tepa poni gamu koa Sa.

²⁷Sina sa Tamaqu tu telena si tataruni gamu si gamu. Tataruni gamu Sa, sina tataru Nau gamu si Arau, meke va hinokaria tugo gamu sapu mae guaqu koa Sa si Arau.

²⁸Arau si mae guaqu koa sa Tamaqu, meke mae koasa kasia popoa, meke kamahire si kote luaria Rau sa kasia popoa meke pule la koasa Tamaqu,” gua si Asa.

²⁹Meke zama sari Nana disaepeli, “Kamahire si zama va lodaka si Goi, meke lopu zama pa parabolo.

³⁰Gilania gami kamahire sapu gilana betoi mo Goi sari doduru tiṉitoṉa, ke be lopu kilu nanasigo ke tie ba leana mo. Gua asa ke va hinokaria gami sapu na mae guamu koe Tamasa si Agoi,” gua si arini.

³¹Meke olaṉa se Zisu, “Va hinokara kamahire si gamu?

³²Ba korapa mae sa totoso, meke ele kamo tugo si asa, pana kote hopeke govete taloa si gamu, meke pule la pa hopeke mia vasina, meke Arau telequ mo si kote koa hola. Ba lopu telequ hinokara sina sa Tamaqu si koa koa Rau.

³³Ele tozini gamu tu Rau si hire: pude mi vagia sa binule pa mia tinoa keke koa Rau. Kote koa tasuna si gamu koasa kasia popoa. Ba mi koa va mataqara! Sina ele va mate pania Rau sa ṉiniraṉira tanisa kinaleana tanisa kasia popoa,” gua se Zisu.